Американиң ярдәмчи ташқи ишлар министири уйғур қатарлиқ һөрлүккә тәшна хәлқләрни қоллайдиғанлиқини билдүрди

Мухбиримиз җүмә
2020.05.24
Robert-Destro.jpg Американиң ярдәмчи ташқи ишлар министири роберт дәстро әпәнди.
Social Media

Американиң ярдәмчи ташқи ишлар министири роберт дәстро уйғур қатарлиқ һөрлүккә тәшна хәлқләрни қоллайдиғанлиқини билдүрди.

Униң, 22-май елан қилған твиттер баянати хитай һөкүмити хоңкоңға алақидар хәвпсизлик қануни чиқиришқа тутунған, корона вируси сәвәблик уйғур мәсилисигә қаритилған диққәт нуқтиси бурулуп кәткән мәзгилгә тоғра кәлди. 

Дәстро баянатида мундақ деди: “хитай коммунист партийәсиниң өз хәлқиниң ирадисигә қулақ селишни рәт қилиши, бу мустәбит, бир партийәлик дөләтниң қурулғандин буянқи характерини сүрәтләп бериду. Биз 1989-йилдики тйәнәнмендин хоңкоң, бүгүнки шинҗаң вә тибәткичә һөрлүккә тәшна һәммәйләнни қоллаймиз.”

Хитай һөкүмити бу нөвәтлик “икки қурултай” мәзгилидә хоңкоңниң алаһидә аптономийәлик орниға мунасивәтлик бир дөләт хәвпсизлик қануни мақуллайдиғанлиқини билдүргән.

Қанунда хоңкоң 1997-йили хитайға қайтуруп берилгәндин буян хоңкоң хәлқи бәһримән болуп кәлгән пикир, йиғилиш вә ахбарат әркинликиниң қаттиқ чәклимигә учрайдиғанлиқи мөлчәрләнгән. 

Б б с ниң нәқил қилишичә, хоңкоңниң парламент әзаси дәннис квок: “бу, ‛бир дөләттә икки хил түзүм болуш‚ принсипиға хатимә берилгәнликтин дерәк бериду” дегән.

Мәзкур қанунниң хитай хәлқ қурултийида авазға қоюлидиғанлиқи вә мақуллуқтин өтидиғанлиқи мөлчәрләнгән.

Бу қанунниң тонуштурулуши америка һөкүмитиниң наразилиқини қозғиған. 

Пәйшәнбә күни америка ташқи ишлар министирлиқи баянатчиси морган ортагус ханим “хоңкоң хәлқниң ирадиси әкс әттүрүлмигән һәрқандақ шәкилдики дөләт хәвпсизлик қануниниң дуняви ләнәткә учрайдиғанлиқи” ни билдүргән. 

Көзәткүчиләрниң қаришичә, ярдәмчи ташқи ишлар министири роберт дәстрониң твиттер баянати бу һәқтә хитайға берилгән әң күчлүк сигналларниң бири икән. 

Дәстро әпәндимниң мәзкур баянати йәкшәнбә күнигичә 3 миң қетимға йеқин һәмбәһирләнгән, 4 миң қетимға йеқин яхши көрүшкә еришкән. Бу баянатқа йезилған инкаслар 200 қетимға йеқинлашқан.

Инкасларниң көпинчисидә роберт дәстро әпәндимгә тәшәккүрләр ейтилған вә хитайға ембарго қоюш чақириқлириму йәр алған. Бәзи инкасларда “шинҗаңниң бүгүни, хоңкоңниң әтиси” дегән агаһландурушларму йезилған.

Хитай һөкүмити өткән 3 йилдин буян уйғур елигә қаритилған бастуруш вә зулум сиясәтлирини мисли көрүлмигән дәриҗидә күчәйткән. Бу җәрянда уйғур райониниң мукәммәл сақчи дөлитигә айландурулғанлиқи, 1. 8 Милйондин 3 милйонғичә уйғур қатарлиқ түркий милләтләрниң лагерларға ташланғанлиқи мөлчәрләнгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.