Мәрһум диний алим абдулһәкимхан мәхсумһаҗим вапатиниң 5 йиллиқи хатириләнди

Ихтиярий мухбиримиз арслан
2021-12-23
Share

22-Декабир чаршәнбә күни мәрһум диний алим абдулһәкимхан мәхсумниң вапатиниң 5 йиллиқи мунасивити билән истанбулда хатирләш йиғини өткүзүлди.

Бу хатирләш йиғини шәрқий түркистан маарип вә һәмкарлиқ җәмийити тәрипдин уюштурулған болуп, йиғинға мәрһумниң дост-ярәнлири, сәпдашлири, уйғур зиялийлар, өлималар, шәрқий түркистан иҗтимаий тәшкилатларниң мәсуллири вә истанбулдики уйғурлардин әр-аял болуп көп санда киши қатнашти.

Йиғин қуран кәрим тилавити билән башланди. Йиғинда алди билән мәрһум абдулһәкимхан мәхсумһаҗимниң һаяти, иш-излири тонуштурулған һөҗҗәтлик филим көрситилди. Кейин шәрқий түркистан маарип вә һәмкарлиқ җәмийити рәиси һидайәтуллаһ оғузхан ечилиш сөзи сөзлиди.

Һидайәтуллаһ оғузхан мәрһум абдулһәкимхан мәхсумһаҗимниң шәрқий түркистан күришиниң һәрқайсий саһәлиридә муһим хизмәтләрни қилған пидакар бир диний алим вә җамаәт әрбаби икәнликини тәкитлиди.

Һидайәтуллаһ оғузхан йәнә мәрһум абдулһәкимхан мәхсуһаҗиммниң муһаҗирәттики шәрқий түркистан күришиниң ялғуз шәрқий түркистан маарип вә һәмкарлиқ җәмиийитиниң паалийәтлири биләнла чәклинип қалмастин, бәлки йәнә пүтүн шәрқий түркистан тәшкилатлириниң бир парчисидәк яки бир әзасидәк җан-дили билән хизмәт қилғанлиқини билдүрди.

Арқидин шәрқий түркистан өлималар бирликиниң муавин рәиси сираҗиддин әзизи сөз қилди. У мәрһум абдулһәкимхан мәхсумһаҗимниң һаят вақтида уйғур җамаитини бир-бири билән яраштуридиған, бир-бири билән йеқиндин бағлап кәлгән бир көврүклүк шәхс болғанлиқини тәкитлиди.

Сираҗидин әзизи йәнә мәрһум мәхсумһаҗимниң иҗтимаий тәшкилатларни кәспләштуруштә муһим рол ойниғанлиқини билдүрди. Мәрһумниң шәрқий түркистан маарип вә һәмкарлиқ җәмийити, шәрқий түркистан өлималар бирлики, сутуқ буғрахан илим вә мәдәнийәт вәхпи қатарлиқ тәшкилатларниң қурулушида муһим рол ойниғанлиқини мисал қилип көрсәтти.

Йиғинда йәнә түркийә парламентиниң сабиқ әзаси җалал әрбай, мәрһумниң сәпдиши абдуқадир япчан, дуня уйғур қурултийи вәхпиниң рәиси абдурешит абдулһәмит, мәрһумниң рәпиқиси мәрйәм тәклимакан ханим, оғли абдусалам тәклимакан, шәрқий түркистан нузугум вә мәдәнийәт җәмийитиниң рәиси мунәввәр өзуйғур, шиветсийә уйғур маарип уюшмисиниң рәиси ниҗат турғун, явропа шәрқий түркистан маарип вә һәмкарлиқ җәмийитиниң рәис вәкили абдулваһап қарим, германийәдин кәлгән абдуҗелил қарим қатарлиқлар сөз қилди.

Йиғинда сөз қилған сабиқ парламент әзаси профессур җалал әрбай мәрһум абдулһәкимхан мәхсум билән сутуқ буғрахан илим вә мәдәнийәт вәхпини бирликтә қурғанлиқини тәкитләп мундақ деди: “һаятиниң ахириғичә достлуқимизни давам қилған қиммәтлик дәва адими сәпдишим абдулһәкимхан мәхсум билән сутуқ буғрахан илим вә мәдәнийәт вәхпини бирликтә қуруп чиққан идуқ, нәччә йил бирликтә хизмәт қилған идуқ. Аллаһ мәрһумға рәһмәт қилсун! у бизни бир йәргә җәм қилди, униң хизмәтлири һазирму давам қиливатиду, у бизләргә аң-чүшәнчә өгәтти, бизләрни ойғатти, у бизни көк байрақни игиз көтүрүп, дәвани алға илгирлитишкә чақиратти, у шәрқий түркистан азадлиқ һәрикитигә йетәкчилик қилди, биз униң йетәкчиликидә бирликитә һәрикәт қилдуқ, аллаһ мәрһумға рәһмәт қилсун!”

Йиғинда дуня уйғур қурултийи вәхпиниң рәиси абдурешит абдулһәмит, мәрһум абдулһәкимхан мәхсумһаҗимниң нишан-ғайиси тоғрисида тохтилип мундақ деди: “биз қачан мәхсумһаҗим акиниң йолида меңип, униң ғайисини, йәни шәрқий түркситанни мустәқил қилиштин ибарәт улуғвар нишанини әмәлгә ашуруш үчүн тохтимай күрәш қилғанда, униң роһиниң шат болидиғанлиқиға ишинимиз!”

Абдурешит абдулһәмит әпәнди сөзидә йәнә мәрһумниң һаят вақтида баштин-ахир сәмимий бир дәва адими болғанлиқини, шундақла муһаҗирәттики пүткүл шәрқий түркистанлиқларниң ишәнчисигә еришкән шәхс икәнликини тәкитлди.

Мәрһум диний алим вә җамаәт әрбаби абдулһәкимхан мәхсумһаҗим 2016-йили 12-айниң 22-күни сәһәрдә истанбулда туюқсиз вапат болған иди. Аилә әзалириниң билдүрүшичә, мәрһум туюқсиз вапат болуштин илгири саламәтликидә һечқандақ бир мәсилә көрүлмигән болуп, әйни вақитта дохтурларму униң туюқсиз өлүминиң сәвәбигә ениқ диагноз қоялмиған. Мәрһум абдулһәкимхан мәхсум вапат болғанда әмдила 53 яшқа киргән болуп, униң вақитсиз өлүми пүтүн дунядики, болупму түркийәдики уйғур җамаити үчүн зор йоқитиш болған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт