Amérika xitay bilen munasiwetlik üch kishi üstidin tutush buyruqi chiqardi

Muxbirimiz jüme
2020.06.28
Micron-IP-Theft.png Xitay bilen munasiwetlik üch kishi amérikining mikron téxnologiye hessidarliq shirkiti (Micron Technology) ning kompyutér ichki saqlighuch yasash mexpiyiti oghrilighan.
phonearena.com

Amérika da'iriliri amérikidiki bir yuqiri pen-téxnika shirkitining soda mexpiyetlikini oghrilap ketken xitay hökümiti igidarchiliqidiki bir kompyutér öziki yasash shirkitining sabiq diréktori qatarliq üch kishi üstidin tutush buyruqi chiqardi.

Melum bolushiche, xitay dölet igidarliqidiki fujyen jinxu'a birleshme özek taxtisi hessidarliq shirkitining sabiq diréktori chén jéngkün, teywen birleshken mikro éléktron guruhi (UMC) ning inzhénéri wang yungming we xé jyenting qatarliq bu ücheylen amérikining mikron téxnologiye hessidarliq shirkiti (Micron Technology) ning kompyutér ichki saqlighuch yashash mexpiyiti oghrilighan.

Amérika edliye ministirliqi bularni 2018-yili soda jasusluqi bilen shughullinish jinayiti bilen jazagha tartqan.

Bu ücheylenning hemmisi teywen puqrasi bolup teywende yashawatqan bolghachqa, eyni waqitta ularni amérikigha ekélip sotqa tartish mumkin bolmighan.

Uning üstige, amérika hökümitining bular üstidin tutush buyruqi chiqirish telipi hazirghiche keynige sürüp kélin'gen.

Charshenbe küni san fransiskoda mezkurlar ustidin échilghan sotta sotchi amérika hökümet eyibligüchisining bular üstidin tutush buyruqi chiqirish telipini testiqlighan.

Amérika edliye ministirliqining eyni chaghdiki eyibnamisige qarighanda, teywen'ge jaylashqan MMT namliq kompyutér özeklirini yasash shirkiti amérikaning mikron téxnologiye hessidarliq shirkiti teminligen layihe boyiche bu shirketning dinamikiliq ichki saqlighuchlirini yasash bilen shughullinidiken.

MMT 2013-Yili, chén jéngkünning bashqurushidiki bir éléktron shirkitini ötküzüwalghan. Chén MMT de 2015-yili iyulda tuyuqsiz istépa bergen'ge qeder ishligen we uzun ötmey UMC (birleshken mikro éléktron guruhi) gha ishqa chüshken.

U MMT din chiqip kétish aldida bu shirkettiki inzhénér wang yungming bilen shérikliship amérika mikron shirkitining 900 artuq ichki saqlighuch yasash mexpiyetlikini oghrilap élip chiqip ketken.

U, bu shirkettiki waqtida xitay hökümiti meblegh sélip 2016-yili qurup chiqqan fujyen jinxu'a birleshme özek taxtisi hessidarliq shirkiti bilen hemkarliq ornatqan. Kélishim boyiche UMC (birleshken mikro éléktron guruhi) öz ilikidiki dinamikiliq ichi saqlighuch yasash téxnikisini fujyen jinxu'a birleshme özek taxtisi hessidarliq shirkitige ötküzüp bergen.

Kéyin chén jéngkün fujyen jinxu'a birleshme özek taxtisi hessidarliq shirkitige diréktor bolghan.

Ikki hepte ilgiri teywen yerlik soti bular üstün sot échip ularni jinayi jawabkarliqqa tartqan we ularning amérika téxnikisini oghrilap xitay hökümet igidarliqidiki bir shirketke ötküzüp bergenlikini delilligen we bulargha 4. 5 Yildin 6. 5 Yilghiche muddetlik qamaq jazasi bergen.

Halbuki, amérikining xitay yaki teywen arisida jinayetchilerni ötküzüp bérish kélishimi bolmighachqa bu jawabkarlarni amérikigha ekirip jazagha tartish ishi hazirche mumkin emes iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.