Aqsaray xitaydin korona wirusning deslepki yuqumigha a'it melumatlarni ashkarilashni telep qildi

Muxbirimiz memetjan jüme
2021.02.14
Share on WhatsApp
Share on WhatsApp
Aqsaray xitaydin korona wirusning deslepki yuqumigha a'it melumatlarni ashkarilashni telep qildi Prézidént jo baydinning dölet bixeterlik meslihetchisi jeké sulliwan.
Social Media

Xitay da'irilirining dunya sehiye teshkilati tetqiqatchilirigha korona wirusning deslepki yuqumigha a'it melumatlarni bérishni ret qilghanliqi otturigha chiqqandin kéyin, amérika hökümiti xitaydin bu uchurlarni ashkarilashni telep qildi we sehiye teshkilatining tekshürüsh ishlirining tosalghusiz bolushi lazimliqini tekitlidi.

Dunya sehiye teshkilatining tehqiqligüchiliri xitayning wuxen shehirige bérip korona wirusining menbesi üstide bir ay tekshürüsh élip barghan.

Halbuki, xitay da'iriliri 2019-yili dékabirda wuxen shehiride bayqighan 174 yuqumdar toghrisidiki sanliq melumatlarni sehiye teshkilati tekshürgüchilirige tapshurushni ret qilghan. Eksiche, xitayning hökümet erbabliri xitay tetqiqatchiliri bilen birlikte bu sanliq melumatlar heqqidiki özining doklatlirining qisqiche mezmunlirini sehiye teshkilati xadimlirigha bergen.

Shenbe küni bu heqte resmiy bayanat élan qilghan amérikining dölet bixeterlik meslihetchisi jeyk sulliwan buningdin qattiq endishilen'genlikini, sehiye teshkilati doklatining xitayning mudaxilisidin mustesna bolushi lazimliqini éytti.

Sulliwan mundaq dédi: “Biz korona wirusi üstide élip bérilghan deslepki tekshürüsh netijilirining qandaq yetküzülgenliki we ulargha érishish jeryanining qandaq bolghanliqigha da'ir so'allargha qarita chongqur endishilen'genduq.”

Sulliwan yene mundaq dédi: “Bu doklatning musteqil bolushi tolimu zörür, mutexessislerning netijisi xitay hökümitining arilishishi we özgertiwétishidin xaliy bolushi kérek. Bu tarqilishchan késelni téximu yaxshi chüshinish we kelgüside ‍oxshash yuqumlargha hazirliq körüsh üchün kéreklik. Xitay choqum yuqumning deslepki mezgillirige a'it sanliq melumatlarni tapshurushi kérek.”

Tetqiqatchilarning éytishiche, xitay da'irilirining korona wirusining deslepki mezgillirige a'it uchurlarni ashkarilashqa dawamliq qarshiliq körsitishi, kelgüsidiki bundaq xeterlik késelliklerning tarqilishini tosushqa yardimi bolidighan muhim yip uchigha érishi yollirini qiyinlashturuwétidiken.

Eng deslep xitayning wuxen shehiride bayqalghan korona wirusi hazirgha kelgüche az dégende 109 milyon ademni yuqumlandurghan we 2. 4 Milyon ademning jénigha zamin bolghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.