Arafat erkin: "Dadam mejburiy sözlitilgen, xosh bolghinim u téxi hayatken"

Muxbirimiz gülchéhre
2021-04-09
Share
Arafat erkin: Erkin tursun amérikadiki oghligha xitab qilip, uni xitay hökümitige qarshi pa'aliyetlirini toxtitip xitaygha qaytip kélishke dewet qilghan sin körünüshidin élin'ghan. 2021-Yili aprél.
Social Media

Roytéris agéntliqining 9-aprél béyjingdin bergen xewirige qarighanda xitay hökümiti shu künidiki xelq'araliq muxbirlarni kütüwélish yighinida, xitay da'iriliri teripidin "Milliy öchmenlik, milliy kemsitishke qutratquluq qilish" dégendek jinayetler artilip 20 yilliq türme jazasini ötewatqan, ili oblastliq radiyo-téléwiziye idarisining téléwiziye rézhissori erkin tursunning türme formisi kiygen, béshi chüshürülgen oruq haldiki sin körünüshini körsetken. Roytérsning xewiride qeyt qilinishiche, erkin tursun qisqa bayanining asasliq qismida özining qoyup bérilishini ashkara telep qilip kéliwatqan amérikadiki oghligha xitab qilip, uni xitay hökümitige qarshi pa'aliyetlirini toxtitip xitaygha qaytip kélishke dewet qilghan. U sözining axirida yene: "Men pütün küchüm bilen özümni özgertip partiye we hökümetning keng qolluq qilishigha érishish üchün tirishiwatimen" dégendek geplerni qilghan.

Roytérsning xewiride körsitilishige qarighanda, xitay hökümiti,

Yéqinqi nechche aydin buyan amérika we birqisim döletler xitayni Uyghurlargha irqiy qirghinchiliq qilish bilen eyiblep, her türlük jaza tedbirliri ijra qiliwatqan hemde 2022-yilliq béyjing qishliq olimpikini bayqut qilish teshebbusi küchiyiwatqan bir mezgilde bu xildiki axbarat élan qilish yighinlirini köpeytip échiwatqan bolup, bultur 12-aydin hazirghiche 11 qétim mushuninggha oxshash muxbirlarni kütüwélish yighini ötküzgen.

Xewerde, xitay hökümitining bu xil axbarat yighinlirida erkin tursun'gha oxshash tutqun qilghan Uyghur ziyaliyliri we bashqilarni ularning chet'ellerde turup adalet telep qiliwatqan uruq-tughqanlirigha qarshi sözlitish we xitayning xorlash jinayetlirini pash qilghan ayallarghimu ashkara hujum qilishni, özining siyasetlirini aqlashtiki asasliq herikitige aylandurghanliqi tenqid qilin'ghan.

Bu qétimliq axbarat élan qilinish yighinida xitay hökümiti sin körünüshini körsetken erkin tursun, 2018-yili 3-ayda tutqun qilinishtin ilgiri ili oblastliq téléwiziyeside rézhissor bolup xizmet qiliwatqan idi. Erkin tursun we ishligen "Dunya méhir-muhebbet bilen güzel" namliq programmilar hetta u tutqun qilinishtin ilgirila mukapatlan'ghanliqi melum. U lagér bashlan'ghandin buyan her türlük bahanilerde tuyuqsiz tutqun qilinip ghayib bolghan Uyghur serxillirining biri idi. U buning tunji qétim xitay hökümiti teripidin ékran arqiliq körsitilishi hésablinidu.

Igilishimizche, erkin tursun élip barghan pa'aliyetlirining ehmiyetlikliki sewebidin u xelq ichide ghuljidiki nurtay haji, ablimit xalis haji, ghopur haji qatarliq kishiler bilen birlikte "Ghuljidiki 4 serxil", "Ghuljidiki 4 göher" dégendek namlar bilen atilip kelgen.

Erkin tursun tutqun qilin'ghandin kéyin, uning 2015-yilining axirliri amérikigha oqushqa kelgen oghli arafat erkin ghulja sheherlik 9-balilar baghchisining oqutquchisi bolup ishleydighan anisi gülnar tel'etning 2017-yilining axirida lagérgha élip kétilgenlikini, dadisi erkin tursunning 2018-yili 3-ayda tutqun qilinip, biwasite türmige élip kétilgenlikidin xewer tapqanliqini radi'omiz we bashqa axbaratlargha bildürgen. U shu waqitlardin buyan ata-anisining xewirini élishqa tiriship kéliwatqanidi.

9-Aprél washin'gtondin qayta ziyaritimizni qobul qilghan arafat erkin, dadisining sin körünüshini körüp köngli bekmu yérim bolghan bolsimu emma dadisining hayatliqining özi, bu xewerning xosh bolushqa tégishlik teripi ikenlikini bildürdi.

U bügünki murekkep héssiyatini anglighuchilirimiz bilen ortaqlashti.

Arafat dadisini we a'ilisini qutquzush üchün toxtimay xelq'araliq axbaratlargha sözlep kelmekte. U. Birleshken döletler teshkilati kishilik hoquq komitéti qatarliq orunlardinmu dadisining iz-dérikini qilip kelgenidi. Amérikining sabiq tashqi ishlar ministiri mayk pompéyo ependi 2019-yili 26-martta amérikadiki uruq tughqanliri lagérgha qamalghan Uyghurlarning wekilliri qatarida arafat erkin bilenmu körüshkenidi. Xitay 20 yashqimu kirmigen arafatnimu a'ilisini qutquzush üchün qilghan heqliq dawaliri üchün uni "Chet'eldiki bölgünchi teshkilatning ezasi" dep eyibligen we her xil usullarda uninggha tehdit sélip kelgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet