Атуш шоруқлуқ тиҗарәтчи яқуп розиниң лагерда өлгәнлики ашкариланди
2019.04.09
Бу йил 45 яшлар чамисидики, атуш шоруқлуқ тиҗарәтчи яқуп розиниң лагерда өлгәнлики ашкариланди.
Мәлум болушичә, әсли қирғизистанда тиҗарәт қиливатқан яқуп рози 2017-йилиниң бешида юртиға қайтқан, 2017-йилиниң оттурилири лагерға әкетилгән.
Өткән айниң ахирқи һәптиси лагерда җан үзгән. Сақчилар яқуп розиниң йүрәк кесили билән өлгәнликини илгири сүрмәктә. Әмма әһвални инкас қилғучилар, яқуп розиниң җәситиниң аилисигә берилмигәнликини билдүрүш билән бирликтә униң қийин-қистақта өлгән болуш еһтималлиқини оттуриға қоймақта.
Вәзийәттин хәвәрдар кишиләрниң радийомизға инкас қилишичә, атуш шоруқлуқ тиҗарәтчи яқуп рози, өткән айниң ахирқи һәптиси лагерда җан үзгән. Телефонимизни қобул қилған каттайлақ йезилиқ сақчи хадими, бу әһвалдин хәвири йоқлуқини ейтти. Инкас қилинишичә әслидә бишкәктә дукан ачқан яқуп рози 2017-йилиниң бешида хитай даирилириниң чақириқиға аваз қошуп юртиға қайтқан. У юртиға қайтқанда алди билән паспорти йиғивелинған.
Аридин бир ай өткәндә сақчиханиға чақиртилип бир қетим сорақ қилинған вә сорақтин кейин қоюп берилгән; аридин йәнә бир ай өткәндә, кечидә сақчилар өйигә бесип кирип, униң бешиға қара халта кийдүрүп елип кәткән. Атуш шәһәрлик сақчи идарисидики бир хадимму, яқуп розиниң өлүмидин хәвәрсизликини вә хәвири болған тәқдирдиму бу һәқтә телефонда учур берәлмәйдиғанлиқини ейтти.
Радийомизға кәлгән инкаста баян қилинишичә, яқуп рози өйидин тутуп кетилгәндин кейин, аилә әзалири униң лагерда икәнликидин хәвәр тапқан, әмма бирәр қетимму екранда яки йүзтуранә көрүшүш пурсити болмиған. Өткән айниң ахири яқуп розиниң лагердин җәсити чиққан, әмма җәсәт аилидикиләрниң қолиға тутқузулмиған, пәқәт уларниң көзи алдида, тәйинләнгән бир нәпәр диний зат тәрипидин ююп-тарилип йәрликкә қоюлған.
Телефонимизни қобул қилған сүнтағ сақчихана хадими яқуп розиниң тутқундики мәзгилидә җан үзгәнликини дәлиллиди. Бу хадим яқуп розиниң йүрәк кесили билән өлгәнликини илгири сүрүш билән бирликтә, униң у тутқундин илгирики саламәтлик әһвали вә җәситиниң аилисигә берилмәсликиниң сәвәби һәққидә чүшәндүрүш берәлмиди.
Юқиридики аваз улинишидин программиниң тәпсилатини аңлиғайсиләр.