“Uyghurlar yighilishi” teshkilati prézidéntni Uyghurlarning awazigha qulaq sélishqa chaqirdi
2020.07.03
Amérikaning yétip kélish aldida turghan 4-iyul dölet bayrimini tebriklesh we 5-iyul ürümchi qirghinchiliqining 11 yilliq munasiwiti bilen 3-iyul küni aqsarayning yan teripidiki pénisliwaniye kochisida “Uyghur herikiti” teshkilati, Uyghur amérika birleshmisi we nyu-yorkti'iki “Uyghurlar yighilishi” (Uyghur Rally) teshkilati birlikte namayish ötküzdi.
Bu qétimqi namayishning teshkilligüchisi we “Uyghur herikiti teshkilati” ning qurghuchisi roshen abbas xanim bu namayishning meqsiti heqqide mundaq dédi: “Amérikaning musteqilliq küni harpisida biz Uyghurlarning awazini yetküzüsh üchün bu yerge yighilduq”.
Bu namayishqa nyu-yorktin kelgen “Uyghurlar yighilishi” teshkilatining qurghuchisi yosif namayishning meqsiti heqqide toxtilip mundaq dédi: “Bu namayishimizning meqsiti prézidéntqa uchurimizni yetküzüsh. Yeni prézidéntni Uyghurlarni yighiwélish lagérlirigha soliwélishini eyibleshke chaqirish. Ikkinchidin, yershari meginitiskiy qanuni arqiliq yighiwélish lagérilirigha chétishliq xitay emeldarlirini jazalishini telep qilish. Yéqinda ‛Uyghur kishilik hoquqi 2019‚ resmiy qanun'gha aylandi, biz prézidéntni bu qanunni resmiy ijra qilishqa chaqirimiz”.
Bu qétimqi namayishqa amérika döletlik meschitning imami talip sherif qatnashqan bolup, u Uyghur mesilisining din, millet, irq ayrimastin pütün insaniyet birlikte heriketlinishke tégishlik mesilige aylan'ghanliqini bildürüp mundaq dédi؛ “Biz qilishqa tégishlik ishimizni qilduq. Chünki dunyaning bir yéride adaletsizlik bolsa, pütün dunyada adaletsizlik bar dégenlik bolidu. Biz hemmimiz adem eleyhissalamdin kelgen. Héchqandaq bir din'gha étiqad qilmisimu biz insanlar bir-birimizge baghlinip yashaymiz. Héchkim yalghuz yashiyalmaydu. Yaratquchi hemmimizni oxshash yaratqan. Uyghurlarni xitay yaratmighan. Yaratquchi hemmimizni oxshash yaratqan, shunga qaysi dölette yashishimizdin qet'iynezer insaniy qedir qimmiti bilen yashashqa heqqimiz bar. Yaratquchi bergen hoquqni héchkim tartiwalalmaydu. Biz musteqilliq küni harpisida bu yerde Uyghurlarning heqqi üchün gep qiliwatimiz. Xitaygha iqtisadiy émbargo yürgüzüwatidu, amérikamu qurban bériwatidu. Qurban bérish asan emes, lékin insaniy qedir-qimmet bilen yashash üchün qurban bérishke erziydu”.
Mezkur yighilishqa qatnishish üchün hetta nyu-yorkta, hawayidin kelgenler bar bolup, ular amérikaning musteqilliq künide uyghularning musteqilliqi üchün bir kishilik awaz qoshush üchün bu namayishqa qatnashqanliqini éyitishti.