Австралийә парламентида уйғур дияридики мәҗбурий әмгәк темисида гуваһлиқ бериш йиғини чақирилди

Мухбиримиз әзиз
2021-04-27
Share
mejburiy-emgek-kiyim-tikish-zawuti.jpg Хотәндики мәлум бир завутта ишләватқан уйғур ишләмчиләр.
Social Media

Америка һөкүмити башчилиқидики бир қисим ғәрб дөләтлири уйғур дияридики ирқий қирғинчилиқ вә мәҗбурий әмгәк мәсилиси тоғрисида бир қатар кәскин қарарларни алғандин кейин буниңға аваз қошидиғанлар барғансери көпийишкә башлиди. Болупму мәҗбурий әмгәк һәмдә униңға четишлиқ тәминат зәнҗири ғәрб дунясиниң истемал базиридики көплигән саһәгә биваситә четилидиған болғачқа һәрқайси дөләт һөкүмәтлири бу мәсилидә охшимиған дәриҗидә өз пикирини ипадиләватқанлиқи мәлум. Әнә шу хил җиддий инкасларниң бири 27-апрел күни австралийә ташқи ишлар, мудапиә вә сода комитети саһибханилиқида австралийә парламентида өткүзүлгән уйғур дияридики мәҗбурий әмгәк темисидики гуваһлиқ бериш йиғинида оттуриға чиқти.

Йиғинда алди билән австралийә парламентиниң сенатори, австралийә хизмәт министирлиқиниң сабиқ министири ерик абетз әпәнди сөз алди. У йиғин риясәтчиси болуш сүпити билән бу қетимқи муһакимидә уйғурларниң мәҗбурий әмгики бәдилигә пүтүп чиққан мәһсулатларниң австралийә таможнисидин өтүшини мәни қилиш һәққидики қанун лайиһәси тоғрисида муһакимә болидиғанлиқини тәкитлигәч бу қетимқи йиғинда гуваһлиқ бәргүчиләрни бир-бирләп сөзгә тәклип қилди. Алди билән америкадики йетиливатқан яш уйғуршунас дәррен байлер видйо арқилиқ йиғинға иштирак қилди һәмдә муһим сөз алди.

У 2016-йилидин башланған сииясий бастуруш әһвалиниң зор көләмлик лагерға тәрәққий қилиши, лагерлардики "қайта қуруш урунушлири" ниң уйғур җәмийитигә қандақ паҗиәләрни елип кәлгәнлики, буниңға әгишип хитай һөкүмитиниң "намратлиқни түгитиш" намида лагерлардин "оқуш пүттүрүп чиққан" тутқунларни һәмдә аталмиш "ешинча әмгәк күчлири" ни мәҗбурий йосунда һәрқайси завутларға "хизмәт" кә орунлаштурғанлиқи қатарлиқ җәрянни тонуштуруп өтти.

Бу қетимқи гуваһлиқ бериш нәқ мәйдан йиғиниға иштирак қилған йәнә бир муһим шаһит австралийә истратегийәлик сиясәт инисититути 2020-йили елан қилған "сетиливатқан уйғурлар" намлиқ зор һәҗимлик доклатниң апторлириниң бири, хитай өктичи зиялийлиридин викий шү иди. У сөзидә хитай һөкүмитиниң уйғурларни нәччә миңлап хитай өлкилиригә йөткәп мәҗбурий әмгәккә салғанлиқи, буниң дуняви даңлиқ маркиларниң тәминат зәнҗири билән болған бағлиниши, бу завутлардики уйғур ишчиларниң һәрбийчә шәкилдә башқурулидиған муһитта мәҗбурий әмгәккә қатнишиши, ғәрб дунясидики көплигән ширкәтләрниң әрзан әмгәк күчи елип кәлгән иқтисадий мәнпәәткә мәптун болуп, бу хилдики мәҗбурий әмгәккә шерик болуватқанлиқи һәққидә тәпсилий мәлумат бәрди.

Австралийә латроб университетиниң профессори җеймис лейболдму бу қетимқи йиғинда гуваһлиқ бәрди. У сөзидә кишилик һоқуқни көзитиш тәшкилати өткән һәптә елан қилған доклатни мисал қилип туруп хитай һөкүмити садир қиливатқан инсанийәткә қарши җинайәтлириниң уйғурларни қандақ паҗиәләргә мәһкум қиливатқанлиқи, әмма нөвәттә бу киризисни һәл қилишниң удулла иҗра қилғили болидиған бирәр чарисиниң йоқ икәнлики, шундақтиму нөвәттики мәвҗут икәнлики көпләп мәлум болуватқан мәҗбурий әмгәк мәһсулатлирини һәмдә пахта мәһсулатлирини нишанлиқ мәни қилишниң хитайниң муһим сода шерики болған австралийә һөкүмити үчүн муһим тәдбирләрдин һесаблинидиғанлиқини көрсәтти. .

Уларниң гуваһлиқ сөзлиридин кейин австралийә парламентиниң әзалири уйғур дияридики мәҗбурий әмгәккә даир көплигән соалларни сориди. Шаһитлар өзлири игә болған маддий испатлар вә һөҗҗәтләр асасида бу соалларға җаваб бәрди.

Гуваһлиқ бериш йиғининиң иккинчи бөлүки қисқа дәм елиштин кейин йәнә давам қилди. Бу бөләктә уйғур дияридики сиясий бастуруш вә тутқун әһвали билән яхши тонушлуқи болған уйғур гуваһчилар гуваһлиқ бәрди. Болупму "австралийә уйғурлири тәңритағ аяллар җәмийити" ниң рәиси рамилә чанишеф ханимниң сөзлири йиғин әһлигә алаһидә тәсир қилди. У австралийәдики уйғурларниң һечқандақ ташқи күчләрниң тәрбийәлиши яки қизиқтуруши болмиған һаләттә һәммәйләнниңла паалийәтчи болуп кетиватқанлиқини, буниңдики әң муһим сәвәбниң нөвәттә милйонлап лагерларға қамилип, роһий вә җисманий җәһәтләрдин еғир азаб тартиватқан қовм-қериндашлириниң паҗиәси икәнликини, чүнки австралийәдики уйғурларниң ичидә уруқ-туғқанлири лагерларға қамалмиған бирму аилә йоқлуқини баян қилип өтти. У йәнә сөзиниң давамида хитай һөкүмити иҗра қиливатқан уйғурларға қарши ирқий қирғинчилиқ қилмишиниң нөвәттә уйғурларни мәҗбурий әмгәккә селишни адәткә айландурувалғанлиқи, буниң бәдилигә пүтүп чиққан мәһсулатларниң хитайдики тәминат зәнҗири арқилиқ ғәрб дунясиға, җүмлидин австралийә базириға еқип кириватқанлиқи, нөвәттә буниң испатлириниң тағдәк дөвилинип болғанлиқини, хитай һөкүмити австралийәни бозәк қилишқа урунуватқан һәмдә уйғур паҗиәси нөвәттә әң юқири пәллигә чиқиватқанда бу хил мәҗбурий әмгәкләрни кәскин вә әмили тәдбирләр арқилиқ чәкләшниң тәхирсиз болуватқанлиқини шәрһлиди. Шуниңдәк австралийәниң мәвҗут қанунлириниң бу хилдики мәҗбурий әмгәкни һәмдә буниңдин һасил болған мәһсулатларни мәни қилиштәк пәвқуладдә ролини җари қилдуруш лазимлиқини көрситип өтти. .

Шу қатарда "австралийә шәрқий түркистан җәмийити" ниң рәиси нурмуһәммәд миҗит, "викторийә уйғур җәмийити" ниң рәиси алим осман қатарлиқ уйғур шаһитларму уйғур дияридики сияисй контроллуқ, зор көләмлик бастуруш, мәҗбурий әмгәкниң кеңийиши қатарлиқ темилар бойичә өз қарашлирини баян қилип өтти.

Йиғинниң кейинки бөликидә австралийә һөкүмитидики министирлиқларниң мәсуллири, һәр саһә хадимлири, адвокатлар бирдәк охшимиған нуқтилардин пикир қилип, мәзкур қанун лайиһисини қоллайдиғанлиқи һәмдә уни һимайә қилидиғанлиқини билдүрди. Мәлум болушичә, бу қанун лайиһиси рәсмий қанунға айланса у һалда мәҗбурий әмгәккә четишлиқ хитай маллириниң австралийәгә еқип кириши пүтүнләй мәни қилинидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт