Yazghuchi xalide isra'ilning "Altun kesh" romani "Mesile eng éghir kitab" dep békitilgen

Muxbirimiz shöhret hoshur
2019-04-19
Élxet
Pikir
Share
Print
Öyide nezerbend astida tutup turuluwatqan yazghuchi xalide isra'il xanim.
Öyide nezerbend astida tutup turuluwatqan yazghuchi xalide isra'il xanim.
Social Media

Ashkarilinishiche, xitay da'iriliri ötken yili élip barghan "Mesililik kitablarni tekshürüsh" herikitide yazghuchi xalide isra'ilning "Altun kesh" namliq romani "Mesile eng éghir kitab" dep békitilgen. Ürümchidiki alaqidar xadimlar xalide isra'ilning nediliki we nöwettiki ehwali heqqide melumat bérelmidi. Emma ehwaldin xewerdar kishiler xalide isra'ilning salametlik ehwali seweblik, yeni chaqliq orunduqta olturup qalghanliqi üchün öyide nezerbend astigha élin'ghanliqini ashkarilidi.

Hörmetlik radi'o anglighuchilar, ötken yilidiki éniqlashlirimiz dawamida qeshqer Uyghur neshriyatining tehriri, sha'ire chimen'gül awut yazghuchi xalide isra'ilning "Altun kesh" namliq romanini tehrirligenliki üchün tutqun qilin'ghanliqi ashkarilan'ghan idi. Biz shuningdin kéyin "Altun kesh" romanining aptori yazghuchi xalide isra'ilning teqdiri heqqide bir qatar éniqlashlarni élip barduq. Ilgiri "Qumluqning chüshi", "Timtas sheher", "Rengdar quyun", "Kechmish" qatarliq eserliri bilen dangq chiqarghan yazghuchi xalide isra'il bir mehel shinjang yazghuchilar jem'iyitining mu'awin re'isi bolghan. Mezkur jem'iyet özining sabiq re'isining nöwettiki ehwali heqqide héchqandaq melumat bérelmidi. 1952‏-Yili qeshqerde tughulghan xalide isra'il 1975‏-yili béyjingdiki merkiziy milletler uniwérsitétini püttürgendin kéyin taki dem élishqa chiqquche bolghan ariliqta "Shinjang géziti" de muherrir bolup xizmet qilghan. "Shinjang géziti" ning alaqidar xadimlirimu xalide isra'ilning nöwettiki ehwali heqqide melumat bérelmidi.


2016‏-Yili ishlen'gen shinjang téléwiziyesining "Medeniyet bostani" programmisida bayan qilinishiche, yazghuchi xalide isra'il mezkur romanini ikki puti sunup chaqliq orunduqta olturup qalghan mezgilde yazghan. "Shinjang géziti" ning xadimi xalide isra'ilning salametlik ehwalining bir qeder yaxshi ikenlikini bayan qildi, emma uning tutqunda yaki emesliki heqqidiki so'alimizgha jawab bermidi. Jem'iyettin élip barghan éniqlashlirimiz dawamida ehwaldin xewerdar bezi kishiler xalide isra'ilning nöwette öyide dawaliniwatqanliqini bayan qilsa, yene beziler salametliki yar bermigenliki seweblik saqchilarning uni lagérgha yaki qamaqxanigha apirishqa charisiz qalghanliqi, xalide isra'ilning öz öyide soraq qilin'ghanliqi we hazir nezerbend astida ikenlikini bildürdi.

"Medeniyet bostani" téléwiziye söhbet programmisidin melum bolushiche, sha'ire chimen'gül awut we aliy muherrir qurban mamutlar teripidin tehrirlen'gen "Altun kesh" romani 2016‏-yili neshr qilin'ghandin kéyin "Yawro‏-asiya kitab körgezmisi" ge qoyulghan we yüksek bahagha érishken. Qeshqerge qarita élip barghan yéqinqi éniqlashlirimiz dawamida alaqidar siyasiy-qanun xadimliri "Altun kesh" romanining qeshqer Uyghur neshriyatidin "Mesililik kitablar" dep békitilgen 600 nechche parche kitab ichide "Mesile eng éghir kitab" dep békitilgenlikini ashkarilidi. Emma xadimlar mezkur kitabta konkrét qandaq bir "Mesile" tépilghanliqi heqqide melumat bermidi.

Melum bolushiche, qeshqer Uyghur neshriyatigha Uyghur aptonom rayondin kelgen tekshürüsh guruppisi "Mesililik kitab" dep békitilgen kitablardiki "Mesililer" nimu jem'iyettin sir tutqan. "Medeniyet bostani" diki bahalighuchilar "Altun kesh" romanigha "Üch ewlad kishilerning telpünüshlirini mahirliq bilen eks ettürgen nadir eser" dep baha bergen. Yazghuchi xalide isra'il bolsa "Uyghur edebiyatigha öchmes töhpe qoshqan, yéngi dewr edebiyatida pexirlik orni bolghan ataqliq yazghuchi" dep teriplen'gen.

Bezi közetküchiler nöwette Uyghur rayonida bir qisim kitablardin "Mesile" tépilishta shu kitablardiki bedi'iy qimmettin bashqa shu kitab yazghuchilirining jem'iyettiki izzet-hörmitiningmu bir seweb bolup qéliwatqanliqini, yeni yazghuchi jem'iyette qanche söyülse, da'iriler teripidin shunche teqib astigha éliniwatqanliqini ilgiri sürüshmekte. 

Yazghuchi xalide isra'il bilen bir ishxanida xizmet qilghan, nöwette amérikada yashawatqan jür'et nizamidin ependi sabiq xizmetdishining bir qisim xisletliri heqqide toxtilip ötti.

Toluq bet