Австралийәдә «5-июл үрүмчи қирғинчилиқи» ниң 10йиллиқини хатириләш намайиши өткүзүлди

Ихтиярий мухбиримиз учқун
2019-07-08
Елхәт
Пикир
Share
Принт
«5-Июл үрүмчи қирғинчилиқи» ниң 10 йиллиқини хатириләп, хитай һөкүмитигә қарши өткүзүлгән намайиштин көрүнүш. 2019-Йили 5-июл, австралийә.
«5-Июл үрүмчи қирғинчилиқи» ниң 10 йиллиқини хатириләп, хитай һөкүмитигә қарши өткүзүлгән намайиштин көрүнүш. 2019-Йили 5-июл, австралийә.
RFA/Uchqun

7-Айниң 5-күни австралийәниң һәрқайси шәһәрлиридә яшаватқан уйғурлар «5-июл үрүмчи қирғинчилиқи» ниң 10 йиллиқини хатириләш намайиши өткүзди. Сидней шәһиридә өткүзүлгән намайиш сиднейдики хитай консулханиси алдида 50 дин ошуқ уйғурниң қатнишиши билән өткүзүлди. Австралийә уйғур җәмийитиниң катипи, дуня уйғур қурултийи ички ишлар комитетиниң мудири бәхтияр бөрә әпәндимни зиярәт қилдуқ. У сиднейдики намайиш һәққидә мәлумат берип мундақ деди:

«7-Айниң 5-күни дуня уйғур қурултийиниң чақириқи вә австралийә уйғур җәмийитиниң орунлаштуруши билән сиднейдики хитай консулханисиниң алдида намайиш өткүздуқ. Бүгүн сиднейда һава ямғурлуқ болған болсиму 50 дин ошуқ шәрқий түркистанлиқ қериндашлиримиз юқири кәйпият билән намайишни давамлаштурди».

Бәхтияр әпәндим йәнә намайишниң 2 саәткә йеқин давам қилғанлиқини билдүрүп мундақ деди:

«Намайиш саәт 10 дин 11 йеримғичә давам қилди. Намайишчилар шәрқий түркистанға азадлиқ, шәрқий түркистанға һөрлүк дәп шоар товлап хитай һөкүмитигә болған наразилиқини ипадилиди шундақла түрмиләрдики, лагерлардики бигунаһ хәлқниң қоюп берилишини тәләп қилишти».

5-Июл күни йәнә мелборндики хитай консулханиси алдидиму намайиш өткүзүлгән болуп, игилинишичә бу намайишқа 50 дин көпрәк уйғур билән биргә бир қисим түркләрму қатнашқан. Мелборндики намайишқа қатнашқан нурийә өзиниң немә үчүн намайишқа қатнашқанлиқи һәққидә тохтилип мундақ деди:

Миниң исмим нурийә, мән мелборн университетиниң асия тәтқиқати кәспиниң оқуғучиси. Бүгүн мән хитайниң мелборндики консулханиси алдида намайишқа қатнашмақтимән. Чүнки 2009-йилидики 5-июл қирғинчилиқини хатириләш билән биргә хәлқимниң һәқ-һоқуқлирини тәләп қилмақтимән. Мән мелборндики уйғур җамаитиниң яш әвладлири болуш сүпитим билән хитай һөкүмитиниң уйғурларни системилиқ һалда йоқатмақчи болғанлиқиға наразилиқимни билдүрдүм. Мениңчә бундақ паалийәтләр келәчәктә биз яшларға мирас қалиду, биз муһаҗирәттә чоң болған яшлар өзимизниң әвзәлликимиздин пайдилинип, уйғур дәвасиға актиплиқ билән қатнишимиз вә даваға бир кишилик һәссимизни қошушимиз керәк дәп ойлаймән».

Мелборндики намайишқа қатнашқан түркийәлик кадәр ханимму намайиштики тәсиратини көз яшлирини туталмиған һалда баян қилип мундақ деди:

Миниң исмим кадәр, мән түркийәдә туғулған. Өзүмни уйғурлардин айрип қариялмаймән, бу бир түркниң вәзиписидур, шундақла өзини инсан дәп һесаблиғанларниң вәзиписидур. Шуниң үчүн бу намайишқа кәлдим. Өзини түрк дәп қарайдиғанлар, мусулман дәп қарайдиғанлар, әқәллийси өзини инсан дәп қарайдиғанлар бу йәрдә болуши керәк. Уйғурлар бизниң қенимиз вә җенимиздур. Йолда бир итқа увал қилинғинида таратқуларға чиқип чуқан салисиләр, әмма уйғурларға ярдәм қилмиғиниңлар үчүн уят һес қилмамсиләр» ?

7-Айниң 6-күни аделайид шәһиридиму «5-июл үрүмчи қирғинчилиқи» ниң 10 йиллиқи мунасивити билән намайиш өткүзүлгән болуп, игилинишичә бу намайишқиму хели көп сандики уйғурлар қатнашқан. Австралийә шәрқий түркистан җәмийитиниң муавин рәиси таш әпәнди бу тоғрисида мәлумат берип мундақ деди:

«Бүгүн аделайид шәһиридә намайиш өткүздуқ, саәт 10 йеримда киң веллиям кочисидин бир йерим километирлиқ мусапини бесип, парламент бинаси алдиға йиғилдуқ вә икки саәттин ошуқ вақитта шоар товлап, намайишимизни қилдуқ».

Мәлум болушичә, австралийәниң һәрқайси шәһәрлиридә 10 йилдин бери 5-июл үрүмчи қирғинчилиқини хатириләш намайиши өткүзүлмәктә икән.

Программини авистиралийәдин учқун тәйярлиди.

Пикирләр (0)
Share
Толуқ бәт