“Sherqiy türkistan üchün anatoliye sepiri” qara déngiz sheherliride qizghin qarshi ilishqa érishti

Ixtiyariy muxbirimiz azigh
2021-10-05
Share
“Sherqiy türkistan üchün anatoliye sepiri” qara déngiz sheherliride qizghin qarshi ilishqa érishti Lagér tutqunlirining türkiyediki yéqinliri teripidin teshkillen'gen “Sherqi türkistan üchün anatoliye sepiri” pa'aliyiti türkiyening qara déngiz rayonida intayin qizghin dawamlashmaqta. 2021-Yili öktebir, türkiye.
RFA/Azigh

Lagér tutqunlirining türkiyediki yéqinliri teripidin teshkillen'gen “Sherqi türkistan üchün anatoliye sepiri” pa'aliyitining ikkinchi qétimliq sepiri 17-séntebir küni siwasta bashlan'ghan bolup, nöwette pa'aliyet türkiyening qara déngiz rayonida intayin qizghin dawamlashmaqta.

Pa'aliyetchiler bu qétimliq anatoliye sepiride Uyghurlarning nöwettiki weziyitini xelqqe neq meydandin anglitishni nishan qilghan bolup, rize, tirabzun, ordu, amasya we samsung qatarliq sheherlerde élip bérilghan pa'aliyetler qizghin qarshi ilishqa we yerlik xelq teripidin qizghin qollashqa érishken.

Mezkur sheherlerdiki yerlik puqrawi teshkilatlar, siyasiy partiyeler lagér tutqunliri yéqinlirining pa'aliyetlirige qizghin awaz qoshqan.

Lagér tutqunlirining türkiyediki yéqinliri teripidin teshkillen'gen “Sherqi türkistan üchün anatoliye sepiri” pa'aliyiti türkiyening qara déngiz rayonida intayin qizghin dawamlashmaqta. 2021-Yili öktebir, türkiye.

Mezkur pa'aliyetning teshkilligüchiliridin jewlan shirmemet we medine nazimi xanim ziyaritimizni qobul qilip rize, tirabzun, ordu qatarliq qara déngiz rayonidiki sheherlerde élip barghan mezkur pa'aliyetning tepsilati heqqide melumat berdi.

Pa'aliyetchiler mezkur sheherlerdiki xelq meydani we sheher baghchilirida axbarat élan qilish yighini échip, yerlik tartqularning diqqitini Uyghur qirghinchiliqigha tartqan. Uningdin bashqa pa'aliyetchiler xelq meydanlirida we mezkur sheherlerning chong kochilirida Uyghur élida yüz bériwatqan xitayning “Qirghinchiliq siyasetliri” chüshendürülgen teshwiqat waraqlirini tarqatqan we xitayning irqi qirghinchiliq siyasitige qarshi turush üchün imza toplash pa'aliyiti orunlashturghan.

Pa'aliyetchiler mezkur sheherlerdiki jama'et erbabliri, siyasiy shexsler we puqrawi teshkilatlarning mes'ulliri teripidin intayin yaxshi kütüwélin'ghan.

Lagér qurbanliri yéqinliridin mirzexmet ilyasoghli ependim ziyaritimizni qobul qilip, amasyada élip barghan pa'aliyetlirining tepsilati heqqide melumat berdi.

Lagér qurbanliri yéqinliri xitayning Uyghur we bashqa yerlik milletlerge yürgüzüwatqan irqiy qirghinchiliq siyasitini türk xelqige birinchi menbedin biwasite yetküzüsh we türkiyening irqi qirghinchiliqni tonushi üchün xelqni seperwer qilish meqsitide sherqi türkistan üchün anatoliye sepiri pa'aliyitini bashlighanidi. Nöwette mezkur pa'aliyetning ikkinchi qétimliq sepiri dawamlishiwatqan bolup, pa'aliyetchiler türkiyening herqaysi sheherlirini aylinip, her xil teshwiqat we namayish pa'aliyetlirini élip barmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet