Atush shoruqluq tijaretchi yaqup rozining lagérda ölgenliki ashkarilandi

Muxbirimiz shöhret hoshur
2019-04-09
Élxet
Pikir
Share
Print
Téz sürette köpiyiwatqan "Yépiq terbiyelesh lagéri" yeni xitayning jaza lagéridin birining körünüshi. 2018-Yili 3-dékabir, atush.
Téz sürette köpiyiwatqan "Yépiq terbiyelesh lagéri" yeni xitayning jaza lagéridin birining körünüshi. 2018-Yili 3-dékabir, atush.
AP

Bu yil 45 yashlar chamisidiki, atush shoruqluq tijaretchi yaqup rozining lagérda ölgenliki ashkarilandi.

Melum bolushiche, esli qirghizistanda tijaret qiliwatqan yaqup rozi 2017-yilining béshida yurtigha qaytqan, 2017-yilining otturiliri lagérgha ekétilgen.

Ötken ayning axirqi heptisi lagérda jan üzgen. Saqchilar yaqup rozining yürek késili bilen ölgenlikini ilgiri sürmekte. Emma ehwalni inkas qilghuchilar, yaqup rozining jesitining a'ilisige bérilmigenlikini bildürüsh bilen birlikte uning qiyin-qistaqta ölgen bolush éhtimalliqini otturigha qoymaqta.

Weziyettin xewerdar kishilerning radiyomizgha inkas qilishiche, atush shoruqluq tijaretchi yaqup rozi, ötken ayning axirqi heptisi lagérda jan üzgen. Téléfonimizni qobul qilghan kattaylaq yéziliq saqchi xadimi, bu ehwaldin xewiri yoqluqini éytti. Inkas qilinishiche eslide bishkekte dukan achqan yaqup rozi 2017-yilining béshida xitay da'irilirining chaqiriqigha awaz qoshup yurtigha qaytqan. U yurtigha qaytqanda aldi bilen pasporti yighiwélin'ghan.

Aridin bir ay ötkende saqchixanigha chaqirtilip bir qétim soraq qilin'ghan we soraqtin kéyin qoyup bérilgen؛ aridin yene bir ay ötkende, kéchide saqchilar öyige bésip kirip, uning béshigha qara xalta kiydürüp élip ketken. Atush sheherlik saqchi idarisidiki bir xadimmu, yaqup rozining ölümidin xewersizlikini we xewiri bolghan teqdirdimu bu heqte téléfonda uchur bérelmeydighanliqini éytti.

Radiyomizgha kelgen inkasta bayan qilinishiche, yaqup rozi öyidin tutup kétilgendin kéyin, a'ile ezaliri uning lagérda ikenlikidin xewer tapqan, emma birer qétimmu ékranda yaki yüzturane körüshüsh pursiti bolmighan. Ötken ayning axiri yaqup rozining lagérdin jesiti chiqqan, emma jeset a'ilidikilerning qoligha tutquzulmighan, peqet ularning közi aldida, teyinlen'gen bir neper diniy zat teripidin yuyup-tarilip yerlikke qoyulghan.

Téléfonimizni qobul qilghan süntagh saqchixana xadimi yaqup rozining tutqundiki mezgilide jan üzgenlikini delillidi. Bu xadim yaqup rozining yürek késili bilen ölgenlikini ilgiri sürüsh bilen birlikte, uning u tutqundin ilgiriki salametlik ehwali we jesitining a'ilisige bérilmeslikining sewebi heqqide chüshendürüsh bérelmidi.

Yuqiridiki awaz ulinishidin programmining tepsilatini anglighaysiler.

Toluq bet