Awstiraliyede "Uyghur muqam ansambili" quruldi

Ixtiyariy muxbirimiz uchqun
2019-07-24
Élxet
Pikir
Share
Print
Awstiraliyede "Uyghur muqam ansambili" ning qurghuchisi shöhret tursun ependi "Uyghur muqam ansambili" ning qurulush murasimida söz qilmaqta. 2019-Yili 20-iyul, sidnéy.
Awstiraliyede "Uyghur muqam ansambili" ning qurghuchisi shöhret tursun ependi "Uyghur muqam ansambili" ning qurulush murasimida söz qilmaqta. 2019-Yili 20-iyul, sidnéy.
RFA/Uchqun

7-Ayning 20-küni awstiraliyening sidnéy shehiride "Uyghur muqam ansambili" ning qurulush murasimi ötküzüldi.

Murasim "Asman" méhmanxanisida ötküzülgen bolup, murasimgha zal cheklimisi tüpeylidin 70 qa yéqin kishi qatnashqan. Murasim sa'et 13 yérimda "Uyghur muqam ansambili" ning qurghuchisi shöhret ependining nutqi bilen bashlan'ghan bolup, pa'aliyet 4 sa'etke yéqin dawam qilghan. Biz bu munasiwet bilen shöhret ependini ziyaret qilduq.

U muqam ansambilini qurushtiki meqsiti heqqide toxtilip mundaq dédi: "Bizning 'Uyghur muqam ansambili' ni qurushtiki meqsitimiz milliy sen'itimizning warislirini yétishtürüp chiqish arqiliq awstiraliyening herqaysi sheherliride konsértlarni uyushturup, milliy sen'itimizni tereqqiy qildurush bilen birge milliy kimlikimizni tonushturush we dunyaning herqaysi jayliridiki Uyghur sen'etkarlar bilen dostane munasiwet ornitishtur."

Shöhret ependi yene nöwette Uyghur élide milliy sen'etning yoqilish girdabigha bérip qalghanliqi sewebidin muhajirettiki shara'itlardin paydilinip milliy sen'etning dawam qilishining zörürlüki heqqidimu toxtilip mundaq dédi: "Hazir xitay Uyghur medeniyitini tüptin yoqitishqa urunuwatidu, biz muhajiret hayatimizdiki shara'itlirimizdin paydilinip, xitayning milliy sen'itimizni, medeniyitimizni yoq qilishigha yol qoymaymiz."

Shöhret ependi yene özining dadisi bilen birlikte Uyghur élidiki nurghun sen'etkarlarning xitayning ziyankeshlik qilishi bilen nabut bolghanliqi heqqidimu toxtilip mundaq dédi: "Xitay tarixtin buyan nurghun sen'etkarlirimizni herxil bahaniler bilen nabut qildi. Shu qatarda dadammu Uyghurlarning bir sen'etkari bolush süpiti bilen türmige tashlandi we türmidin chiqip, uzun ötmey wapat boldi. Bularning hayatining bundaq paji'e bilen axirlishishigha xitay hökümiti sewebchi boldi."

Sidnéydiki péshqedemlerdin démiyan ependi muqamning milliy medeniyetni saqlashtiki roli heqqide toxtilip mundaq dédi: "Muqam milliy medeniyitimizning muzikiliq sadasi. Hazir xitay Uyghur medeniyiti, edebiyati we sen'itini yoq qiliwatidu. Mushundaq bir weziyette sidnéyda muqam ansambilining qurulushi muhajiret hayatimizda milliy medeniyitimizning mewjut bolushi üchün nahayiti muhim ehmiyetke ige."

Démiyan ependi yene Uyghurlarning medeniyitini awstraliye jem'iyitige tunushturushning ehmiyiti heqqidimu toxtilip mundaq dédi: "Awstiraliye bir démokratik dölet bolghanliqi üchün bu yerde köp xil medeniyetler birge mewjut bolup turmaqta. Biz awstiraliye jem'iyitining yadroluq qimmet qarashlirini qobul qilish bilen birge özimizning medeniyitinimu bashqilargha tunushturush arqiliq mewjutluqimizni bashqilargha shundaqla xitaylarghimu jakarlaymiz."

Awistiraliyediki siyasiy pa'aliyetchi nurgül xanim muqamning saqlinip qélishining muhimliqi heqqide toxtilip mundaq dédi: "Shöhret ependining muqam ansambilini qurushi méni nahayiti söyündürdi, bu muqam ansambilining qurulushi muhajiret hayatimizda milliy medeniyitimizning rawajlinishigha zor töhpe qoshidu dep qaraymen."

Awstiraliyediki "Uyghur muqam ansambili" ning qurghuchisi shöhret ependi uzundin buyan awstiraliyening herqaysiy sheherliride Uyghur naxsha-muzikilirini tunushturghan, köp qétim sen'et kéchiliklirini ötküzüp, awstiraliye jem'iyitide zor alqishlargha érishken iken.

Pikirler (0)
Share
Toluq bet