Арафат әркин: "дадам мәҗбурий сөзлитилгән, хош болғиним у техи һаяткән"

Мухбиримиз гүлчеһрә
2021-04-09
Share
Арафат әркин: Әркин турсун америкадики оғлиға хитаб қилип, уни хитай һөкүмитигә қарши паалийәтлирини тохтитип хитайға қайтип келишкә дәвәт қилған син көрүнүшидин елинған. 2021-Йили апрел.
Social Media

Ройтерис агентлиқиниң 9-апрел бейҗиңдин бәргән хәвиригә қариғанда хитай һөкүмити шу күнидики хәлқаралиқ мухбирларни күтүвелиш йиғинида, хитай даирилири тәрипидин "миллий өчмәнлик, миллий кәмситишкә қутратқулуқ қилиш" дегәндәк җинайәтләр артилип 20 йиллиқ түрмә җазасини өтәватқан, или областлиқ радийо-телевизийә идарисиниң телевизийә режиссори әркин турсунниң түрмә формиси кийгән, беши чүшүрүлгән оруқ һалдики син көрүнүшини көрсәткән. Ройтерсниң хәвиридә қәйт қилинишичә, әркин турсун қисқа баяниниң асаслиқ қисмида өзиниң қоюп берилишини ашкара тәләп қилип келиватқан америкадики оғлиға хитаб қилип, уни хитай һөкүмитигә қарши паалийәтлирини тохтитип хитайға қайтип келишкә дәвәт қилған. У сөзиниң ахирида йәнә: "мән пүтүн күчүм билән өзүмни өзгәртип партийә вә һөкүмәтниң кәң қоллуқ қилишиға еришиш үчүн тиришиватимән" дегәндәк гәпләрни қилған.

Ройтерсниң хәвиридә көрситилишигә қариғанда, хитай һөкүмити,

Йеқинқи нәччә айдин буян америка вә бирқисим дөләтләр хитайни уйғурларға ирқий қирғинчилиқ қилиш билән әйибләп, һәр түрлүк җаза тәдбирлири иҗра қиливатқан һәмдә 2022-йиллиқ бейҗиң қишлиқ олимпикини байқут қилиш тәшәббуси күчийиватқан бир мәзгилдә бу хилдики ахбарат елан қилиш йиғинлирини көпәйтип ечиватқан болуп, бултур 12-айдин һазирғичә 11 қетим мушуниңға охшаш мухбирларни күтүвелиш йиғини өткүзгән.

Хәвәрдә, хитай һөкүмитиниң бу хил ахбарат йиғинлирида әркин турсунға охшаш тутқун қилған уйғур зиялийлири вә башқиларни уларниң чәтәлләрдә туруп адаләт тәләп қиливатқан уруқ-туғқанлириға қарши сөзлитиш вә хитайниң хорлаш җинайәтлирини паш қилған аялларғиму ашкара һуҗум қилишни, өзиниң сиясәтлирини ақлаштики асаслиқ һәрикитигә айландурғанлиқи тәнқид қилинған.

Бу қетимлиқ ахбарат елан қилиниш йиғинида хитай һөкүмити син көрүнүшини көрсәткән әркин турсун, 2018-йили 3-айда тутқун қилиништин илгири или областлиқ телевизийәсидә режиссор болуп хизмәт қиливатқан иди. Әркин турсун вә ишлигән "дуня меһир-муһәббәт билән гүзәл" намлиқ программилар һәтта у тутқун қилиништин илгирила мукапатланғанлиқи мәлум. У лагер башланғандин буян һәр түрлүк баһаниләрдә туюқсиз тутқун қилинип ғайиб болған уйғур сәрхиллириниң бири иди. У буниң тунҗи қетим хитай һөкүмити тәрипидин екран арқилиқ көрситилиши һесаблиниду.

Игилишимизчә, әркин турсун елип барған паалийәтлириниң әһмийәтликлики сәвәбидин у хәлқ ичидә ғулҗидики нуртай һаҗи, аблимит халис һаҗи, ғопур һаҗи қатарлиқ кишиләр билән бирликтә "ғулҗидики 4 сәрхил", "ғулҗидики 4 гөһәр" дегәндәк намлар билән атилип кәлгән.

Әркин турсун тутқун қилинғандин кейин, униң 2015-йилиниң ахирлири америкиға оқушқа кәлгән оғли арафат әркин ғулҗа шәһәрлик 9-балилар бағчисиниң оқутқучиси болуп ишләйдиған аниси гүлнар тәләтниң 2017-йилиниң ахирида лагерға елип кетилгәнликини, дадиси әркин турсунниң 2018-йили 3-айда тутқун қилинип, биваситә түрмигә елип кетилгәнликидин хәвәр тапқанлиқини радиомиз вә башқа ахбаратларға билдүргән. У шу вақитлардин буян ата-анисиниң хәвирини елишқа тиришип келиватқаниди.

9-Апрел вашингтондин қайта зияритимизни қобул қилған арафат әркин, дадисиниң син көрүнүшини көрүп көңли бәкму йерим болған болсиму әмма дадисиниң һаятлиқиниң өзи, бу хәвәрниң хош болушқа тегишлик тәрипи икәнликини билдүрди.

У бүгүнки мурәккәп һессиятини аңлиғучилиримиз билән ортақлашти.

Арафат дадисини вә аилисини қутқузуш үчүн тохтимай хәлқаралиқ ахбаратларға сөзләп кәлмәктә. У. Бирләшкән дөләтләр тәшкилати кишилик һоқуқ комитети қатарлиқ орунлардинму дадисиниң из-дерикини қилип кәлгәниди. Америкиниң сабиқ ташқи ишлар министири майк помпейо әпәнди 2019-йили 26-мартта америкадики уруқ туғқанлири лагерға қамалған уйғурларниң вәкиллири қатарида арафат әркин биләнму көрүшкәниди. Хитай 20 яшқиму кирмигән арафатниму аилисини қутқузуш үчүн қилған һәқлиқ давалири үчүн уни "чәтәлдики бөлгүнчи тәшкилатниң әзаси" дәп әйиблигән вә һәр хил усулларда униңға тәһдит селип кәлгәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт