Дуня ана тили күни мунасивити билән уйғур академийәси уйғур ана тили тоғрисида тор сөһбәт йиғини өткүзди

Ихтиярий мухбиримиз арслан
2022-02-22
Share
Дуня ана тили күни мунасивити билән уйғур академийәси уйғур ана тили тоғрисида тор сөһбәт йиғини өткүзди Уйғур академийәси тәрипидин уюштурулған уйғур ана тил тоғрисидики тор сөһбәт йиғинидин көрүнүш. 2022-Йили феврал.
RFA/Arslan

Дуня ана тили күни мунасивити билән йоқилип кетиш хәвпигә дуч келиватқан уйғур ана тили тоғрисида уйғур академийәсиниң уюштуруши билән тор сөһбәт йиғини өткүзүлди.

Уйғур акадеимйәси рәһбәрлири 20 вә 21-феврал күни арқа-арқидин икки қетим тор сөһбәт йиғини уюштуруп, дуняниң һәр қайси җайлиридики мәктәпләрдә уйғур ана тили оқутуш билән шуғуллиниватқан бирқисим оқутқучилар билән тор сөһбәт йиғини өткүзди.

20-Феврал күни өткүзүлгән “ана тил гүлзари сөһбәт программиси” дегән темидики тор йиғиниға уйғур зиялийси абидә аббас нәсрдин риясәтчилик қилди. Тор сөһбәт йиғиниға явропа шәрқий түркистан бирлики тәшкилатиниң қармиқидики гериманийә уйғурийә ана тили мәктипиниң оқутқучиси саламәт һашим, пәридә нияз қатарлиқ оқутқучилар қатнишип уйғур ана тили тоғрисида тохталди.

Уйғур академийәси тәрипидин уюштурулған уйғур ана тил тоғрисидики тор сөһбәт йиғинидин көрүнүш. 2022-Йили феврал.

Ана тил оқутқучиси пәридә нияз муәллим уйғур ана тилиниң чәтәлдики уйғурларниң мәвҗут болуш болмаслиқи билән мунасивәтлик бир мәсилә икәнликини тәкитлиди вә “тил йоқалди демәк гәп милләт йоқалди демәктур” деди.

Пәридә ханим тил мәсилиси уйғур мәсилисидә сәл қарашқа болмайдиған муһим бир мәсилә икәнликини, уйғур пәрзәнтлирини ана тил билән сөзләйдиған, ана тил билән тәпәккур қилидиған сәвийәгә кәлтүрмигән тәқдирдә ана тилини унтуп чәтәл тили билән сөзләйдиған болуп кетидиғанлиқини тәкитлиди.

Тор йиғинида сөз қилған уйғур тили оқутқучиси саламәт һашим муәллим, өсмүрләргә уйғур ана тилини өгитиш билән биргә вәтәнгә болған еңини өстүрүш үчүнму дәрс өгитиватқанлиқини билдүрди вә “чүнки чәтәлләрдә ят муһит, ят бир тил, ят бир мәдәнийәтниң тәсиридә балилар уйғурлуқниң роһини, вәтәнниң немиликини толуқ һес қилип болалмайдикән”, деди.

Уйғур академийәсиниң уюштуруши билән 21-феврал күни өткүзүлгән “ана тил оқутуштики пидакар оқутқучилар билән сөһбәт дегән темидики тор йиғини” ға доктур мәғпирәт камал ханим риясәтчилик қилди.

Бу программиға қазаистанниң алмута вилайити кичик ақсу уйғур оттура мәктипидин руқийәм исмаил, америка вириҗинийә штатидики ана тил мәктипидин рошән хәмит, уйғур ана тил тор мәктипидин доктурант рабийгул қатарлиқ оқутқучилар қатнишип уйғур тили тоғрисида тохталди.

Тор сөһбәт йиғинида сөз қилған алмута кичик ақсу уйғур оттура мәктипидин руқийәм исмаил муәллим, уйғур миллитиниң мәдәнийитини қоғдап қелишта ана тилиниң ролиниң муһим икәнликини тәкитлиди вә ана тилида оқуған балиларниң өзлирини мәдәнийәт һәм өрп-адәтлирини қоғдиялайдиғанлиқини ипадилиди.

Программа риясәтчиси доктур мәғпирәт камал ханим, ана тил милләтни бирләштүридиған әң чоң амил икәнликини тәкитлиди.

Америка вириҗинийә штатидики ана тил мәктипидин рошән хәмит муәллим уйғур тили тоғрисида сөз қилип, уйғур тил-йезиқиниң бүгүнки күнләрдә очуқ-ашкара чәклиниш һалитигә кәп қалғанлиқини вә зор бесимларға учраватқанлиқини билдүрди һәм уйғур тилиниң йоқилип кетиш хәвпигә дуч келиватқанлиқини тәкитлиди.

Рошән хәмит ханим сөзидә йәнә уйғур тилини аилидә балиларға өгитиш вә сөзлишиш биләнла чәклинип қелишниң купайә қилмайдиғанлиқини, уйғур тили маарипиниң әң муһим нуқта икәнликини, сестимилашқан ана тил маарипини бәрпа қилиш керәкликини тәкитлиди.

Уйғур ана тил тор мәктипиниң оқутқучиси доктурант рабийгул сөз қилип, һәр бир аилиниң ана тил мәктипи болуши керәкликини, ана тилини қоғдашниң зөрүр шәртлиридин бириниң уйғур аилиләр балиларға кичикидин башлапла уйғурчә гәп қилишни сиңдүрүш керәкликини, уйғур роһи билән йетилдүрүш керәкликини тәкитлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт