Әхмәтҗан қасиминиң катипи абдурешит иминниң рәпиқиси ризвангүл ханим вапат болди
2020.05.21
20-Май күни қирғизистандики уйғур җамаәтчилики шәрқий түркистан җумһурийитигә хизмәт қилған вәтәнпәрвәр-шаир абдурешит иминниң рәпиқиси вә тонулған уйғур зиялийси, “иттипақ” гезитиниң баш муһәррири әкбәрҗан бавудунофниң аниси ризвангүл әхмәтҗанни бақи дуняға узатти.
Ризвангүл ханимниң йолдиши абдурешит имин 1949-йили 8-айда миллий азадлиқ инқилаб рәһбири әхмәтҗан қасими қатарлиқлар билән биргә қазаға учриған болуп, у әйни вақитта” иттипақ “ахбарат ишханисиниң мәсул хадими иди. Абдурешит имин тонулған шаир вә” инқилаби шәрқий түркистан гезити “ниң мухбири болуп, уни әхмәтҗан қасими көп җайларға өзи билән биргә хизмәткә елип барғаниди.
Ризвангүл ханим абдурешит иминниң қазасидин кейин пәрзәнтлирини өзи беқип өстүргәниди. Ризвангүл һаҗим әхмәтҗан қизи 1925-йили ғулҗа шәһиридә һүнәрвән аилисидә туғулған. У дәсләп диний мәктипидә оқуп, кейин боғалтирлиқ дәрслирини түгитип ғулҗа шәһиридики гиләм фабрикисида боғалтир болуп ишлигән.
1949-Йили ризвангүл ханим, йолдиши абдурешит имин шәрқий түркистан җумһурийитиниң рәһбәрлиридин әхмәтҗан қасими, генерал исһақбек муноноф қатарлиқлар билән биргә һазирғичә сирлиқ вәқә дәп қариливатқан айропилан паҗиәсидә қаза қилғанда һамилидар болуп, у үч кичик пәрзәнти билән қалғаниди.
1961-Йили ризвангүл һаҗим төт балиси билән сабиқ совет иттипақиға көчүп чиқип бишкәк шәһиригә орунлашқан. У, бишкәк шәһиридә завут-фабрикилирида ишләп баллириға илим тәрбийәси берип, уларни дадисиға охшаш милләтпәрвәр роһта тәрбийәлиди. Бу һәқтә радио зияритимизни қобул қилған “иттипақ” гезитиниң муһәррири рәһимҗан һапизи әкбәрҗан бавудуноф вә аилисигә чоңқур тәзийә билдүрүп, мәрһумәни қәһриман ана дәп тонуйдиғанлиқини тәкитлиди.
Шәрқий түркистан җумһурийити дәвридә туғулған гүлбустан абдурешит, йәни ризвангүл һаҗимниң қизи зияритимизни қобул қилип, өзиниң мәрһум ата-анисидин ғурурлинидиғанлиқини, анисиниң өзлирини муһаҗирәттә қанчилик қийинчилиқлар билән беқип чоң қилғанлиқини баян қилди.
Қирғизистан уйғурлири “иттипақ” җәмийитиниң рәиси әсқәр қасимоф “иттипақ” гезитиниң баш муһәррири, пәлсәпә пәнләрниң кондидат доктори әкбарҗан бавудуноф вә униң аилисигә чоңқур тәзийә билдүрди.
Ризвангүл һаҗимниң ондин ошуқ нәврә вә йигирмидин ошуқ чәвриси қалди.
Ризвангүл ханим шәрқий түркистан инқилабиға қатнашқан тарихий шаһитлар ичидики әң ахирқиларниң бири болуп, һазир бишкәк вә алмута шәһәрлиридә 1944-1949-йиллиридики инқилабқа қатнашқан кишиләр наһайити санақлиқла қалған.