Америка 33 хитай ширкити вә җәмийитини қара тизимликкә алди

Мухбиримиз җүмә
2020-05-24
Елхәт
Пикир
Share
Принт
Америка сода министирлиқи елан қилған хитайниң уйғур елидики кишилик һоқуқ дәпсәндичиликигә алақидар 9 ширкитини өз ичигә алған җәмий 33 хитай ширкити вә җәмийәтлирини қара тизимликкә алғанлиқи һәққидики баянат. 2020--Йили 22-май.
Америка сода министирлиқи елан қилған хитайниң уйғур елидики кишилик һоқуқ дәпсәндичиликигә алақидар 9 ширкитини өз ичигә алған җәмий 33 хитай ширкити вә җәмийәтлирини қара тизимликкә алғанлиқи һәққидики баянат. 2020--Йили 22-май.
commerce.gov

Америка һөкүмити хитайниң уйғур елидики кишилик һоқуқ дәпсәндичиликигә алақидар 9 ширкитини өз ичигә алған җәмий 33 хитай ширкити вә җәмийәтлирини қара тизимликкә алди.

Мәзкур қара тизимлик «америка муәссәсә тизимлики» дәпму атилидиған болуп, бу тизимликкә елинған ширкәтләр америкиниң юқири техникисини ишлитиш вә америка базарлириға мал киргүзүштә чәклимигә учрайдикән. 

Америка сода министирлиқи 22-май елан қилған баянатқа қариғанда, хитай җамаәт хәвпсизлик министирлиқи қармиқидики қанун дохтурлуқ тәтқиқат институтини өз ичигә алған 9 орун уйғур елидики кишилик һоқуқ дәпсәндичиликигә ширк болғанлиқи үчүн америка технологийәси сетип берилмәйдиған ширкәтләр қатариға киргүзүлгән. 

Баянатта мундақ дейилди: «бу тоққуз орган хитайниң шинҗаң уйғур аптоном районидики уйғурлар, етник қазақлар вә башқа аз санлиқ мусулман гуруппиларға қариши елип берилған бастуруш, зор көләмлик тутқун қилиш, мәҗбурий әмгәк вә юқири техникилиқ тәқибләш һәрикити җәрянида садир болған кишилик һоқуқ дәпсәндичиликигә шерик болди.»

Баянатта йәнә бу ширкәтләрниң 2019-йили өктәбирдә қара тизимликкә елинған 28 хитай муәссәсиси қатариға қошулидиғанлиқини көрситилди. 

Бу нөвәт қара тизимликкә елинған ширкәт вә органлар хитай җамаәт хәвпсизлик министирлиқиниң қанун дохтурлуқ тәтқиқат институти, ақсу хуафу тоқумичилиқи, CloudWalk технологийәси, FiberHome технологийә гуруһи, нәнҗиң FiberHome алақә тәрәққият ширкити, нәтпоса қатарлиқ 9 орун вә ширкәттин тәркиб тапқан. 

Униңдин башқа америка сода министирлиқи 22-май елан қилған қара тизимликкә хитайниң йәнә 24 ширкити киргүзүлгән.

Булар хитайниң һәрбий вә дөләт мудапиә санаитигә мунасивәтлик ширкәтләр икән. Бу ширкәтләр хитай қуруқлуқи, хоңкоң вә кәйман араллириға җайлашқан икән.

Униңдин башқа америка трамп һөкүмити 7-өктәбир бир қарар чиқирип, уйғур қатарлиқ милләтләрниң кишилик һоқуқ дәпсәндичиликигә четилған 28 хитай муәссәсисини қара тизимликкә киргүзгән.

Мәзкур қара тизимликкә хитайниң уйғур районидики һәр дәриҗилик җ х органлири, даңлиқ сүний әқил технологийә ширкәтлири қатарлиқлар киргүзүлгән болуп, буларниң америка мәһсулатлирини сетивелиши вә америкиға мәһсулат експорт қилиши пүтүнләй чәкләнгән.

Шуниң билән америка һөкүмити қара тизимликкә алған хитай муәссәсилири җәмий 60 қа йәтти.

Пикирләр (0)
Share
Толуқ бәт