Amérika 33 xitay shirkiti we jem'iyitini qara tizimlikke aldi

Muxbirimiz jüme
2020-05-24
Share
commerce-department-blacklist-20200524.png Amérika soda ministirliqi élan qilghan xitayning Uyghur élidiki kishilik hoquq depsendichilikige alaqidar 9 shirkitini öz ichige alghan jem'iy 33 xitay shirkiti we jem'iyetlirini qara tizimlikke alghanliqi heqqidiki bayanat. 2020--Yili 22-may.
commerce.gov

Amérika hökümiti xitayning Uyghur élidiki kishilik hoquq depsendichilikige alaqidar 9 shirkitini öz ichige alghan jem'iy 33 xitay shirkiti we jem'iyetlirini qara tizimlikke aldi.

Mezkur qara tizimlik "Amérika mu'essese tizimliki" depmu atilidighan bolup, bu tizimlikke élin'ghan shirketler amérikining yuqiri téxnikisini ishlitish we amérika bazarlirigha mal kirgüzüshte cheklimige uchraydiken. 

Amérika soda ministirliqi 22-may élan qilghan bayanatqa qarighanda, xitay jama'et xewpsizlik ministirliqi qarmiqidiki qanun doxturluq tetqiqat institutini öz ichige alghan 9 orun Uyghur élidiki kishilik hoquq depsendichilikige shirk bolghanliqi üchün amérika téxnologiyesi sétip bérilmeydighan shirketler qatarigha kirgüzülgen. 

Bayanatta mundaq déyildi: "Bu toqquz organ xitayning shinjang Uyghur aptonom rayonidiki Uyghurlar, étnik qazaqlar we bashqa az sanliq musulman guruppilargha qarishi élip bérilghan basturush, zor kölemlik tutqun qilish, mejburiy emgek we yuqiri téxnikiliq teqiblesh herikiti jeryanida sadir bolghan kishilik hoquq depsendichilikige shérik boldi."

Bayanatta yene bu shirketlerning 2019-yili öktebirde qara tizimlikke élin'ghan 28 xitay mu'essesisi qatarigha qoshulidighanliqini körsitildi. 

Bu nöwet qara tizimlikke élin'ghan shirket we organlar xitay jama'et xewpsizlik ministirliqining qanun doxturluq tetqiqat instituti, aqsu xu'afu toqumichiliqi, CloudWalk téxnologiyesi, FiberHome téxnologiye guruhi, nenjing FiberHome alaqe tereqqiyat shirkiti, netposa qatarliq 9 orun we shirkettin terkib tapqan. 

Uningdin bashqa amérika soda ministirliqi 22-may élan qilghan qara tizimlikke xitayning yene 24 shirkiti kirgüzülgen.

Bular xitayning herbiy we dölet mudapi'e sana'itige munasiwetlik shirketler iken. Bu shirketler xitay quruqluqi, xongkong we keyman arallirigha jaylashqan iken.

Uningdin bashqa amérika tramp hökümiti 7-öktebir bir qarar chiqirip, Uyghur qatarliq milletlerning kishilik hoquq depsendichilikige chétilghan 28 xitay mu'essesisini qara tizimlikke kirgüzgen.

Mezkur qara tizimlikke xitayning Uyghur rayonidiki her derijilik j x organliri, dangliq sün'iy eqil téxnologiye shirketliri qatarliqlar kirgüzülgen bolup, bularning amérika mehsulatlirini sétiwélishi we amérikigha mehsulat éksport qilishi pütünley cheklen'gen.

Shuning bilen amérika hökümiti qara tizimlikke alghan xitay mu'essesiliri jem'iy 60 qa yetti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.