Абликим кәлкүнниң нахшилиридин «қериндашлар» бөлгүнчиликкә, «әссаламуәләйкум» диний радикаллиққа пакит қилинған

Мухбиримиз шөһрәт һошур
2020-10-02
Share
Ablikim-kelkun.jpg Көп қирлиқ сәнәткар абликим кәлкүн әпәнди.
Social Media

Вәзийәттин хәвәрдар бир киши 18 йиллиқ кесиветилгән сәнәткар абликим кәлкүнниң «бөлгүнчилик», «диний радикаллиқ» вә «дөләт маарипини кәмситиш» қатарлиқ 10дин артуқ аталмиш җинайәт билән әйибләнгәнликини илгири сүргәниди. Мухбиримизниң ениқлашлири давамида абликим кәлкүнниң «қериндашлар» намлиқ нахшисиниң бөлгүнчиликкә, «әссаламуәләйкум» намлиқ нахшисиниң болса диний радикаллиққа пакит қилинғанлиқи дәлилләнди.

Һөрмәтлик радио аңлиғучилар, биз абликим кәлкүнниң 18 йиллиқ кесиветилгәнлики дәлилләнгәндин кейин, униң кеслишигә баһанә қилинған аталмиш җинайәтлири үстидиму ениқлаш елип бардуқ. Үрүмчидики бир асаси қатлам сот хадими абликим кәлкүн делосиниң алаһидә дело икәнликини әскәртип өзиниң бу делодин хәвәрсизликини ейтти. Вәзийәттин хәвәрдар киши радийомизға йоллиған учурида, абликим кәлкүнгә бөлгүнчилик, диний радикаллиқ, дөләт маарипини көзгә илмаслиқ, миллий қутратқулуқ, қара тизимликтики дөләтни зиярәт қилиш, нуқтилиқ кишиләр билән мунасивәт қилиш вә җәмийәт тәртипини қалаймиқан қилиш қатарлиқ 10 дин артуқ аталмиш җинайәтләрниң артилғанлиқи илгири сүрүлгән.

Атуш сүнтағдики бир әдлийә хадими, абликим кәлкүнниң кимлики вә делосидин хәвәрсизликини баян қилди.

Инкас қилинишичә, абликим кәлкүн уйғур елидики мәшһур диний затлардин лагерда җан үзгән муһәммәд салиһ дамаоллам билән йеқин мунасивити вә пикирдашлиқи болған; буму униңға хәтәрлик кишиләр билән мунасивәт қилиш намидики аталмиш җинайәткә пакит қилинған.

Тор архиплирида көрситилишичә, абликим кәлкүн 2015 ‏-йили үрүмчидә өткүзгән нахша кечиликидә алим муһәммәд салиһ дамолламға доппа тәқдим қилған вә өзиниң әлсөйәр диний өлималарға болған иззәт-һөрмитини ипадилигән.

Инкаслардин мәлум болушичә, абликим кәлкүн иҗтимаий мәсулийитини толуқ тонуған бир сәнәткар болуш билән бирликтә, аилидики мәсулийитиниму толуқ ада қилип кәлгән бир ата болуп, у икки пәрзәнтини әтраплиқ тәрбийәләш үчүн түркийәгә оқушқа әвәткән вә оқушиниң нәтиҗилирини көзитип туруш үчүн тутулуштин аввалқи икки йилда түркийәгә берип келип турған. Униң бу қилғанлири болса дөләт маарипини көзгә илмаслиқ вә хәтәрлик дөләтләрни зиярәт қилиштин ибарәт аталмиш җинайәтләргә пакит қилинған. Йәнә инкаста дейилишичә, абликим кәлкүнниң нахша кечиликигә көп санда кишиләрниң қатнишиши вә һаяҗанлиқ алқиш яңритиши җәмийәт тәртипини қалаймиқанлаштуруш дәп қаралған.

Атуштики бир сақчи хадими абликим кәлкүнниң нөвәттә қәйәрдә җаза муддитини өтәватқанлиқи вә кесилиш сәвәби һәққидики соалимизға җаваб берәлмиди.

Ахирида телефонимизни қобул қилған үрүмчидики мәлум бир сот хадими, абликим кәлкүн үстидики сотта, униң «әссаламуәләйкум» намлиқ нахшисиниң «диний радикаллиқ» қа, «қериндашлар» намлиқ нахшисиниң болса миллий бөлгүнчиликкә пакит қилинғанлиқини дәлиллиди.

Тор архиплиридики оқурмәнләрниң инкаслирида баян қилинишичә, абликим кәлкүн сәнәт номурлирида миллий бирлик вә инақлиқни күчлүк тәшәббус қилған; сиясий җәһәттә һәқ-адаләтни яқлашни, мәдәнийәт җәһәттә йилтизиға садиқ болуш йәни әҗдадлар изида меңишни тәшәббус қилған; яшларға иман-етиқадлиқ болушни җәмийәткә ярамлиқ болушниң муһим шәрти сүпитидә тәвсийә қилған. «Мисраним» тор бетидики бир инкаста, абликим кәлкүн қатарлиқ сәнәткарлар һәққидә «улар җайнамазда имани, әл алдида виҗдани, йүрикидә пиғани, сәп алдида мәйдани бар әркәк сәнәткарлардин иди» дәп баһа берилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.