Abduréhim ghéni: "Yalghuz kishilik namayishimni izchil dawamlashturmaqchimen!"

Muxbirimiz méhriban
2019-05-09
Élxet
Pikir
Share
Print
Bir yildin buyan gollandiye paytexti amstérdamning sheher merkizidiki meydanda yalghuz kishilik namayishini izchil dawamlashturup kéliwatqan abduréhim ghéni ependi.
Bir yildin buyan gollandiye paytexti amstérdamning sheher merkizidiki meydanda yalghuz kishilik namayishini izchil dawamlashturup kéliwatqan abduréhim ghéni ependi.
Social Media

Bir yildin buyan gollandiye paytexti amstérdamning sheher merkizidiki meydanda yalghuz kishilik namayishini izchil dawamlashturup kéliwatqan abduréhim ghéni ependining pa'aliyetliri muhajirettiki Uyghurlargha natonush emes. Uning bu tinimsiz pa'aliyiti ijtima'iy taratqularda keng tarqilip, barghanche diqqet qozghimaqta.

9-May küni abduréhim ghéni ependi radiyomiz ziyaritimizni qobul qilip, özining bulturdin buyan yalghuz kishilik namayishni izchil dawamlashturup kélishtiki sewebler, namayish jeryanida hés qilghanliri we bashqilarning qollap-quwwetleshliri shundaqla özining buningdin kéyinki pilanliri heqqide melumat berdi.

Abduréhim ependining bildürüshiche, u deslep yalghuz kishilik namayishni bashlighanda öz a'ilisidiki tutqunlar heqqide ispat bérish we a'ilisining béshigha kelgen éghir qismetlerni anglitishni meqset qilghan iken.

Emma namayish jeryanida uning teshwiqat resimlirini körgen sayahetchilerning Uyghur weziyitige bolghan qiziqishi, muxbirlarning uningdin ehwal igilishi, Uyghurlarni qollawatqan chet'ellik dostlarning barghanche köpiyishi, bolupmu kéyinki chaghlarda barghanche yamanliship barghan Uyghur weziyiti seweblik u yalghuz kishilik namayishini téximu keng da'irige, yeni pütkül milletning dewasini anglitish yönilishige tereqqiy qildurghan. 

Shundaq qilip abduréhim ghéni ependi yalghuz kishilik namayishini kéyinche pütkül milletning béshigha kéliwatqan éghir külpetlerni anglitishqa, teshwiqat resimlirini téximu keng da'iridiki mezmunlar bilen béyitishqa we bu namayishni yalghuz öz béshigha élip bérishigha qarimay uni izchil dawamlashturushqa bel baghlighan.

Uning bildürüshiche, u 2019-yildiki pa'aliyitide lagérlardiki tutqunlar, qamaqtiki Uyghur serxilliri we lagér sirtidiki Uyghurlarning ehwali qatarliq témilarni dawamliq anglatqan. Buninggha xitay mallirini bayqut qilish qatarliq yéngi mezmunlarni qoshup, bezi emeliy ünümlergimu érishken.

Uning amstérdam meydanidiki yalghuz kishilik namayishi kéyinki waqitlarda muxbirlarning we taratqularning diqqitini qozghashqa bashlighan. Amstérdam meydanida uning bilen körüshken her xil döletlerdin kelgen sayahetchilerdin 50 tin artuq kishi uning bilen biwasite alaqe ornatqan.

Abduréhim ependidin bezi chet'ellik sayahetchiler "Uyghurlar üchün qandaq yardem qilalaymiz" dep sorighinida u ulardin héch bolmisa xitay mallirini bayqut qilishni, xitay mallirini sétiwalmasliq arqiliq xitaygha bolghan qarshiliqni ipade qilishni telep qilghan.

Söhbitimiz axirida öz pa'aliyitini izchil dawamlashturush iradisini bildürgen abduréhim ghéni ependi yene özining Uyghurlar weziyitini anglitish imkaniyiti bolghanliki jayda Uyghur xelqining béshigha kéliwatqan zulumlarni anglitiwatqanliqini bildürdi. U ziyaritimizni qobul qiliwatqan waqitning özide gollandiyediki melum uniwérsitétning teklipi bilen özi teyyarlighan teshwiqat resimlirini élip, Uyghurlarning hazirqi ehwalini anglitish üchün yolgha chiqqanliqini bildürdi. 

Yuqiriqi awaz ulinishidin programmining tepsilatini anglighaysiler.

Toluq bet