Muz arisidin jesiti tépilghan 5 yashliq balining anisi ghuljadiki türmide, dadisining loptiki lagérda ikenliki delillendi

Muxbirimiz shöhret hoshur
2019-12-18
Élxet
Pikir
Share
Print
Anisi ghuljida türmide, dadisi lopta lagérgha solan'ghan, muz arisidin chiqiriwélin'ghan 5 yashliq balining etrapida kishiler köz yéshi qilmaqta.
Anisi ghuljida türmide, dadisi lopta lagérgha solan'ghan, muz arisidin chiqiriwélin'ghan 5 yashliq balining etrapida kishiler köz yéshi qilmaqta.
Social Media

16-Dékabir küni ijtima'iy taratqularda bir kichik balining jesitining muz arisidin chiqiriliwatqanliqi we etraptiki kishilerning yighlawatqanliqi körsitilgen bir sin körünüsh tarqalghan idi. Muxbirimizning ijtima'iy axbaratlardiki yip uchlirigha asasen élip barghan téléfon ziyaretliri dawamida mezkur paji'ening lop nahiye sampul yéza qarqiy kentide yüz bergenliki, balining anisining ghuljadiki bir türmide, dadisining bolsa loptiki lagérda ikenliki delillendi.

16-Dékabir küni ijtima'iy taratqularda tarqalghan bir sin körünüshide bir top kishilerning bir kichik balini muz arisidin chiqiriwatqan we yighlishiwatqan körünüshi tarqalghan. Bu heqte taratqulardiki inkaslarda balining 5 yash ikenliki, ismining nesrulla ikenliki we lop nahiyesining sampul yéza qarqiy kentige nopusluq ikenliki tilgha élin'ghan.

Biz bu yip uchlirigha asasen lop nahiyesige qarita bir qatar téléfon ziyaretliri élip barduq. Yéziliq saqchixana we yéziliq hökümetning torlardiki téléfon nomurliri ishlimigendin kéyin, biz mezkur yézidiki ahalilerge téléfon qilduq. Ahalilerdin biri mezkur paji'e heqqide özi tewe kentte mexsus yighin échip xewer qilin'ghanliqini tilgha aldi.

Ahalilerdin yene biri mushu düshenbe küni, yeni 16-dékabir küni kentte bayraq chiqirish murasimida uqup ötülgen uqturushqa asasen bayan qilishiche, besh yashliq nesrulla shenbe küni birqanche balilar bilen sirtta oynawétip östeng boyigha yéqinlashqan we su ichmekchi bolghanda téyilip kétip östengge chüshüp ketken.

Sampul yézisidiki kent kadirliridin birining bayan qilishiche, nesrullaning dadisining ismi ismi yüsüp toxti, anisi büwipatem tursunrozi iken. Nöwette 28 yashliq yüsüp toxti loptiki lagérda, 27 yashliq büwipatem ghuljadiki bir türmide iken. Büwipatem 2 yil burun atalmish "Qanunsiz diniy tebligh" qe qatnashqanliqi üchün 10 yilliq késiwétilgen, yoldishi yüsüp toxti ayalining atalmish "Jinayiti" seweblik "Terbiyelesh" ke ekétilgen iken. A'ilidiki yalghuz bala nesrulla késelchan bowisi bilen momisining béqishigha qalghan iken. 71 Yashliq boway mettoxti imin bilen 68 yashliq momay qemer sayimning baligha egiship sirtqa chiqqudek hali bolmighanliqi üchün balining östengge chüshüp kétish qazasidin qoshnilarning wasitisi bilen bir kün kéyin xewer tapqan.

Melum bolushiche, etraptiki ahaliler aridin 5 kün ötken bolsimu, emma nesrullaning türme we lagérlardiki ata-anisining balisining yüzini körüsh yaki depne murasimi ötküzüsh üchün öyige qaytqanliqi heqqide héchqandaq uchur almighan.

Toluq bet