Майкол микол: "америка хәлқи хитай компартийәсиниң маһийитини көрүп йәтти"

Мухбиримиз җәвлан
2021-03-24
Share
Майкол микол: Худсон институтиниң тәтқиқатчилиридин ерик брвон (Eric Brown) билән нури түркәл әпәнди америка авам палатаси ташқи ишлар комитетиниң җумһурийәтчиләрдин болған рәиси майкол микол (Michael McCaul) билән хитай тәһдити тоғрулуқ тор сөһбити өткүзди. 2921-Йили 12-март.
Xudson Instituti

Йеқинда худсон институтиниң тәтқиқатчилиридин ерик брвон (Eric Brown) билән нури түркәл әпәнди америка авам палатаси ташқий ишлар комитетиниң җумһурийәтчиләрдин болған рәиси майкол микол (Michael McCaul)билән хитай тәһдити тоғрулуқ тор сөһбити өткүзгән.

Бу сөһбәттин илгири, йәни 10-март күни, майкол микол америка авам палатаси ташқий ишлар комитетниң америка дөләт ишлири министири антони билинкен билән өткүзгән испат аңлаш йиғинида, байдин һөкүмитиниң муһим ташқий сиясити тоғрулуқ пикир баян қилғаниди.

У сөзидә алди билән хитай мәсилисини тилға елип, хитайниң корона вирусини пәйда қилиш вә дуняға тарқитишта баш җинайәтчи икәнликини, өз хәлқи вә дуня хәлқи үчүнму апәт пәйда қилғанлиқини, әмма хитайниң американи апәтниң мәнбәси дәп қарайдиғанлиқини, шуңа хитайни һәргиз нормал рәқиб дәп қариғили болмайдиғанлиқини оттуриға қойған. У мундақ дегән: "мән аляскада өткүзидиған сөһбитиңларниң оңушлуқ болушини тиләймән. Биз 40 йилдин бери хитай билән идеологийәлик күрәш қилип кәлдуқ, мустәбитликкә қарши демократийәни, бастурушқа қарши әркинликни тәшәббус қилдуқ. Хитай компартийәсиниң маһийитигә сәл қарап, уни хәлқара җәмийәткә елип киришкә тириштуқ, әмма униң қилчә үнүми болмиди. Антони билинкен әпәнди, сиз сөзиңиздә хитайниң иқтисад, дипломатийә, һәрбий вә техника җәһәттин күчлүк һәмдә хәлқара системиға тәһдит елип келиватқан бирдинбир дөләт икәнликини ейттиңиз, бу пикриңизгә қошулимән. Мән сиз билән бирликтә хитайға тақабил турушқа һәр вақит тәйярмән".

Худсон институтиниң тәтқиқатчилиридин ерик брвон (Eric Brown) билән нури түркәл әпәнди америка авам палатаси ташқи ишлар комитетиниң җумһурийәтчиләрдин болған рәиси майкол микол (Michael McCaul) билән хитай тәһдити тоғрулуқ тор сөһбити өткүзди. 2921-Йили 12-март.

Худсон институти уюштурған тор сөһбитидә авам палата әзаси майкол микол мәзкур институтниң тәтқиқатчилиридин ерик брвон (Eric Brown) вә нури түркәл әпәндиниң американиң кәлгүсидә хитайниң тәһдитигә қарши қандақ тәдбир қоллинидиғанлиқи һәққидә сориған соаллириға җаваб бәргән.

У бәзи таратқуларниң хитайниң җинайитини "ирқий қирғинчилиқ" дегили болмайду дегән тәшвиқатиға қарита қандақ пикри барлиқи һәққидә соралған соалға җаваб берип, мундақ дегән: "улар пүтүнләй хаталашти, улар әгәр азрақ вақит чиқирип, хитай өзи имза қойған ‹ирқий қирғинчилиқниң алдини елиш вә уни чәкләш әһдинамиси' ни оқуп баққан болса, хитай компартийәсиниң һәрикити вә ғәризиниң ирқий қирғинчилиққа охшаш җинайәт икәнликини тонуған болатти. Хитайниң уйғур вә башқа милләтләрни җисманий вә роһий җәһәттин қийниши, өлтүрүши, қул қилип ишлитиши, туғутни чәклиши, балиларни йетимханиларға солиши қатарлиқларниң һәммиси ирқий қирғинчилиққа кириду. Уйғурларниң пүткүл аһалиси, әвлади вә мәдәнийити вәйран қилинди. Қәйәрдин қарисиңиз булар дуня етирап қилған ‹ирқий қирғинчилиқ' тәбиригә чүшиду". У йәнә сөзидә америка ташқий ишлар министири антони билинкенға хитай өткүзгән җинайәтниң ирқий қирғинчилиқ икәнликини тәкитлигәнликини, җов байден һөкүмитиниң бу җинайәткә қарши ениқ чарә-тәдбир қоллинишини үмид қилидиғанлиқини билдүргән.

Нури түркәл әпәнди американиң уйғурларни бастурушқа һәмдәм болуватқан ширкәтләргә "магинестики қануни" арқилиқ чәклимә қойғандин кейин, әгәр буниң үнүми болмиса кейинки қәдәмдә немиләрни қилиши керәклики һәққидә сориғанда, майкол микол җаваб берип, бу җәһәттә техиму көп ишларни қилиш керәкликини, болупму ирқий қирғинчилиқ йүз бериватқан чағда бу мәсилини дуня сәһнисигә елип чиқип, бу җинайәткә четишлиқ техиму көп шәхс вә ширкәтләрни җазалаш керәкликини билдүргән.

Нури түркәл әпәнди йәнә йеңи дөләт мәҗлисиниң бу "ирқий қирғинчилиқ" мәсилисигә қандақ қарайдиғанлиқини, шундақла йеңи һөкүмәтниң сиясәт җәһәттин бу мәсилини қандақ һәл қилишини үмид қилидиғанлиқини сориғанда майкол микол җаваб берип мундақ деди: "кишилик һоқуқ мәсилиси дөләт мәҗлисидә партийә айримайдиған бир мәсилә, америка хәлқиниң авазиға вәкиллик қилидиған бу мәҗлис хитайға бу җинайәтни әсла қобул қилалмайдиғанлиқ сигналини һәр вақит бериду. Йеңи дөләт мәҗлисидә мән бу әһвални көп көримән дәп ойлаймән. Чүнки бу бизни бирликкә кәлтүридиған мәсилиләрдин бири".

Майкол микол йәнә хитайниң дөләт ичидин һалқиған назарәт-контрол системисиға қандақ тақабил туруш керәклики һәққидики соалға җаваб берип, хитайниң нәччә тирилйон доллар сәрп қилип, техникиси илғар назарәт-контрол дөлитигә айланғанлиқи вә дуняни өз алқинида тутуп турушқа урунуватқанлиқини, явропадики иттипақдашлири, африға вә латин америкаси дөләтлирини хуавейға охшаш хитай ширкәтлири билән һәмкарлашмаслиққа чақирип кәлгәнликини билдүргән.

Нури түркәл әпәнди 2022-йил бейҗиңда өткүзүлидиған қишлиқ олимпек мусабиқисини байқут қилишниң хитайдики кишилик һоқуқ дәпсәндичиликини тохтитишта қандақ әһмийити барлиқин сориғанда, майкол микол мундақ деди: "дуняға нәзәр салсақ, әң еғир кишилик һоқуқ дәпсәндичилики хитайда йүз бериватиду. Биз тәнһәрикәтчиләргә пурсәт бәрсәк дәймиз, чүнки улар җапалиқ мәшиқ қилди. Мән һәр қетим телевизорға чиқсам бу мусабиқини башқа җайға йөткәш тоғрулуқ тәклип берип келиватимән. Әгәр тәнһәрикәтчилиримиз у йәргә берип қалса һеч болмиса уларға бихәтәрлик тәрбийәси беримиз. Чүнки уларму хитайда тәқиб вә назарәт астида болиду".

Сөһбәт ахирида, тәтқиқатчи ерик бровин американиң кәлгүсидә хитай тәһдитигә тақабил туруш үчүн америка хәлқини қандақ қозғиталайдиғанлиқи вә бу җәһәттә немиләрни қилиш керәклики һәққидә сориғанда, майкол микол мундақ деди: "хитай компартийәси өзиниң пиланини ишқа ашуруш үчүн қолидин кәлгинини қилиду. Улар қурулғиниға 100 йил болған бу хатирә йилида дуняни иқтисад вә һәрбий җәһәттин контрол қилишни ойлайду. Әмма мәнчә, америка хәлқиму ойғанди. Әң йеңи хәлқ райини тәкшүрүштә, 80 пирсәнт америкалиқниң хитай компартийәсини яман көридиғанлиқи мәлум болди. Буни асасән корона вируси кәлтүрүп чиқарди, бу вирус америка хәлқиниң көзини ачти; америкилиқлар хитайниң уйғурларға зиянкәшлик қилиши болсун, кишилик һоқуқни дәпсәндә қилиши болсун яки әқли мүлүкни оғрилиши болсун, һәммисини көрүп йәтти. Хитайниң "бир бәлвағ бир йол" қурулуши адил риқабәткә хилап бир қилмиш. Очуқ ейтқанда, хитай һазир дуняға иқтисад вә һәрбий җәһәттин хоҗа болимән дәп хирис қиливатиду. Бу кейинки әвладлиримиз үчүн узун муддәтлик бир тәһдит. Мән соғуқ мунасивәтләр урушини көрүп чоң болдум, "11-синтәбир" радикал ислам террорлуқиға шаһид болдум. Мәнчә силәрму ойлап бақсаңлар болиду, хитай компартийәси дегән ашундақ нәрсә. Мән бу әвлатларға шуни дәймән, чүнки улар бу нуқтини чүшиниши керәк".

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт