Istanbulda merhum ablikim baqi iltebirni xatirilesh yighilishi ötküzüldi

Ixtiyariy muxbirimiz arslan
2019-08-26
Élxet
Pikir
Share
Print
Merhum zhurnalist we edib ablikim baqi iltebirni xatirilesh yighilishining teklipnamisi.
Merhum zhurnalist we edib ablikim baqi iltebirni xatirilesh yighilishining teklipnamisi.
RFA/Arslan

25-Awghust küni istanbulda merhum zhurnalist we edib ablikim baqi iltebirni xatirilesh yighilishi ötküzüldi.

Bu yighilishni merhumning sepdashliridin abduljélil turan bilen eziz Uyghur qatarliqlar uyushturghan bolup, merhumning istanbuldiki yéqin dostliri we sepdashliri qatnashti.

Yighilishta teklimakan Uyghur neshriyatining mudiri abdujélil turan, dini alim abdul'eziz rehmitulla, Uyghur xewer we tetqiqat torining mes'uli hamitxan köktürk we doktur haji qutluq qadiri qatarliqlar söz qilip, merhumning hayat-pa'aliyetliri we ish-izliri toghrisida toxtaldi.

Teklimakan Uyghur neshriyatining bashliqi abdujélil turan ependi merhum ablikim baqi iltebirning hayatigha baha bérip ötti. U merhumning weten ichi we sirtida élip barghan ilmiy we edebiy xizmetliri, siyasiy pa'aliyetliri we ijadiyetliri üstide toxtilip ötti.

Merhum ablikim baqi iltebir bilen istanbuldiki sherqiy türkistan wexpide 7 yil birge xizmet qilghan sepdishi hamutxan göktürk ependi ziyaritimizni qobul qilip, ablikim baqining bir ilim adimi, yazghuchi we edib bolupla qalmastin, belki weten we milliti üchün harmay küresh qilghan bir pa'aliyetchi ikenlikini tekitlep ötti.

Istanbuldiki Uyghur ziyaliysi abduréshit abdulhemid ependimu pikir bayan qilip, merhum ablikim baqi iltebir bilen 1994-yili istanbulda tonushqanliqini, uning türkiyediki hayati dawamida özige chongqur tesir qaldurghanliqini bayan qilip ötti.

Igilishimizche, merhum ablikim baqi iltebir 1951-yili 10-ayning 2-küni ürümchi shehiride tughulghan. U "Medeniyet zor inqilabi" ning apetlik yillirida, yeni 1973-yildin 1975-yilgha qeder "Qayta terbiye" namida ili wilayitining toqquztara nahiye görjilgha yézisigha töwen'ge chüshürülgen. 1975-Yili 9-aydin 1977-yili 7-ayghiche ürümchi ma'arip institutida oqughan, kéyinki mezgillerde yene radiyo-téléwiziye uniwérsitétining edebiyat fakultétida oqughan. Ablikim baqi iltebir ependi 1992-yili Uyghur diyaridin ayrilghan'gha qeder ürümchi tejribe ottura mektipining edebiyat oqutquchisi, "Ürümchi kechlik géziti" ning mu'awin bash muherriri, "Tengritagh" zhurnilining bash muherriri, ürümchi sheherlik edebiyat-sen'etchiler birleshmisining mu'awin re'isi qatarliq xizmetlerde bolghan.

U 1992-yili türkiyege köchüp chiqip muhajirliq hayatini bashlighandin buyan yéziqchiliq arqiliq Uyghur dawasigha xizmet qilishni dawam qilip kelgen. U 1992-yildin 2000-yili 2-ayghiche istanbuldiki sherqiy türkistan weqpining medeniyet tetqiqat merkizide tetqiqatchi bolup xizmet qilghan. Bu jeryanda "Sherqiy türkistan awazi" zhurnilining mes'ul muherriri bolup ishligen. 2000-Yili a'ilisi bilen amérikigha köchüp bérip, "Erkin asiya radiyosi" Uyghur bölümide tehrirlik xizmiti bilen meshghul bolghan hemde 2017-yili dem élishqa chiqqan. Merhum 2019-yili 8-awghust küni amérika paytexti washin'gtonda dawalash ünüm bermey wapat bolghan.

Toluq bet