Yalghuz namayishchi abduréhim ghéni améstérdam dam meydanida ikki jumhuriyetni xatirilidi

Muxbirimiz méhriban
2019-11-16
Élxet
Pikir
Share
Print
Yalghuz kishilik namayishchi abduréhim ghéni ependi gollandiye dam meydanida ikki jumhuriyetni xatirilesh pa'aliyiti ötküzdi. 2019-Yili 16-noyabir. Amistérdam, gollandiye.
Yalghuz kishilik namayishchi abduréhim ghéni ependi gollandiye dam meydanida ikki jumhuriyetni xatirilesh pa'aliyiti ötküzdi. 2019-Yili 16-noyabir. Amistérdam, gollandiye.
Abdurehim Gheni Teminligen

16 Aydin béri gollandiye paytexti améstérdamdiki dam meydanida yalghuz namayishni dawamlashturup kéliwatqan abduréhim ghéni 16-noyabir küni 20-esir Uyghur tarixidiki ikki jumhuriyetni xatirilesh pa'aliyiti ötküzdi.

Améstérdamdiki dam meydanida ötküzülgen ikki jumhuriyetni xatirilesh pa'aliyiti shu yer waqti 16-noyabir shenbe sa'et 12:00 de abduréhim ghénining Uyghurche we gollandche nutqi bilen bashlandi. Uning nutqi yene Uyghur terjiman arqiliq neq meydanda in'glizchigha terjime qilindi.

Abduréhim ghéni nutqida ikki qétimliq sherqiy türkistan jumhuriyitining qurulushi we ularning qandaq tarixiy shara'itta yiqilghanliqigha da'ir tarixi sawaqlarni eslitip ötti. U sözide yene xitay kommunist hakimiyitining Uyghurlar üstidin yürgüzüwatqan irqiy we diniy basturushlirini dunyagha anglitishning zörürlükini, dunya jama'etchilikining diqqitini Uyghurlarning nöwettiki jiddiy weziyitige tartishning muhajirettiki her bir Uyghurning bash tartip bolmaydighan wezipisi ikenlikini tekitlidi.

Neq meydandin radiyomiz ziyaritini qobul qilghan abdurehim ghéni özining 2 aydin buyan jiddiy teyyarliq qilish arqiliq Uyghur tarixidiki ikki jumhuriyetke a'it tarixiy süretlerni toplighanliqini, mexsus lozunka yasighanliqini shundaqla ilgiri özining yalghuz kishilik namayishi jeryanida ishletken Uyghurlar heqqidiki teshwiqat taxtilirining mezmunini yéngilighanliqini bildürdi. U yene bügünki pa'aliyetke qatnashqan herqandaq bir kishining Uyghur tarixi, Uyghurlarning nöwettiki siyasiy weziyiti we Uyghur medeniyiti heqqide omumyüzlük bir chüshenchige ige bolidighanliqini eskertip ötti.

Melum bolushiche, abduréhim ghénining 16-noyabir améstérdam dam meydanida ötküzgen ikki qétimliq sherqiy türkistan jumhuriyitini xatirilesh pa'aliyiti gollandiyediki we dunyaning herqaysi jayliridiki Uyghurlarning qollishigha érishken. Gollandiyediki Uyghur jama'iti mezkur pa'aliyet jeryanida Uyghurche ta'amlarni hazirlash, Uyghur medeniyet buyumlirini teyyarlash ishlirigha yardemleshken bolsa, bashqa döletlerdiki Uyghurlar abduréhim ghénigha doppa qatarliq Uyghur kiyim-kéchekliri bilen xatire buyumlirini ewetken.

Pa'aliyetke qatnashqan exmetjan ependi ziyaritimizni qobul qilip, bu pa'aliyetke gollandiyediki Uyghurlarning aktipliq bilen qatnashqanliqini, Uyghur yashlirining aktipliq bilen gollandche, türkche, erebche, in'glizche tillarda ötken-kechkenlerge Uyghur weziyitini anglatqanliqini bildürdi.

Biz ziyaritmiz jeryanida améstérdamdiki dam meydanigha kélip mezkur pa'aliyetni körgen bir sayahetchidin tesiratni soriduq.

Özining tunji qétim Uyghurlar uyushturghan bu xil pa'aliyetke qatnashqanliqini bildürgen bu sayahetchi meydan'gha qoyulghan lozunka we teshwiqat süretliridin Uyghurlarning nöwettiki qiyin ehwalini chüshen'genlikini, Uyghurlarning tarixta qurghan ikki musteqil jumhuriyiti we Uyghur medeniyitige a'it bilimlerdin xewer tapqanliqini bayan qildi.

Abduréhim ghénining améstérdam dam meydanida ötküzgen Uyghur tarixidiki ikki qétimliq sherqiy türkistan jumhuriyitini xatirilesh pa'aliyiti Uyghur teshkilatliriningmu yéqindin qollishigha érishken. Mezkur pa'aliyetke gérmaniyedin kélip qatnashqan dunya Uyghur qurultiyining re'isi dolqun eysa ependimu radiyomiz ziyaritini qobul qildi.

Dolqun eysa abduréhim ghénining 16 aydin buyan dawamlashturup kéliwatqan yalghuz kishilik namayishigha yughuri baha berdi. U yene abdurehim ghénining dunyaning muhim sayahet merkezlirining biri bolghan améstérdamdiki dam meydanida ötküzgen ikki jumhuriyetni xatirilesh pa'aliyitining Uyghur weziyitini dunyagha anglitishta muhim rol oynawatqanliqini tekitlidi.

Toluq bet