Amérika awam palata ezasi amérika yashlirigha kommunizimning mahiyitini tonutush üchün yéngi bir qanun layihesi tonushturghan

Muxbirimiz nur'iman
2021-12-02
Share
Amérika awam palata ezasi amérika yashlirigha kommunizimning mahiyitini tonutush üchün yéngi bir qanun layihesi tonushturghan Amérika jumhuriyetchiler partiyesining awam palata ezasi mariya élwira salazar xanim bashqa palata ezaliri we kommunizm qurbanliri wekilliri bilen birge dölet mejlisi binasining aldida ötküzgen muxbirlarni kütüwélish yighinidin körünüsh. 2021-Yili 2-dékabir, washin'gton.
Photo: RFA

Amérika jumhuriyetchiler partiyesining awam palata ezasi mariya élwira salazar xanim 2-dikabir küni 10 din artuq bashqa palata ezaliri we kommunizim qurbanliri wekilliri bilen birge dölet mejlisi binasining aldida muxbirlarni kütüwélish yighini ötküzgen. Mariya élwira salazar xanim mezkur yighinda "Kommunizmning mahiyitini tonutush qanun layihesi" ni tonushturghan.

Mezkur qanun layihesi heqqide yizilghan chüshendürüshtiki mezmunlargha qarighanda, amérikada kommunizm idé'ologiyesi yashlar arisida keng kölemde tarqilishqa bashlighan. Bolupmu 2020-yildiki xelq rayini sinash netijisidin ayan bolushiche, 2000-yilidin kéyin tughulghan yashlarning üchtin bir qisimining kommunizm idiyesige mahilliqi barliqi melum bolghan.

"Kommunizmning mahiyitini tonutush qanun layihesi" ning asasliq meqsitige mundaq izahat bérilgen: "Bu qanun layihesi 'kommunizm qurbanliri xatire sariyi' arqiliq ma'arip sahesini matériyal bilen teminleydu. Fondi jem'iyet yene toluq ottura mektep oqughuchilirigha kommunizm hemde mustebit tüzümning xewipi, shundaqla uning amérikaning erkinlik we démokratiye asasiy prinsipliri bilen zitliqi toghrisida terbiye bérishke yardem béridu."

Mariya élwira salazar xanim mezkur qanun layihesi heqqide söz qilip mundaq dégen: "Biz bu yerge nahayiti muhim bir wezipe üchün toplanduq. Biz oqughuchilirimizni terbiyelishimiz kérek. Ular kommunizimning heqiqiy mahiyitini bilidighan kelgüsining igiliri, etining rehberliridur. Bügün dölet mejlisidiki 60 neper mejlis ezaliri bilen birge mushu heqtiki qanun layihemizni tonushturmaqchimiz. Mezkur qanun layihesining témisini 'mekteplerde kommunizmning mahiyitini tonutush qanun layihesi' dep békittuq. Bu qanun layihesi kelgüsi ewlatlirimizgha kommunizimning heqiqiy mahiyitini tonutush üchün mekteplerning oqutush matériyallirini tüzüp chiqidu. Ewlatlirimizgha tragidiyelirining heqiqiy yüzini chüshendürüshke yardem biridu. Tarix aliqachan kommunizimning amérikada baziri yoq ikenlikini ispatlighan. Bu intayin zöür bolghan ders. Men ular bilen bille bu qanun layihesini sun'ghanliqimdin pexirlinimen."

Mariya élwira salazar xanim mezkur qanun layihesini tonushturghandin kéyin "Kommunizim qurbanliri xatire sariyi" ning re'isi anjiruw birémbirg ependi kommunizimning ziyankeshlikige uchrighuchilarni eslep ötken we yene mundaq dégen: "Bügünki künde biz xitayda kommunizimning ziyankeshlikige uchrawatqanlargha shahit boluwatimiz. Xitay kompartiyesi Uyghurlar we bashqa étnik goruppilargha qarita irqi qirghinchliq yürgüzüwatidu. 21-Esirdiki bügünki künde 3 milyon'gha yéqin Uyghur musulmanlar lagérlarda tutup turuluwatidu. Uyghur ayallirining asasi qisimi mejburi tughmas qiliniwatidu, Uyghur erliri mejburi emgekke séliniwatidu. Amérika yashliri asasen ötmüshtiki we künimizdiki kommunistik rijimining tarixini bilmeydu. Milyonlighan kishinng kommunist rijimning qurbanlirigha aylan'ghanliqini bilmeydu. Shunga kommunistlarning belgiliri chüshürülgen maykilarni moda dep, kéyip yürüydu. Amérikaliqlar choqum kommunistik rijimnng ziyankeshlikini tonup yétishi kérek. Bügün tonushturulghan bu qanun layihesi filorida shitatida muweppeqiyetlik ötti. Buningdin kéyin pütün filorida shitatidiki toluq ottura mektepler oqughuchilirigha kommunizimning mahiyitini tonushturidu. Biz yene bashqa 50 shitatning hemmiside bu qanun layihesini tonushturup, pütün amérikaliq yashlargha kommunizimning mahiyitini tonutushqa kapaletlik qilishqa tirishimiz."

Mezkur qanun layihesini tonushturush axbarat élan qilish yighinigha kommunistik mustenit hakimiyetlerdin qichip amérikada olturaqliship qalghan kishilerning wekillri söz qilghan. "Uyghur herikiti" teshkilatining re'isi roshen abbas xanimmu xitay kompartiyesining ziyankeshlikige uchrawatqan Uyghurlarning mesilisni anglatqan.

U mundaq dégen: "Ma'arip démokratik jem'iyetning uwisi. Biz öz ewladlirimizgha insaniyetning izzet-hörmitini inkar qilidighan kommunizm idé'ologiyesining xetirini tonutushimiz kérek. Baya bérimbirg ependi éytip ötkinidek, mejburiy bala chüshürüsh qatarliq ziyankeshliklerning qurbani boluwatqan Uyghur ayalliri xitayning Uyghurlargha qaratqan irqi qirighinchiliqidiki jeng meydani bolup qaldi. Xitay kompartiyisi diniy étiqadqa we insaniyetke qarshi urush qiliwatidu. Amérikada méning erkin pikir qilghanliqim üchün hedem doktor gülshen abbas we yoldishimning tughqanlirini xitay kompartiyesi tutqun qildi. Erkin dunyaning kelgüsi, xelq'ara jem'iyetning zulumgha qarshi turush iradisige baghliq. Biz kéyinki ewladlirimiz üchün, balilirimiz we newrilirimiz warisliq qilidighan insaniyetning kelgüsi üchün, ötmüshtiki dehshetlerdin ibret élishimiz kérek."

Mezkur qanun layihesining chüshendürülüshige qarighanda, eger bu qanun layihesi maqullansa, kommunizm heqqide toluq ottura mektep derslikliri tüzülidiken. "Wetenperwerliktiki portrét" namliq yürüshlük tarixi kitablar teyyarlinip, herqaysiy shitatlar we yerlik ma'arip rehberlirning testiqi bilen resmi derslik süpitide mekteplerde oqutulidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet