Америка таможна вә чегра қоғдаш идариси мусадирә қилған 13 тонна чач мәһсулати һәққидә соаллиримизға җаваб бәрди (1)

Мухбиримиз гүлчеһрә
2020-07-08
Елхәт
Пикир
Share
Принт
Уйғур районидики хитай лагер тутқунлириниң чачлири вә яки лагердикиләрни мәҗбурий әмгәккә селиш арқилиқ ишләп чиқирилған ялған чач. 2020-Йили 1-июл, ню-йорк.
Уйғур районидики хитай лагер тутқунлириниң чачлири вә яки лагердикиләрни мәҗбурий әмгәккә селиш арқилиқ ишләп чиқирилған ялған чач. 2020-Йили 1-июл, ню-йорк.
AP

Америка һөкүмити мусадирә қилған 13 тонна чач мәһсулати үстидин DNA тәкшүрүшигә иҗазәт бәрмәкчи

Уйғур дияридики лагер мәһбусларниң чачлири мәҗбурий кесилип, хитай чач мәһсулатлири завутлириниң тәйяр хам әшяси болуватқанлиқи һәққидә көплигән мәлуматлар оттуриға чиқиватқан бир пәйттә өткән һәптә, йәни 1-июл күни ню-йорк штатлиқ таможна вә чегра қоғдаш идариси хитайдин кәлгән 13 тонна, 800миң доллар қиммитидики чач мәһсулатлирини мусадирә қилған иди. Радийомиз америка таможна вә чегра қоғдаш идарисиниң бу чач мәһсулатлирини қандақ бир тәрәп қилмақчи болуватқанлиқи һәққидә ениқ җаваб елиш үчүн бу һәқтә ениқлаш елип барди. Мәзкур органниң иҗраийә ярдәмчи комиссари бренда симс мухбиримиз гүлчеһрәниң соаллириға тәпсилий җаваб бәрди.

Соал: америка таможна вә чегра қоғдаш идариси мусадирә қилған бу 13 тонна чачтин ясалған буюмларни қандақ бир тәрәп қилмақчи, кейинки қәдәм немә?

Җаваб: бу чач мәһсулатлириниң америкаға киргинидә тутуп қелиниши, америка таможна вә чегра қоғдаш идариси июнда тарқатқан иҗра қилиш һәрикитиниң нәтиҗиси һесаблиниду. Бу «тутуп қелиш, қоюп бериш буйруқи» дәп атилидиған болуп, 17-июн чиқирилған.

Мәзкур буйруқта асасән бу буйруқта шәрһләнгән алаһидиликләргә чүшидиған һәрқандақ йүкләрни тутуп қелиш тәләп қилинған. Бу биз тилға еливатқан йүкләр неварк портиға кәлгәндә, биз уни тохтаттуқ вә униңдики малларғила әмәс, бәлки бу йүкләр йетип келиштин илгири бизгә йолланған йүк һәққидики материялларға қарап чиқтуқ. Биз униң «тутуп туруш, қоюп бериш буйруқи» да тәсвирләнгән алаһидиликләргә чүшидиғанлиқини байқиғандин кейин, уни тутуп туруш астиға алдуқ. Бу әһвалда, биз әмди бу мәһсулатлар үстидин лабораторийилик тәкшүрүшләрни өз ичигә алған тәкшүрүшләрни елип баримиз. Шуниң билән бир вақитта, бу мәһсулатларни импорт қилғучиға мәзкур мәһсулатларниң мәҗбурий әмгәк билән четишлиқи йоқлуқини испатлиши үчүн 90 күн мөһләт беримиз. Әгәр улар 90 күнлүк мөһләттә йетәрлик материялларни тапшурмиса, биз бу малларни мусадирә қилип, уларни көйдүрүветимиз.

Соал: хитайниң 30 дин артуқ чач мәһсулатлири шикәтлириниң-2017 йилидин буян уйғур дияриға көчүп киргәнлики мәлум, бу қетим силәр мусадирә қилған чач мәһсулатлириниң марка намлири һәққидә учур билән тәмин етәләмсиз?

Җаваб: һазир бу мусадирә буюмлириниң маркилирини ашкарлиялмаймән. Әмма бу һәқтә «тутуп қелиш, қоюп бериш» буйруқида көрситилгинидәк, бу буюмларниң әсли ишләпчиқарғучисиниң «мейшин» ширкити икәнлики һәққидә чәклик учур билән тәмин етәләймән. Бу һәқтә бизниң тор бетимиздин йәниму тәпсилий мәлуматларға игә болалайсиз.

Соал: сиз бу чач мәһсулатлар үстидин йәниму илгирилигән һалда лабораторийәлик тәкшүрүши елип берилидиғанлиқини тәкитләп өттиңиз, ундақта, мусадирә қилинған чач мәһсулатлириға DNA тәкшүрүши елип берип, уларниң уйғурларға тәвә икәнликини җәзмләштүргили боламду?

Җаваб: бизму шуниңға ишинимиз. Һазирқи қәдәм басқучлириниң бири, бу чачларниң сүний талалиқ чач яки адәм чечидин ясалғанлиқини айрип чиқиш. Америка таможна вә чегра қоғдаш идариси буни рояпқа чиқириш үчүн сирттики мәхсус тәкшүрүш органлири билән һәмкарлишиши керәк. Әмма, DNA ниң қайси етник гуруппиға тәвә икәнликини тәкшүрәләйдиған яки тәкшүрәлмәйдиғанлимиз һәққидә ениқ бир нәрсә дейәлмәймән.

‏Соал: ундақта, бу хил DNA тәҗрибиси елип баралайдиған мутәхәссисләр яки кишилик һоқуқ органлириниң бу чач мәһсулатлири үстидин тәкшүрүш елип беришиға иҗазәт берәмсиләр?

Җаваб: буни тәкшүридиған кишилик һоқуқ органлири әмәс, бәлки бу хилдики тәкшүрүш салаһийити берилгән лабораторийәләр болуши керәк.

Мөһтәрәм радий аңлиғучилар, америка дөләт хәвпсизлики комитетиниң баянатчиси җон уллийот өткән һәптә ахбаратларға әгәр бу 13 тонна чач мәһсулати растинила бир милйондин артуқ уйғур тутқун қамалған җаза лагерлириға мунасивәтлик болуп қалса, бу хитай компартийәсиниң райондики бастуруш сияситиниң чәктин ашқанлиқини көрситидиғанлиқини билдүргән иди. У сөзидә йәнә хитайниң бу мәсилидә дуня җамаәтчиликигә җаваб бериши керәкликини тәкитлигән. Америка таможна вә чегра қоғдш идарисиниң иҗраийә ярдәмчи комиссари бренда симисниң җаваблиридин хотәндин америкиға киргүзүлгән «мейшин» чач мәһсулатлири үстидин DNA тәкшүрүши елип берилидиғанлиқи җәзимләшти.

Америка таможна вә чегра қоғдаш идариси хадимлиридин енқлишимизға қариғанда, лабораторийәлик тәкшүрүш вә DNA нәтсиҗигә еришиш үчүн бир қанчә һәптә вақит кетидикән.

Бренда симис билән өткүзгән мәхсус сөһбәт хатирисиниң давамини кейинки программимизда диққитиңларға сунимиз.

Пикирләр (0)
Share
Толуқ бәт