Ақсарай хитайдин корона вирусниң дәсләпки юқумиға аит мәлуматларни ашкарилашни тәләп қилди

Мухбиримиз мәмәтҗан җүмә
2021.02.14
Share on WhatsApp
Share on WhatsApp
Ақсарай хитайдин корона вирусниң дәсләпки юқумиға аит мәлуматларни ашкарилашни тәләп қилди Президент җо байдинниң дөләт бихәтәрлик мәслиһәтчиси җәке сулливан.
Social Media

Хитай даирилириниң дуня сәһийә тәшкилати тәтқиқатчилириға корона вирусниң дәсләпки юқумиға аит мәлуматларни беришни рәт қилғанлиқи оттуриға чиққандин кейин, америка һөкүмити хитайдин бу учурларни ашкарилашни тәләп қилди вә сәһийә тәшкилатиниң тәкшүрүш ишлириниң тосалғусиз болуши лазимлиқини тәкитлиди.

Дуня сәһийә тәшкилатиниң тәһқиқлигүчилири хитайниң вухән шәһиригә берип корона вирусиниң мәнбәси үстидә бир ай тәкшүрүш елип барған.

Һалбуки, хитай даирилири 2019-йили декабирда вухән шәһиридә байқиған 174 юқумдар тоғрисидики санлиқ мәлуматларни сәһийә тәшкилати тәкшүргүчилиригә тапшурушни рәт қилған. Әксичә, хитайниң һөкүмәт әрбаблири хитай тәтқиқатчилири билән бирликтә бу санлиқ мәлуматлар һәққидики өзиниң доклатлириниң қисқичә мәзмунлирини сәһийә тәшкилати хадимлириға бәргән.

Шәнбә күни бу һәқтә рәсмий баянат елан қилған америкиниң дөләт бихәтәрлик мәслиһәтчиси җәйк сулливан буниңдин қаттиқ әндишиләнгәнликини, сәһийә тәшкилати доклатиниң хитайниң мудахилисидин мустәсна болуши лазимлиқини ейтти.

Сулливан мундақ деди: “биз корона вируси үстидә елип берилған дәсләпки тәкшүрүш нәтиҗилириниң қандақ йәткүзүлгәнлики вә уларға еришиш җәряниниң қандақ болғанлиқиға даир соалларға қарита чоңқур әндишиләнгәндуқ.”

Сулливан йәнә мундақ деди: “бу доклатниң мустәқил болуши толиму зөрүр, мутәхәссисләрниң нәтиҗиси хитай һөкүмитиниң арилишиши вә өзгәртиветишидин халий болуши керәк. Бу тарқилишчан кесәлни техиму яхши чүшиниш вә кәлгүсидә ‍охшаш юқумларға һазирлиқ көрүш үчүн керәклик. Хитай чоқум юқумниң дәсләпки мәзгиллиригә аит санлиқ мәлуматларни тапшуруши керәк.”

Тәтқиқатчиларниң ейтишичә, хитай даирилириниң корона вирусиниң дәсләпки мәзгиллиригә аит учурларни ашкарилашқа давамлиқ қаршилиқ көрситиши, кәлгүсидики бундақ хәтәрлик кесәлликләрниң тарқилишини тосушқа ярдими болидиған муһим йип учиға ериши йоллирини қийинлаштуруветидикән.

Әң дәсләп хитайниң вухән шәһиридә байқалған корона вируси һазирға кәлгүчә аз дегәндә 109 милйон адәмни юқумландурған вә 2. 4 Милйон адәмниң җениға замин болған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт