Абдуреһим ғени: «ялғуз кишилик намайишимни изчил давамлаштурмақчимән!»

Мухбиримиз меһрибан
2019-05-09
Елхәт
Пикир
Share
Принт
Бир йилдин буян голландийә пайтәхти амстердамниң шәһәр мәркизидики мәйданда ялғуз кишилик намайишини изчил давамлаштуруп келиватқан абдуреһим ғени әпәнди.
Бир йилдин буян голландийә пайтәхти амстердамниң шәһәр мәркизидики мәйданда ялғуз кишилик намайишини изчил давамлаштуруп келиватқан абдуреһим ғени әпәнди.
Social Media

Бир йилдин буян голландийә пайтәхти амстердамниң шәһәр мәркизидики мәйданда ялғуз кишилик намайишини изчил давамлаштуруп келиватқан абдуреһим ғени әпәндиниң паалийәтлири муһаҗирәттики уйғурларға натонуш әмәс. Униң бу тинимсиз паалийити иҗтимаий таратқуларда кәң тарқилип, барғанчә диққәт қозғимақта.

9-Май күни абдуреһим ғени әпәнди радийомиз зияритимизни қобул қилип, өзиниң бултурдин буян ялғуз кишилик намайишни изчил давамлаштуруп келиштики сәвәбләр, намайиш җәрянида һес қилғанлири вә башқиларниң қоллап-қуввәтләшлири шундақла өзиниң буниңдин кейинки пиланлири һәққидә мәлумат бәрди.

Абдуреһим әпәндиниң билдүрүшичә, у дәсләп ялғуз кишилик намайишни башлиғанда өз аилисидики тутқунлар һәққидә испат бериш вә аилисиниң бешиға кәлгән еғир қисмәтләрни аңлитишни мәқсәт қилған икән.

Әмма намайиш җәрянида униң тәшвиқат рәсимлирини көргән саяһәтчиләрниң уйғур вәзийитигә болған қизиқиши, мухбирларниң униңдин әһвал игилиши, уйғурларни қоллаватқан чәтәллик достларниң барғанчә көпийиши, болупму кейинки чағларда барғанчә яманлишип барған уйғур вәзийити сәвәблик у ялғуз кишилик намайишини техиму кәң даиригә, йәни пүткүл милләтниң дәвасини аңлитиш йөнилишигә тәрәққий қилдурған. 

Шундақ қилип абдуреһим ғени әпәнди ялғуз кишилик намайишини кейинчә пүткүл милләтниң бешиға келиватқан еғир күлпәтләрни аңлитишқа, тәшвиқат рәсимлирини техиму кәң даиридики мәзмунлар билән бейитишқа вә бу намайишни ялғуз өз бешиға елип беришиға қаримай уни изчил давамлаштурушқа бәл бағлиған.

Униң билдүрүшичә, у 2019-йилдики паалийитидә лагерлардики тутқунлар, қамақтики уйғур сәрхиллири вә лагер сиртидики уйғурларниң әһвали қатарлиқ темиларни давамлиқ аңлатқан. Буниңға хитай маллирини байқут қилиш қатарлиқ йеңи мәзмунларни қошуп, бәзи әмәлий үнүмләргиму еришкән.

Униң амстердам мәйданидики ялғуз кишилик намайиши кейинки вақитларда мухбирларниң вә таратқуларниң диққитини қозғашқа башлиған. Амстердам мәйданида униң билән көрүшкән һәр хил дөләтләрдин кәлгән саяһәтчиләрдин 50 тин артуқ киши униң билән биваситә алақә орнатқан.

Абдуреһим әпәндидин бәзи чәтәллик саяһәтчиләр «уйғурлар үчүн қандақ ярдәм қилалаймиз» дәп сориғинида у улардин һеч болмиса хитай маллирини байқут қилишни, хитай маллирини сетивалмаслиқ арқилиқ хитайға болған қаршилиқни ипадә қилишни тәләп қилған.

Сөһбитимиз ахирида өз паалийитини изчил давамлаштуруш ирадисини билдүргән абдуреһим ғени әпәнди йәнә өзиниң уйғурлар вәзийитини аңлитиш имканийити болғанлики җайда уйғур хәлқиниң бешиға келиватқан зулумларни аңлитиватқанлиқини билдүрди. У зияритимизни қобул қиливатқан вақитниң өзидә голландийәдики мәлум университетниң тәклипи билән өзи тәйярлиған тәшвиқат рәсимлирини елип, уйғурларниң һазирқи әһвалини аңлитиш үчүн йолға чиққанлиқини билдүрди. 

Юқириқи аваз улинишидин программиниң тәпсилатини аңлиғайсиләр.

Толуқ бәт