Almas bilen sadamning a'ile paji'eliri awstraliye xelqining hésdashliqini qozghidi

Ixtiyariy muxbirimiz uchqun
2019-07-29
Élxet
Pikir
Share
Print
Almas we sadam xelq'ara kechürüm teshkilatining orunlashturushi bilen awistiraliye parlaméntida bir qisim parlamént ezaliri bilen körüshti. 2019-Yili 24-iyul.
Almas we sadam xelq'ara kechürüm teshkilatining orunlashturushi bilen awistiraliye parlaméntida bir qisim parlamént ezaliri bilen körüshti. 2019-Yili 24-iyul.
RFA/Uchqun

Yéqindin buyan awstiraliyediki nopuzluq taratqularda qiziq nuqta bolup kéliwatqan almas we sadam 24-iyul xelq'ara kechürüm teshkilatining orunlashturushi bilen awistiraliye parlaméntida bir qisim parlamént ezaliri bilen körüshken. Xelq'ara kechürüm teshkilatining awstiraliyediki mes'uli kilayir mallnson xanim 24-iyun awstiraliye parlamént binasi aldidiki chimliqta ötküzülgen muxbirlarni kütüwélish yighinida söz qilip, Uyghur mesilisi shundaqla almas bilen sadam ikkiylenning a'ile paji'esi üstide alahide toxtalghan.

Klayir xanim mundaq dégen: "Hemminglarning bilginidek hazir shinjangda kishilik hoquq krizisi yüz bériwatidu. Xelq'ara kechürüm teshkilatining tetqiqatigha qarighanda, u yerde 2 milyondin artuq adem tutulghan we qamalghan. Bu ademler atalmish "Qayta terbiyelesh lagér" lirigha qamalghan. Ularning beziliri awstraliye puqraliri. Méningche, az dégendimu 10 neper awstraliye puqrasining a'ililiri judaliqta yashimaqta. Sadam we almas bashqilarning béshigha kélip baqmighan, yürekni tilghudek kechürmishlerni yashawatidu, ular ayali we baliliridin juda bolup turuwatidu."

Kilayir xanim yene awstraliye puqralirini xelq'ara kechürüm teshkilatining tor békitidiki almasning ayalining qoyup bérilishi heqqidiki muraji'etnamige imza qoyushqa seperwerlik qilip mundaq dégen: "Eger siler almasqa yardem qilip, uning ayalining quyup bérilishini xalisanglar, xelq'ara kechürüm teshkilatining tor békitige chiqip bu toghrisidiki muraji'etnamige imza qoyushunglarni ümid qilimen."

Arqidin sadamning adwokati maykil biredlimu söz élip mundaq dégen: "Bügün sadam we almasqa yardem qilip, parlaménttiki bezi siyasiyonlar bilen körüshmekchimiz. Emeliyette bu bir siyasiy yaki gi'o-siyasiy murekkep bir mesile emes, peqet ularning a'ilisige munasiwetlik addiyla bir mesile. Sadam awstiraliye puqrasi bolup, uning ikki yashqa kirgen oghli bilen ayali shinjangda qapsilip qaldi. Biz awstiraliye hökümitining awstiraliye puqralirining a'ilisi bilen jem bolushigha küch chiqirishini soraymiz."

Adwokat maykilning arqisidin awstiraliyediki dangliq putbolchi kréyg fostér söz qilip, , mundaq dégen: "Men bügün bu ikki yigit bilen körüshkinimdin intayin xursenmen. Bu ikkiylenning insanni lexte-lexte hékayiliri bar. Awstiraliyeliklerning almasqa yardem qilip muraji'etnamige imza qoyushi 25000 kishidin ashti. Sadamning hékayisi ötken hepte awstiraliye jem'iyitining küchlük qollishigha érishti. Yéqinda qoyulghan 'töt doqmush' programmisida shinjangda yashawatqan Uyghurlarning yürekni ezgüdek hékayiliri bar, men pütün awstiraliye puqralirining bu ikki yashning a'ilisi bilen jem bolushigha küch chiqirishini ümid qilimen."

Muxbirlarni kütüwélish yighinidin kiyin almas we sadam yuqiriqi üch kishining hemrahliqida parlaménttiki bir qisim shexsler bilen körüshken. Almas nizamidin bu heqte 24-iyul awstraliye parlaméntidiki pa'aliyetliridin uchur bérip mundaq dédi: "7-Ayning 24-küni awstiraliyening paytexti kanbérradiki parlamént binasida muhim uchrishishlarda bolduq. Bu uchrishishni xelq'ara kechürüm teshkilati orunlashturghan idi. Biz parlaménttiki herqaysi partiyelerning wekilliri we bir qisim shexsler bilen a'ilimizning mesilisi heqqide söhbetleshtuq."

Almas nizamidin yene mezkur uchrishishning ehmiyiti heqqidimu toxtilip mundaq dédi: "Uchrishishimiz nahayiti qizghin dawamlashti. Ishchilar we yéshillar partiyesi wekilliri bizni qollaydighanliqini bildürdi shundaqla qolidin kélishiche yardem qilidighanliqini bildürüshti."

Sadam abdusalam parlaménttiki uchrishishta otturigha qoyghan telepliri heqqide toxtilip mundaq dédi: "Oghlum gerche xitayda tughulghan bolsimu, u bir awstiraliye puqrasi. Awstiraliyening qanuni boyiche puqralarning a'ilisini jem qilip bérishi kérek, menmu ulardin a'ilemni ekélip bérishni soridim."

Sadam yene parlaménttiki munasiwetlik kishilerning özlirining ishlirigha tutqan pozitsiyesi heqqidimu toxtilip mundaq dédi: "Hazirqi hakimiyettiki partiye we bashqa partiyeler bolsun, hemmisi bizge hésdashliq qilidighanliqini, qolidin kélishiche yardem qilidighanliqini éytti."

Almas nizamidinning ayali buzeynep abduréshit 2017-yili misirdin Uyghur élige qaytqinida 7 yilliq qamaq jazasigha höküm qilin'ghan. Almasning apisi zulpiye jalalidin 2018-yili yanwardin étibaren tutup tekshürülmekte iken.

Sadam abdusalam bolsa 2016-yili ürümchide toy qilghan bolup, 2017-yili tughulghan oghli lutfi bilen hazirgha kelgüche yüzturane körüshüp baqmighan iken.

Toluq bet