Австралийәниң аделайд шәһиридики уйғурлар хитайға қарши наразилиқ намайиши елип барди

Ихтиярий мухбиримиз арслан
2021-04-09
Share
Адилайдтики уйғурлар хитайниң йеңи ечилған консолханисиға қарши намайиш елип барди Австралийәниң адилайд шәһиридә яшаватқан уйғурлар, хитайниң адилайд шәһридә йеңидин ечилған хитай консулхансиға қарши елип барған намайиштин корунуш. 2021-Йили 31-март.
RFA/Arslan

8-Апрел пәйшәнбә күни мәркизи австралийәниң аделайд шәһиригә җайлашқан австралийә шәрқий түркистан җәмийитиниң уюштуруши билән хитайниң аделайд шәһиридики консулханиси алдида наразилиқ намайиш паалийити елип берилди.

Намайишқа уйғурлардин әр-аял вә өсмүрләр болуп йүзләрчә киши қатнашқан болуп, намайишчилар қоллирида ай юлтузлуқ көк байрақларни көтүргән һалда консулхана алдиға җәм болди вә "хитай қирғинчилиқни тохтат!", "шәрқий түркистанға азадлиқ", дегәнгә охшаш шоарлар товлиди.

Австралийә шәрқий түркистан җәмийитиниң муавин рәиси таш һаҗи яри әпәндиниң билдүрүшичә, бу намайишниң мәқсити, хитайниң уйғурлар үстидин йүргүзүватқан зулум, ассимилятсийә сиясити, ирқий қирғинчилиқиға қарши туруш шундақла австралийә һөкүмити вә хәлқи арисида уйғурлар мәсилисини күнтәртипкә кәлтүрүш икән.

Таш һаҗи яри әпәнди бу намайиш тоғрисида мәлумат берип, аделайд шәһиридики уйғурлар һәр һәптидә бир қетим һәр җүмә күни хитай консулханисиниң алдиға җәм болуп хитайға қарши намайиш елип беришни пиланлиғанлиқи, бу қетимқи намайишниң шу намайиш пиланиниң тунҗи қетимлиқи икәнликини, бу намайиш мушу шәкилдә алтә ай давам қилидиғанлиқини билдүрди.

Австралийә шәрқий түркистан җәмийитиниң уюштуруши билән өткүзүлгән бу намайиш җәрянида җәмийәт рәиси нурмуһәммәт түркистани қатарлиқ бир қанчә киши сөз қилған.

Биз шәрқий түркистан австралийә җәмийитиниң рәиси нурмуһәммәт түркистани вә намайишқа қатнашқан уйғур аял һөригүл йүсүп билән сөһбәт елип бардуқ.

Нурмуһәммәт түркистани әпәнди бу намайишта сөз қилип, хитайниң уйғурлар үстидин елип бериватқан қәтлиамлири тоғрисида тохталған вә австралийә һөкүмити вә хәлқини бу мәсилисигә диққәт беришкә чақириқ қилған.

Һөригүл ханим өзиниң бу намайишқа қатнишишиға түрткә болған сәвәб тоғрисида тохталди. У, өзиниң уруқ-туғқанлириниң хитайниң лагерлириға қамалғанлиқи вә бир қанчә йилдин буян уруқ-туғқанлири билән телефон-учур алақә қилалмиғанлиқи сәвәбидин наразилиқ билдүрүп бу намайишқа қатнашқанлиқини ипадилиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт