Xotende diniy ölima abdure'up hajim türmide hayatidin ayrilghan

Ixtiyariy muxbirimiz arslan
2021-02-16
Share
Xotende diniy ölima abdure'up hajim türmide hayatidin ayrilghan Xotende türmide hayatidin ayrilghan diniy ölima abdure'up hajim (ongda) merhum dadisi abdul'ehed barat mexsum hajim bilen birge.
Social Media

Yéqinda xitay türmisige qamalghan abdure'up hajim isimlik xotenlik bir dini ölimaning türmide hayatidin ayrilghanliqi melum boldi. Merhum diniy ölimaning hazir istanbulda yashawatqan yéqin sepdishi abdul'eziz xelpet hajimning bildürüshiche, abdure'up hajim 2021 ‏-yili 2 ‏-ayning 12 ‏-küni xotendiki türmide wapat bolghan, biraq merhumning di'abit késili bar bolup, u bu késellik sewebidin wapat boldimu yaki türme azabliri yaki qiynashlarda öldimu? buni éniq bilmeydiken. Emma u türmide hayatidin ayrilghaniken.

Biz xoten'ge we uning a'ilisige téléfon qilip ehwalni éniqlashqa tirishqan bolsaqmu téléfon alaqilirining bolmighanliqi we qiyinliqi tüpeylidin buni sürüshke imkan bolmidi.

Abdul'eziz xelpet hajimning bildürüshiche merhum, 2017 ‏-yili 2-ayning 20-küni xoten shehiridiki öyidin tutqun qilinip, öyide dini kitab saqlighan dégendek jinayetler bilen 10 yilliq qamaq jazasigha höküm qilin'ghan. Saqchilar uning öyini axturup öyidin birqisim kitablarni tapqaniken.

Abdul'eziz xelpet hajim, merhumning 10 yilliq qamaq jazasigha höküm qilin'ghandin kéyin sanji türmisige qamalghanliqini, buningdin 3-4 ay ilgiri xotendiki türmige yötkep kélin'genlikidin xewer tapqanliqini bildürdi.

Merhum abdure'up hajim, 2017 ‏-yili noyabirda xitay türmiside wapat bolghan ataqliq dini alim abdul'ehed mexsum hajimning oghli bolup, u dadisidin diniy terbiye alghan we xoten shehiride balilargha diniy terbiye we exlaq terbiyesi bérish bilen jama'et arisida hörmetke sazawer bolghan. Xitay hökümiti mundaq balilargha diniy terbiye bérishni chekligenliki üchün u öyide mexpiy halda dini telim-terbiye xizmiti bilen shughullan'ghan.

Istanbuldiki sherqiy türkistan ölimalar birliki teripidin abdure'up hajim heqqide teziyename élan qilin'ghan bolup, teziyenamide mundaq déyilgen: "Abdur'uf hajimning zalim xitay türmiside shéhit qilin'ghanliq xewirini 2021 ‏-yili 2 ‏-ayning 12 ‏-küni jüme intayin qayghu ichide tapshurup alduq. Merhum ustaz abdure'up hajim ömrini oqu-oqutush we telim-terbiye ishliri üchün atighan qeyser we pidakar ustazlardin biri bolup, xitay hakimiyiti teripidin 1993-yilidin buyan xotenning sirtigha chiqishi cheklen'gen. U 2015‏-yili tutqun qilinip 6 aydin kéyin qoyup bérilgen. 2017 ‏-Yili qayta tutqun qilinip öyide dini kitab saqlighanliqi üchün 10 yilliq qamaq jazasigha höküm qilin'ghan. Merhum ustaz 63 yéshida türmide shéhit qilinip méyiti a'ilisige bérilgen bolsimu jinaza namizi oqulup depne qilinishtin mehrum qélin'ghan. Merhum ustaz abdure'up hajimning wapati Uyghur xelqi üchün chong bir yoqitish bolup, allahtin merhumgha rehmet-meghpiret tilesh bilen birge firdews jennetke na'il qilishini tileymiz".

Sherqiy türkistan ölimalar birlikining uyushturushi bilen 2 ‏-ayning 15 ‏-küni merhum abdure'uf hajim üchün istanbulda ghayibane jinaza namizi oquldi. Ghayibane jinaza namizigha istanbuldiki Uyghurlardin 300 din artuq kishi qatnashti. Ghayibane jinaza namizida merhumning yéqin dosti we sepdishi abdul'eziz xelpet hajim söz qilip merhumning hayat ish-izlirini tonushturup ötti.

Abdul'eziz xelpet hajimning bildürüshiche, merhum abdure'up hajim Uyghur yashlirigha dini jehettin mexpiy halda telim-terbiye bérish xizmiti bilen shughullan'ghan we bu jeryanida ilgiri bir qanche qétim tutqun qilin'ghaniken.

Merhumning ghayibane jinaza namizida yene türkiyediki meshhur dewetchi we dini ölima muhemmed imin yildirim söz qilip, zalim bir hakimiyet sewebidin Uyghurlarning arqa – arqidin hayatidin ayriliwatqanliqi, sansizlighan ademlerning lagér-türmilerde azab-oqubet tartiwatqanliqi, emma zulumning héch qachan ebediy dawam qilmaydighanliqini bildürdi.

Merhum abdure'up hajimning ghayibane jinaza namizini oqush jeryanida yene lagérda qaza qilghanliqi xewiri kelgen 4 neper Uyghurningmu ghayibane namizi chüshürüldi.

Muhemmed yildirim bu heqte ijtima'iy taratqularda qisqiche bir bayanat élan qilghan bolup bayanatta mundaq déyilgen: "Ötken hepte xotendiki türmide shahadet sherbiti ichken dini alim abdure'up abdul'ehed üchün sefaköy fatih jameside ghayibane jinaza namizi oquduq. U jeryanida yene shéhit bolghanliq xewiri kelgen 4 neper kishining ghayibane jinaza namizi oquldi. Dunyaning köz aldida bir millet yoq boluwatidu we bizler peqetla filim körüwatqandek turuwatimiz".

Merhum abdure'up hajim heqqide ijtima'iy taratqularda türlük inkaslar élan qilindi. Igilinishiche merhumning dadisi we chong dadisimu diniy ölimalardin bolup, ularmu oxshashla xitay türmiside hayatidin ayrilghaniken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet