Ablikim kelkünning naxshiliridin "Qérindashlar" bölgünchilikke, "Essalamu'eleykum" diniy radikalliqqa pakit qilin'ghan

Muxbirimiz shöhret hoshur
2020-10-02
Share
Ablikim-kelkun.jpg Köp qirliq sen'etkar ablikim kelkün ependi.
Social Media

Weziyettin xewerdar bir kishi 18 yilliq késiwétilgen sen'etkar ablikim kelkünning "Bölgünchilik", "Diniy radikalliq" we "Dölet ma'aripini kemsitish" qatarliq 10din artuq atalmish jinayet bilen eyiblen'genlikini ilgiri sürgenidi. Muxbirimizning éniqlashliri dawamida ablikim kelkünning "Qérindashlar" namliq naxshisining bölgünchilikke, "Essalamu'eleykum" namliq naxshisining bolsa diniy radikalliqqa pakit qilin'ghanliqi delillendi.

Hörmetlik radi'o anglighuchilar, biz ablikim kelkünning 18 yilliq késiwétilgenliki delillen'gendin kéyin, uning késlishige bahane qilin'ghan atalmish jinayetliri üstidimu éniqlash élip barduq. Ürümchidiki bir asasi qatlam sot xadimi ablikim kelkün délosining alahide délo ikenlikini eskertip özining bu délodin xewersizlikini éytti. Weziyettin xewerdar kishi radiyomizgha yollighan uchurida, ablikim kelkün'ge bölgünchilik, diniy radikalliq, dölet ma'aripini közge ilmasliq, milliy qutratquluq, qara tizimliktiki döletni ziyaret qilish, nuqtiliq kishiler bilen munasiwet qilish we jem'iyet tertipini qalaymiqan qilish qatarliq 10 din artuq atalmish jinayetlerning artilghanliqi ilgiri sürülgen.

Atush süntaghdiki bir edliye xadimi, ablikim kelkünning kimliki we délosidin xewersizlikini bayan qildi.

Inkas qilinishiche, ablikim kelkün Uyghur élidiki meshhur diniy zatlardin lagérda jan üzgen muhemmed salih dama'ollam bilen yéqin munasiwiti we pikirdashliqi bolghan؛ bumu uninggha xeterlik kishiler bilen munasiwet qilish namidiki atalmish jinayetke pakit qilin'ghan.

Tor arxiplirida körsitilishiche, ablikim kelkün 2015 ‏-yili ürümchide ötküzgen naxsha kéchilikide alim muhemmed salih damollamgha doppa teqdim qilghan we özining elsöyer diniy ölimalargha bolghan izzet-hörmitini ipadiligen.

Inkaslardin melum bolushiche, ablikim kelkün ijtima'iy mes'uliyitini toluq tonughan bir sen'etkar bolush bilen birlikte, a'ilidiki mes'uliyitinimu toluq ada qilip kelgen bir ata bolup, u ikki perzentini etrapliq terbiyelesh üchün türkiyege oqushqa ewetken we oqushining netijilirini közitip turush üchün tutulushtin awwalqi ikki yilda türkiyege bérip kélip turghan. Uning bu qilghanliri bolsa dölet ma'aripini közge ilmasliq we xeterlik döletlerni ziyaret qilishtin ibaret atalmish jinayetlerge pakit qilin'ghan. Yene inkasta déyilishiche, ablikim kelkünning naxsha kéchilikige köp sanda kishilerning qatnishishi we hayajanliq alqish yangritishi jem'iyet tertipini qalaymiqanlashturush dep qaralghan.

Atushtiki bir saqchi xadimi ablikim kelkünning nöwette qeyerde jaza mudditini ötewatqanliqi we késilish sewebi heqqidiki so'alimizgha jawab bérelmidi.

Axirida téléfonimizni qobul qilghan ürümchidiki melum bir sot xadimi, ablikim kelkün üstidiki sotta, uning "Essalamu'eleykum" namliq naxshisining "Diniy radikalliq" qa, "Qérindashlar" namliq naxshisining bolsa milliy bölgünchilikke pakit qilin'ghanliqini delillidi.

Tor arxipliridiki oqurmenlerning inkaslirida bayan qilinishiche, ablikim kelkün sen'et nomurlirida milliy birlik we inaqliqni küchlük teshebbus qilghan؛ siyasiy jehette heq-adaletni yaqlashni, medeniyet jehette yiltizigha sadiq bolush yeni ejdadlar izida méngishni teshebbus qilghan؛ yashlargha iman-étiqadliq bolushni jem'iyetke yaramliq bolushning muhim sherti süpitide tewsiye qilghan. "Misranim" tor bétidiki bir inkasta, ablikim kelkün qatarliq sen'etkarlar heqqide "Ular jaynamazda imani, el aldida wijdani, yürikide pighani, sep aldida meydani bar erkek sen'etkarlardin idi" dep baha bérilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.