Da'iriler atushta ahalilerni sim-tosuqlar bilen öylirige qamighan, emma ozuqluq topliwélish pursiti bermigen

Muxbirimiz shöhret hoshur
2020-02-03
Élxet
Pikir
Share
Print
Uyghur diyarida da'iriler élip bériwatqan wirustin mudapi'elinish teshwiqatidin körünüsh. 2020-Yili yanwar.
Uyghur diyarida da'iriler élip bériwatqan wirustin mudapi'elinish teshwiqatidin körünüsh. 2020-Yili yanwar.
Social Media

"Wuxen wirusi" ning Uyghur rayonidiki tarqilish ehwali we da'irilerning bu heqtiki aldini élish tedbirliri heqqide melumat élish üchün muxbirimiz rayondiki her derijilik organlar we ahalilerge téléfon qildi. Éniqlashlirimiz dawamida qeshqer kérembagh doxturxanisi, altay wilayetlik birinchi doxturxana we shixenze 2-doxturxanilarning "Wuxen wirusi" bilen yuqumlan'ghanlar üchün mexsus orun ajratqanliqi melum boldi. Atushtiki ahalilerdin biri yolgha qoyuluwatqan jiddiy halettin kéyin yerlik da'irilerning kocha doqmushlirini sim-tosuqlar bilen tosup ahalilerni öydin chiqmasliqqa buyrughanliqi, emma jiddiy halettin awwal ahalilerge öylirige ozuqluq topliwélish pursiti bermigenlikini ashkarilidi.

Xitay axbarati 31-yanwardiki xewerliride Uyghur rayonida "Wuxen wirusi" bilen yuqumlan'ghanlarning 17 neper ikenlikini ashkarilighan idi. Biz bu sanning toghra yaki xataliqi we yuqumlan'ghanlarning qaysi doxturxanida ikenlikini aydinglashturush üchün Uyghur rayonidiki herqaysi sehiye organlirigha téléfon qilduq. Xadimlardin biri qeshqerde bu tür yuqumdarlarni közitish we dawalash üchün qeshqer kérembagh doxturxanisida mexsus orun ajritilghanliqini ashkarilidi. Emma kérembagh doxturxanisining hazirgha qeder bir yuqumdarni bayqighan yaki bayqimighanliqi melum bolmidi.

Bortaladiki sehiye tarmaqliri özliride "Wuxen wirusi" yuqumdarlirining barliqini inkar qilmidi, emma ular bu heqte aldirap melumat bérelmeydighanliqini tilgha aldi.

Melum bolushiche, xitayning herqaysi jaylirida ijra qiliniwatqinigha oxshashla Uyghur rayonidimu "Wuxen wirusi" din mudapiyelinish üchün jiddiy halet yolgha qoyulghan. Atushning chet-yaq yéziliridimu kocha doqmushliri sim tosuqlar bilen tosalghan. Ahaliler wirustin qoghdinish heqqide jiddiy agahlandurulghan. Ahaliler kent kadirlirining doklatigha asasen "Wuxen wirusi" ning Uyghur rayonigha tarqilish ehwalidin belgilik derijide xewer tapqan.

Ijtima'iy axbaratlarda, hetta xelq'ara axbaratlarda déyilishiche, xitay da'iriliri "Wuxen wirusi" yuqumdarlirining sani we ölümi heqqidiki sanliq melumatlarni yoshurmaqta. Biz heqiqiy ehwalni igilesh üchün altaydiki alaqidar tarmaqlargha izchil halda téléfon qilduq. Xadimlar wilayetlik1 ‏-doxturxanida bu wirus yuqumdarliri üchün mexsus bölüm ajritilghanliqini ashkarilisa, shixenzediki da'iriler shixenze 2‏-doxturxanisining mexsus ayrilghanliqini tilgha aldi.
Atushtiki ahalilerning déyishiche, da'iriler ahalilerning sirtqa chiqishini shu derijide qattiq tosqan bolsimu, emma ularning öylirige yéterlik ozuqluq topliwélishigha purset bermigen. Da'iriler bu jiddiy haletning 20 künche dawam qilidighanliqini bayan qilghan.

"Nyu-york waqti géziti" ning xewer qilishiche, wuxen shehirining bashliqi bu wirus tarqalghanliqi we xewpi heqqidiki uchurning kéchikkenlikini étirap qilghan. Emma mes'uliyetni merkizi hökümetke artqan, yeni xitayning qanun boyiche merkezdin uqturush kelmey turup, özining bundaq bir waba heqqide éghiz achalmaydighanliqini bildürgen.

Xitayda, jümlidin Uyghur rayonida öylirige qapsalghan kishilerning qanchilik waqit berdashliq béreleydighanliqi hazirche melum emes.

Toluq bet