Qirghizistan Uyghurliri "Ana til" bayrimini tentenilik qutluqlidi

Ixtiyariy muxbirimiz féruze
2021-02-22
Share
Qirghizistan Uyghurliri Qirghizistan Uyghurlirining "Ittipaq" jem'iyiti uyushturushi bilen ötküzül "Ana til" künige béghishlan'ghan "Uyghur medeniyet féstiwali" murasimidin körünüsh. 2021-Yili 19- féwral, qirghizistan.
RFA/Féruze

19-Féwral küni, qirghizistan Uyghurlirining "Ittipaq" jem'iyiti uyushturushi bilen "Ana til" künige béghishlan'ghan "Uyghur medeniyet féstiwali" murasimi ötküzüldi. Murasim bishkek shehiridiki "Awat" ashxanisida ötti. Mezkur murasimgha bishkek shehiri we chuy nahiyesidiki ala-taw, keng-bulung, lébédinowka, sherq we frunzé yézilardiki, shundaqla toqmaq we qara-balta shehiridiki mekteplerning oqughuchiliri qatnashti.

Murasimning asasi meqsiti-Uyghur tilini saqlap qélish omumlashturush, Uyghur medeniyitini we tilini öginishke heriketlendürgüch küch bérishtin ibaret iken. Mezkur murasimgha üch yashtin on tört yashtiki balilar qatnashti.

Qirghizistan Uyghurlirining

Pa'aliyet dawamida Uyghur tilida en'eniwiy naxshilar we milliy ussullar orundaldi, ana til we Uyghur xelqi toghrisidiki shé'irlar oquldi, hetta Uyghur milliy marshi oquldi.

Ziyaritimizni qobul qilghan bahalighuchilar ömiki ezasi asiyem mollabaqiyéwa yash qatnashquchilarning Uyghur tilida déklamatsiye qilghanliqini éytip, kélechekte ular téximu ösüp Uyghur xelqini pexirlendiridu dégen ümidi barliqini izhar qildi.

Mezkur murasimgha qatnashqan gulbahar xanim ziyaritimizni qobul qilip "Uyghur medeniyet féstiwali" murasimi chong ehmiyetke ige ikenlikini tekitlidi.

Shuni tekitlep ötüsh kérekki, qirghizistan mektepliride Uyghur tili sinipliri yoq. Emma shundaq bolsimu Uyghur mu'ellimler balilargha Uyghur tilida shé'irlarni yadlitip, ularning Uyghur milliy kimlikini unutmasliqi üchün Uyghur balilirini mezkur murasimgha bashlap kélishiptu. Ular "Lébédinowka" yézisi mektipidiki matématika mu'ellimi reyhan musaxanowa we "Sherq" yézisining mektipidiki rus tili mu'ellimi rena qasimowalardur. "Sherq" yézisidin kelgen sa'adet selimowa "Uyghurum sen" shé'irini oqup tamashibinlarning qizghin alqishlirigha érishti.

"Uyghur medeniyet féstiwali" ikki sa'ettin oshuq dawam qildi we nahayiti dostane keypiyatta ötti. Pa'aliyet dawamida ixsan ebduréyimof "Xelqimning zari" naxshisini orundidi, bishkek shehiridin "Séwim", qara balta shehiridin "Senem", frunzé yézisidin "Kélechek" ussul ansembilliri we nowopokrowka yézisidiki mektepning oqughuchisi rufina nasirjanowa Uyghur milliy ussullirini orundidi. Herbir qatnashquchigha Uyghur doppisi, Uyghur köngliki we Uyghur milliy resimliri sowghat qilindi. Bular ichidiki frunzé yézisidiki "Kélechek" ussul guruppisigha sehne kiyimi teqdim qilindi

Qirghizistan Uyghurliri "Ittipaq" jem'iyiti ayallar kéngishining re'isi tursunay islam xanim ziyaritimizni qobul qilip, qatnashquchilargha teshekkür bildürüp, murasim öz meqsitige yetkenlikini tekitlidi.

Ana til künini xatirilesh murasimliri yene jalal-abad we osh sheherliridimu uyushturuldi. Qirghizistanning herqaysi yéza-sheherliride uyushturulghan ana til bayrimigha Uyghur jama'iti aktipliq bilen qatniship, körgezmilerni uyushturushti.

Qirghizistanda hökümet melumati boyiche 60 minggha yéqin Uyghur yashaydu. Emma ularning sani buningdin köp ikenlikimu éytilidu. Biraq qirghizistanda hazirghiche birmu mexsus Uyghur mektipi échilmighan. Uyghur baliliri öz ana tilini öyde, bezi mu'ellimlerdin we ishtin sirtqi kurslardin öginip kelmekte. Osh we jalal-abad qatarliq jaylardiki zor sandiki Uyghurlarning pütünley öz tilini yoqitip, asasen özbékiliship ketkenliki melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet