Қирғизистанда ана тил байрими хатирләнди

Ихтиярий мухбиримиз ферузә
2020-02-21
Share
Ana-Til-Bayrimi-Qirghizistan-02.jpeg Қирғизистанда өткүзүлгән ана тил байримидин бир көрүнүш. 2020-Йили 21-феврал. Қирғизистан.
RFA/Feruze

21-Феврал күни қирғизистан уйғурлири "иттипақ" җәмийитиниң идарисиға җәм болуп, хәлқара ана тил күнини хатирлиди. Мәзкур паалийәткә қирғизистан хәлқ бирләшмиси кеңишиниң рәиси абдуғени әркибайеф, муавин рәиси зоһрә шидакова шундала аз санлиқ милләтләр вәкиллири, "иттипақ" җәмийитиниң актип әзалири вә бир қисим оқутқучи-оқуғучилар қатнашти.

Бу йиллиқ ана тил байрими яш-өсмүрләрниң вәтәнпәрвәрлик роһини көтүрүш үчүн қирғизистан уйғурлири "иттипақ" җәмийити тәрипидин уюштурулди. Мәзкур мурасимға ала-тув, кәң-булуң, лебединовка вә шәрқ йезилардики мәктәпләрниң оқугучилири қатнашти. Улар уйғур тилида қисқа шеирларни оқуди һәм уйғур миллий усуллирини орундиди. 

Тәнтәнилик мурасим "иттипақ" җәмийити мәдәнийәт бөлүминиң башчиси гүлназ мәхсутованиң риясәтчилигидә елип берилди. Мурасим давамида ана тилниң әһмийити тоғрисида нурғун нутуқлар сөзләнди. Қирғизистан хәлқ бирләшмиси кеңишиниң рәиси абдуғени әркибайеф сөз қилип, уйғур хәлқиниң әң қәдимий хәлқриниң бири икәнликини, уларниң тил, йезик вә мәдәнийәт әнәнилириниң толиму өзгичә һәм рәңдар икәнликини тәкитләп өтти.

"иттипақ" җәмийитиниң рәиси әсқәр қасими вә "иттипақ" гезитиниң баш муһеррири әкбәрҗан бавудунофлар қатнашқучиларға қизғин тәшәккүр билдүрүп, уларға уйғур тилида пәһрий ярлиқларни тәқдим қилишти. 

Шуни тәкитләп өтүш керәкки, қирғизистан мәктәплиридә уйғур тили синиплири йоқ. Әмма шундақ болсиму уйғур муәллимләр балиларға уйғур тилида шеирларни ядлитип, уларниң уйғур миллий кимликини унутмаслиқи үчүн мәзкур мурасимға башлап келишипту. 

Улар лебединовка йезисиниң мәктипидики математика муәллими рәйһан мусаханова, кәң булуң йезисиниң мәктипидидики абдусаллам ғаппар муәллим, ала-тув йезисидики мәктәп муәллими вә шәрқ йезисиниң мәктипидики рус тили муәллими рана қасимовалардур. Балилар көпинчә уйғур хәлқи вә уйғур дияри тоғрисидики шеирларни декламатсийә қилишти.

Радийомиз зияритимизни қобул қилған кәң булуң йезисидики мәктәп муәллими абдусалам ғаппар буниңдин кейин қирғизистанда уйғур тилиниң сақлинип қелишида үмиди барлиқини изһар қилди.

Мәзкур мурасимға қатнашқан "иттипақ" җәмийити аяллар кеңишиниң әң актип әзалиридин бирси нилуфәр һашимова радийомиз зияритини қобул қилип, уйғур яш-өсмүрлириниң ана тил өгиниш мумкинчиликидин мәһрум қалғанлиғидин наһайити әпсуслиниватқанлиқини билдүрди.

Нилуфәр ханим йәнә мәзкур паалийәтниң чоң әһмийәткә игә икәнликини тәкитләп, уйғур муәллимләргә вә оқугучиларға өз минәтдарлиқини изһар қилди.

Ана тил күнини хатириләш мурасимлири йәнә җалалабад вә ош шәһәрлиридиму уюштурулди. Қирғизистанниң һәрқайсий йеза-шәһәрлиридә уюштурулған ана тил байримиғаа уйғур җамаити актиплиқ билән қатнишип, көргәзмиләрни уюштурушти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт