Dunya ana tili küni munasiwiti bilen Uyghur akadémiyesi Uyghur ana tili toghrisida tor söhbet yighini ötküzdi

Ixtiyariy muxbirimiz arslan
2022.02.22
Share on WhatsApp
Share on WhatsApp
Dunya ana tili küni munasiwiti bilen Uyghur akadémiyesi Uyghur ana tili toghrisida tor söhbet yighini ötküzdi Uyghur akadémiyesi teripidin uyushturulghan Uyghur ana til toghrisidiki tor söhbet yighinidin körünüsh. 2022-Yili féwral.
RFA/Arslan

Dunya ana tili küni munasiwiti bilen yoqilip kétish xewpige duch kéliwatqan Uyghur ana tili toghrisida Uyghur akadémiyesining uyushturushi bilen tor söhbet yighini ötküzüldi.

Uyghur akadéimyesi rehberliri 20 we 21-féwral küni arqa-arqidin ikki qétim tor söhbet yighini uyushturup, dunyaning her qaysi jayliridiki mekteplerde Uyghur ana tili oqutush bilen shughulliniwatqan birqisim oqutquchilar bilen tor söhbet yighini ötküzdi.

20-Féwral küni ötküzülgen “Ana til gülzari söhbet programmisi” dégen témidiki tor yighinigha Uyghur ziyaliysi abide abbas nesrdin riyasetchilik qildi. Tor söhbet yighinigha yawropa sherqiy türkistan birliki teshkilatining qarmiqidiki gérimaniye Uyghuriye ana tili mektipining oqutquchisi salamet hashim, peride niyaz qatarliq oqutquchilar qatniship Uyghur ana tili toghrisida toxtaldi.

Uyghur akadémiyesi teripidin uyushturulghan Uyghur ana til toghrisidiki tor söhbet yighinidin körünüsh. 2022-Yili féwral.

Ana til oqutquchisi peride niyaz mu'ellim Uyghur ana tilining chet'eldiki Uyghurlarning mewjut bolush bolmasliqi bilen munasiwetlik bir mesile ikenlikini tekitlidi we “Til yoqaldi démek gep millet yoqaldi démektur” dédi.

Peride xanim til mesilisi Uyghur mesiliside sel qarashqa bolmaydighan muhim bir mesile ikenlikini, Uyghur perzentlirini ana til bilen sözleydighan, ana til bilen tepekkur qilidighan sewiyege keltürmigen teqdirde ana tilini untup chet'el tili bilen sözleydighan bolup kétidighanliqini tekitlidi.

Tor yighinida söz qilghan Uyghur tili oqutquchisi salamet hashim mu'ellim, ösmürlerge Uyghur ana tilini ögitish bilen birge weten'ge bolghan éngini östürüsh üchünmu ders ögitiwatqanliqini bildürdi we “Chünki chet'ellerde yat muhit, yat bir til, yat bir medeniyetning tesiride balilar Uyghurluqning rohini, wetenning némilikini toluq hés qilip bolalmaydiken”, dédi.

Uyghur akadémiyesining uyushturushi bilen 21-féwral küni ötküzülgen “Ana til oqutushtiki pidakar oqutquchilar bilen söhbet dégen témidiki tor yighini” gha doktur meghpiret kamal xanim riyasetchilik qildi.

Bu programmigha qaza'istanning almuta wilayiti kichik aqsu Uyghur ottura mektipidin ruqiyem isma'il, amérika wirijiniye shtatidiki ana til mektipidin roshen xemit, Uyghur ana til tor mektipidin dokturant rabiygul qatarliq oqutquchilar qatniship Uyghur tili toghrisida toxtaldi.

Tor söhbet yighinida söz qilghan almuta kichik aqsu Uyghur ottura mektipidin ruqiyem isma'il mu'ellim, Uyghur millitining medeniyitini qoghdap qélishta ana tilining rolining muhim ikenlikini tekitlidi we ana tilida oqughan balilarning özlirini medeniyet hem örp-adetlirini qoghdiyalaydighanliqini ipadilidi.

Programma riyasetchisi doktur meghpiret kamal xanim, ana til milletni birleshtüridighan eng chong amil ikenlikini tekitlidi.

Amérika wirijiniye shtatidiki ana til mektipidin roshen xemit mu'ellim Uyghur tili toghrisida söz qilip, Uyghur til-yéziqining bügünki künlerde ochuq-ashkara cheklinish halitige kep qalghanliqini we zor bésimlargha uchrawatqanliqini bildürdi hem Uyghur tilining yoqilip kétish xewpige duch kéliwatqanliqini tekitlidi.

Roshen xemit xanim sözide yene Uyghur tilini a'ilide balilargha ögitish we sözlishish bilenla cheklinip qélishning kupaye qilmaydighanliqini, Uyghur tili ma'aripining eng muhim nuqta ikenlikini, séstimilashqan ana til ma'aripini berpa qilish kéreklikini tekitlidi.

Uyghur ana til tor mektipining oqutquchisi dokturant rabiygul söz qilip, her bir a'ilining ana til mektipi bolushi kéreklikini, ana tilini qoghdashning zörür shertliridin birining Uyghur a'ililer balilargha kichikidin bashlapla Uyghurche gep qilishni singdürüsh kéreklikini, Uyghur rohi bilen yétildürüsh kéreklikini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet