“анилар күни” дә уйғур аниларниң дад-пәряди оттуриға қоюлди

Ихтиярий мухбиримиз әркин тарим
2022-05-09
Share
“анилар күни” дә уйғур аниларниң дад-пәряди оттуриға қоюлди Шәрқий түркистан вәхписидә “анилар күни вә уйғур анилириниң бүгүнки еғир вәзийити” темисида өткүзүлгән йиғиндин көрүнүш. 2022-Йили 8-май, түркийә.
RFA/Erkin Tarim

“анилар күни” мунасивити билән 8-май күни истанбулдики шәрқий түркистан вәхписидә “анилар күни вә уйғур анилириниң бүгүнки еғир вәзийити” темисида йиғин өткүзүлди. Йиғин түркийәниң истиқлал марши билән шәрқий түркистанниң истиқлал маршини оқуш билән башланған. Йиғинниң ечилиш нутқини түрк дуняси аяллар җәмийитиниң рәиси, истанбул университетиниң профессори муалла йүҗәл ханим билән шәрқий түркистан вәхписиниң баш катипи сәмра уйғур бидақ ханим сөзлиди. Йиғинға истанбулда туруватқан уйғур аяллиридин сирт қирғизистандин қундуз мамбәтова ханим, қазақистандин савлә йолҗу ханим, өзбекистандин гүлшат ибраһимова ханим вә әзәрбәйҗандин лаләндар новрузова ханим қатарлиқлар қатнашқан вә сөз қилған.

Йиғин тоғрисида зияритимизни қобул қилған сәмра уйғур бидақ ханим паалийәт һәққидә мәлумат берип мундақ деди: “биз анилар күнидә шәрқий түркистанда ана болуш қандақ бир туйғу? шәрқий түркистандики аниларниң бешиға немиләр келиватиду? уларниң қийинчилиқи немә? уйғур анилириниң бурунқи әһвали қандақ иди? һазир қандақ? бу мәсилиләргә қандақ чарә тапалаймиз? биз ханим-қизлар улар үчүн немиләрни қилалаймиз? буларни оттуриға қоюп, бу һәқтә музакирә елип бардуқ. Шәрқий түркистанлиқ уйғур ана фатма баһадир ханим уйғур ханим-қизлириниң һазирқи еғир вәзийити вә өзиниң бешиға кәлгәнләр тоғрисида мәлумат бәрди”.

Шәрқий түркистан вәхписидә “анилар күни вә уйғур анилириниң бүгүнки еғир вәзийити” темисида өткүзүлгән йиғиндин көрүнүш. 2022-Йили 8-май, түркийә.

Сәмра уйғур ханим шәрқий түркистан вәхписи вә башқа аммиви тәшкилатларниң һәрхил паалийәтләр билән “уйғур ирқий қирғинчилиқи” ни аңлитиватқанлиқини, буларниң мәлум дәриҗидә тәсир көрситиватқанлиқини баян қилип мундақ деди: “буниң қандақ тәсири болуватиду? десиңиз. Бүгүнки йиғинимизға түркий җумһурийәтлиридин кәлгән аялларму иштирак қилди. Улар уйғур аниларниң бешиға кәлгәнләрни уйғур шаһитларниң өз еғзидин аңлиди. Бу аяллар өлкилиригә қайтқандин кейин шәрқий түркистандики ханим-қизларниң бешиға кәлгән вәһшийликләрни хәлқигә аңлатмақчи болди. Бундин кейин түрк дунясида ‛уйғур ирқий қирғинчилиқи‚ни қандақ аңлитиш һәққидә бәзи пиланларни түздуқ”.

8-Майда “анилар күни” мунасивити билән истанбулдики шәрқий түркистан вәхписидә өткүзүлгән йиғинда фатма баһадир исимлик уйғур аялму сөз қилған. У, бу һәқтики зияритимизни қобул қилип, мәзкур йиғинда 1996-йили йолдиши ата-анисини көрүш үчүн уйғур елигә барғанда хитайниң тутуп муддәтсиз кесивәткәнликини, икки балисини дадисиз чоң қилғанлиқини, йолдишиниң һазир һаяттиму яки вапат болдиму униму билмәйдиғанлиқини аңлатқанлиқини баян қилди.

Фатма баһадир ханим йиғиндин алған тәсирати тоғрисида тохтилип, уйғур анилириниң балилириға ана тилини, өрп-адәтлирини өгитип, өз мәвҗудийитини қоғдап қелишқа әһмийәт бериши керәкликини, әгәр миллий кимликини қоғдап қалғандила уйғурларниң чоқум мустәқиллиқиға еришәләйдиғанлиқини баян қилди.

“анилар күни” аниларни хатириләш вә аниларға болған һөрмәтни ипадиләш үчүн дуняниң һәр қайси дөләтләрдә охшимайдиған күнләрдә өткүзүлгән бир күндур.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт