3 Шәрқий түркистан тәшкилати "түрк дунясиға алий хизмәт мукапати" ға еришти

Ихтиярий мухбиримиз әркин тарим
2020-02-03
Share
uch-turk-teshkilati.jpg 3 Шәрқий түркистан тәшкилати "түрк дунясиға алий хизмәт мукапати" ға еришти. 2020-Йили 2-январ, түркийә.
RFA/Erkin Tarim

Узун йиллардин буян түркийәдә паалийәт елип бериватқан шәрқий түркистан фонди, шәрқий түркистан яшлар тәшкилати вә әйса йүсүп алптәкин фонди 2019-йиллиқ "түрк дуняси алий хизмәт мукапати" ға еришти.

2-январ күни истанбулда "үлкү оҗақлири" тәшкилатиниң уюштуруши билән 2019-йиллиқ "түрк дуняси алий хизмәт мукапати" ни тарқитиш мурасими өткүзүлди.

Мукапат тарқитиш мурасимиға "үлкү оҗақлири" тәшкилатиниң рәиси синан атәш әпәнди, әзалири вә милләтчи һәрикәт партийәсиниң бир қисим парламент әзалири вә рәһбәрлириму қатнашти.

Мурасимда "үлкү оҗақлири" тәшкилатиниң рәиси синан атәш әпәнди сөз қилди. У сөзидә "үлку оҗақлири" тәшкилатиниң залимларға қарши мәзлумларниң йенида болуш принсиплири бойичә бүгүн өз вәтәнлиридә хитай тәрипидин қурулған лагерларда туруватқан уйғур вә қазақ қатарлиқ қериндаш милләтләрниң еғир вәзийитини аңлитишқа алаһидә әһмийәт бериватқанлиқини, бундин кейинму бу хизмәтни чиң тутуп ишләйдиғанлиқини ипадилиди.

Мурасимда 20 дин артуқ саһәдә түрк дуняси үчүн хизмәт көрсәткән шәхсләр вә тәшкилатлар мукапатланди. Мурасимида түрк дунясиниң иптихар мукапати түркийәниң сабиқ муавин баш министири, милләтчи һәрикәт партийәсиниң рәиси дәвләт бағчәли әпәндигә берилгәнлики елан қилинди. Униңдин башқа "салҗуқлар тарихи" намлиқ китабни язған профессор әрқан гөксу әпәндигә, "түркләр келиватиду" намлиқ кинони ишлигән ширкәткә һәм түрк дунясиниң иптихар мукапати берилди. Османийә фонди тәшкилатиға түрк дунясиниң хизмәт мукапати берилди. 2019-Йили "балилар тоңмисун" дегән намда ярдәм паалийити елип берип уйғур йетим балиларға қишлиқ кийим тәминлигән, көп сандики уйғур йетим балиларниң хәтнисини қилдурған шәрқий түркистан фонди, шәрқий түркистан яшлар тәшкилати вә әйса йүсүп алптәкин фонди қатарлиқ тәшкилатларға көчмән йетимләргә ярдәм қилиш хизмәт мукапати берилди.

Биз бу мурасим тоғрисида пикир-қарашлирини елиш үчүн бу мурасимда сәһнигә чиқип мукапат тапшуруп алған шәрқий түркистан фондиниң рәиси муһиттин җануйғур, әйса йүсүп алптәкин фондиниң рәиси өмәр қул әпәнди вә шәрқий түркистан яшлири тәшкилатиниң рәиси илһан туранли әпәндиләр билән сөһбәт елип бардуқ.

Муһиттин җануйғур әпәнди шәрқий түркистан фондиниң 2019-йили қишта "балилар тоңмисун" намлиқ ярдәм паалийити уюштуруп, көп сандики уйғур йетим балиларға кийим-кечәк елип бәргәнлики, бу сәвәбтин мукапатқа лайиқ көрүлгәнликини баян қилип өтти.

Муһиттин җануйғур әпәнди түркийәдики үчинчи чоң партийә болған милләтчи һәрикәт партийәсиниң "үлкү оҗақлири" намидики яшлар тәшкилатиниң бундақ бир мукапат беришиниң өзлири үчүн бир илһам болғанлиқини тәкитлиди.

Әйса йүсүп алптәкин фондиниң рәиси доктор өмәр қул әпәнди мундақ деди: "шәрқий түркистан фонди, шәрқий түркистан яшлар тәшкилати вә әйса йүсүп алптәкин фонди қатарлиқ үч тәшкилат һәмкарлишиш әһдинамиси түзгән идуқ. Биз икки йилдин буян шәрқий түркистанлиқ йетим балиларға кийим-кечәк елип бериватимиз, йәнә йетим балиларни хәтни қилдуруш паалийитимизму бар. Уларға қәләм, китаб вә дәптәрлирини елип бериватимиз, уларниң аилилиригә ун, яғ, гүрүч ярдәм қиливатимиз. Қилған бу хизмәтлиримиз үчүн мукапат бәрди, наһайити хурсән болдуқ, бундин кейин техиму көп ишларни қилимиз."

Шәрқий түркистан яшлар тәшкилати мәсули илһам туранли әпәнди бундин кейин қилмақчи болған хизмәтлири һәққидә тохтилип өтти.

Түрк дуняси алий хизмәт мукапати 6 йилдин буян тарқитиливатқан болуп, һазирғичә шеир декламатсийә қилип даңқ чиқарған муҗаһит қәшқәрли, уйғур яш паалийәтчи асийә қарақаш ханим, әйса йүсүп алптәкин фондиниң рәиси өмәр қул әпәнди қатарлиқлар мәзкур мукапатқа еришкән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт