“Sherqi türkistan üchün anatoliye sepiri” namliq pa'aliyet ghelibilik ayaqlashti

Ixtiyariy muxbirimiz azigh
2021-08-24
Share

Lagér qurbanlirining yéqinliri osmaniye we gazi'anteptiki pa'aliyetlirini tügitip, “Sherqi türkistan üchün anatoliye sepiri” pa'aliyitini muwppeqiyetlik ayaqlashturdi.

Mezkur pa'aliyet a'ile ezaliri xitay hökümitining ziyankeshlikige uchrighan türkiydiki bir qisim yashlar teripidin 2-awghust küni bashlan'ghan idi. Pa'aliyetchiler mezkur pa'aliyet arqiliq türk xelqige Uyghur qirghinchiliqini tonutush we türkiye hökümitining Uyghur mesilisige éniq pozitsiye bildürüshini qolgha keltürüsh üchün jama'et pikri hasil qilish meqsitide türkiyining herqaysi sheherliride teshwiqat pa'aliyetlirini teshkilligen idi.

Lagér qurbanliri yéqinliri teshkilligen osmaniye we gazi'anteptiki pa'aliyetlerge mezkur sheherlerdiki her qaysi siyasiy partiyeler, “Türk ojaqliri” qatarliq puqrawi teshkilatlar köp küch chiqarghan. Herqaysi yerlik axbarat wastiliri lagér qurbanliri yéqinlirining pa'aliyetlirini iz qoghlap xewer bergen. Türkiyediki puqrawiy teshkilatlarning osmaniye we gazi'anteptiki shöbiliri lagér qurbanliri yéqinlirining pa'aliyetlirini qollash üchün ijtima'iy tartqu hésabliri arqiliq özining pozitsiyesini bildürgen.

“Son deqiqe”, “Xeber türk”, “Anadolu agéntliqi” qatarliq türk axbarat wastiliri “Sherqi türkistan üchün anatoliye sepiri” ning herqaysi sheherliridiki pa'aliyetlirini xewerleshtürgen bolup, xewerlerde lagér qurbanliri yéqinlirining anatoliye sepiri arqiliq Uyghur qirghinchiliqini anglitish herikitining zor ijabiy ünümge érishkenliki tekitlen'gen.

Lagér qurbanliri yiqinlirining pa'aliyetlirini teshkillep kéliwatqan Uyghur kishilik hoquq pa'aliyetchisi mirzexmet ilyas'oghli ziyaritimizni qubul qildi. Uning éytishiche, “Sherqi türkistan üchün anatoliye sepiri” pa'aliyitini intayin muweppeqiyetlik ötküzülgen bir pa'aliyet dep qarashqa bolidiken. Mirzexmet ependi yene türk xelqining pozitsiyesidin intayin xursen bolghanliqini, türkiye hökümiti Uyghur mesiliside sükütte turuwatqan bolsimu, emma türk xelqining Uyghur dawasigha bolghan qizghinliqining intayin yuqiri ikenlikini bildürdi.

Mirzexmet ependi yene “Anatoliye sepiri” pa'aliyitining uzun muddetlik bir pa'aliyet süpitide pilanlan'ghanliqini, lékin bezi pa'aliyetchilerning saghlamliq ehwalidin mesile körülgenliki üchün, waba mezgilidiki tedbirler seweblik waqtinche toxtitip qoyushqa mejbur bolghanliqini éytti.

Uyghur dawasi üchün élip bérilghan mezkur teshwiqat pa'aliyetlirige türkiyediki ezerbeyjan, türkmen teshkilatlirimu köp küch chiqarghan we yéqindin yardemde bolghan.

Uyghur kishilik hoquq pa'aliyetchisi medine nazimi xanim ziyaritimizni qubul qilip, Uyghurlarning béshigha kéliwatqan külpetlerni türkiye xelqining bilidighanliqini, türkiye xelqining her waqit Uyghurlarning yénida ikenlikini chongqur hés qilghanliqini, pa'aliyetchilerning saghlamliq ehwali eslige kelgendin kiyin, mezkur pa'aliyetni qayta dawamlashturidighanliqini éytti.

Medine xanim yene mundaq dédi: “A'ilimiz, millitimiz we xelqimizning béshigha kéliwatqan bu zulumni anglitish her bir Uyghurning insaniy wezipisi. Biz qolimizdin kélishiche buni anglitimiz. Pütün dunyadiki Uyghurlar qolidin kélishiche her yerde anglitishqa tirishishi kérek.”

Lagér qurbanliri yéqinliridin meghpiret imin xanim ziyaritimizni qubul qilip, mezkur pa'aliyettin özliri kütkinidek netijige érishkenlikini éytti.

Jewlan shirmemet, medine nazimi, mirzexmet ilyasoghli we hebibulla kösen qatarliq Uyghur pa'aliyetchiliri teripidin teshkillinip kéliwatqan Uyghur lagér qurbanliri yéqinlirining pa'aliyetliri türk xelqi we axbaratida Uyghur mesilisini tonutushta intayin muhim rol oynap kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet