Uyghur akadémiyesi Uyghur ana til ma'aripi toghrisida tor muhakime yighini ötküzdi

Ixtiyariy muxbirimiz arslan
2021-02-22
Share
Uyghur akadémiyesi Uyghur ana til ma'aripi toghrisida tor muhakime yighini ötküzdi Merkizi istanbuldiki Uyghur akadémiyesining uyushturushi bilen ötküzülgen "Uyghur milliy mewjutluqini saqlap qélishta ana til ma'aripining muhimliqi" namliq tor muhakime yighinidin körünüsh. 2021-Yili 21-féwral.
RFA/Arslan

21-Féwral dunya ana til küni munasiwiti bilen pütkül dunyada ana til toghrisida her xil muhakime yighinliri we türlük pa'aliyetler élip bérildi. Shu küni merkizi istanbuldiki Uyghur akadémiyesining uyushturushi bilen "Uyghur milliy mewjutluqini saqlap qélishta ana til ma'aripining muhimliqi" namliq tor muhakime yighini ötküzüldi.

Bu qétimliq tor muhakime yighinigha Uyghur akadémiyesining mu'awin re'isi doktur meghpiret kamal xanim riyasetchilik qildi. Yighinda awstraliye sidnéy "Ümid" Uyghur ana til mektipining qurghuchisi selime kamal xanim, Uyghur akadémiyesi Uyghur ana tili komtétining mudiri zulhayat ötkür, nurwégiye Uyghur ana tili mektipining mudiri gulnar imam qatarliq chet ellerde Uyghur ana til ma'aripi xizmiti bilen shughulliniwatqan Uyghur ziyaliyliri teklip boyiche söz qildi.

"Uyghur milliy mewjutluqini saqlap qélishta ana til ma'aripining muhimliqi" dégen témida uyushturulghan bu tor muhakime yighinining neq meydan körünüshi Uyghur akadémiyesining hésabi bilen yutub we féysbok sehipiliride biwasite tarqitildi.

Tor muhakime yighinda aldi bilen riyasetchi meghpiret xanim söz qilip, "Dunya ana tili küni" we dunyada ana tilni qoghdash yolida élip bérilghan küreshler toghrisida toxtaldi. Andin Uyghur tilining nöwette duch kéliwatqan xirisliri toghrisida toxtilip, bügünki bu programmini mexsus Uyghur ana tiligha béghishlap orunlashturghanliqini bildürdi.

Andin selime kamal xanim söz qilip, Uyghur tilida élip bérilghan milliy ma'aripning tarixiy musapiliri heqqide pikir bayan qildi. U Uyghur tilidiki ma'aripning uzaq tarixtin buyan, bolupmu 11-esirdiki büyük alimlardin mehmud qeshqeri dewridin buyan nurghunlighan bilim igilirini, alilarni yétishtürüp chiqqanliqini tekitlep ötti.

Gulnar imam xanim söz qilip, Uyghur ana tilini saqlap qélishning muhimliqi, bolupmu chet ellerde yashawatqan ata-anilarning öz perzentlirining Uyghur tilida sözlesh, oqush, yézishigha alahide ehmiyet bérishi kéreklikini eskertip ötti.

Zulhayat ötkür xanim chet ellerdiki Uyghur tili ma'aripi toghrisida élip barghan ilmiy tetqiqatlarni tonushturup ötti. U özining dunyaning her qaysi jaylirida Uyghur ana tili mektipi achqan 30 dek kishi bilen pikir almashturghanliqini, bir tutash derslik tüzüsh, oqu-oqutush süpitini östürüsh we iqtisadiy qiyinchiliqlarni hel qilish qatarliq mesililerning eng muhim mesililer ikenlikini bayan qildi.

Gulnar imam xanim hazirqi ehwalda dunyaning herqaysiy jaylirida yashawatqan Uyghur baliliri üchün initirnétta tor siniplirini köplep échish, kéngeytish we tereqqiy qildurushning zörürlikini otturigha qoydi.

Doktur meghpiret xanimning bildürüshiche, 1999-yili b d t pen, ma'arip we medeniyet teshkilati (UNESCO) teripidin 21-féwral küni "Dunya ana til küni" qilip békitilgen iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet