30 Ammiwi teshkilat bilen 5 neshriyat axbarat élan qilish yighini chaqirip: "Xitay irqiy qirghinchiliqni toxtat" dédi

Ixtiyariy muxbirimiz erkin tarim
2021-04-13
Share
30 Ammiwi teshkilat bilen 5 neshriyat axbarat élan qilish yighini chaqirip: Enqerening merkizidiki ulus meydanida türkiyening her qaysi jayliridin kelgen 30 ammiwi teshkilat bilen 5 neshriyat orginining mes'ulliri chaqirghan axbarat élan qilish yighinidin körünüsh. 2021-Yili 12-aprél, türkiye.
RFA/Erkin Tarim

12-Aprél küni türkiyening paytexti enqerening merkizidiki ulus meydanida türkiyening her qaysi jayliridin kelgen 30 ammiwi teshkilat bilen 5 neshriyat orginining mes'ulliri axbarat élan qilish yighini chaqirip, xitay hökümitini irqiy qirghinchiliqni toxtitishqa, türk hökümitini Uyghurlargha ige chiqishqa chaqirdi.

Ötüken medeniyet-ma'arip jem'iyiti, tulpar milletchiler jem'iyiti we dunya Uyghur qurultiyi qatarliq 30 teshkilat bilen 5 neshriyat birlikte uyushturghan pa'aliyetke, qeyseri, istanbul, bursa we enqeredin kelgen ammiwi teshkilat mes'ulliridin sirt enqerediki Uyghur teshkilatlirining mes'ullirimu ishtirak qildi. Korona wirusi tüpeyli köp kishining qatnishishi cheklimige uchridi.

Birqanche téléwiziye we gézit-zhurnallarning we döletlik axbarat orgini bolghan anadolu xewer agéntliqining muxbirlirimu ishtirak qilghan axbarat élan qilish yighinida qolida ay yultuzluq kök bayraq bilen türk bayriqi kötürüwalghan namayishchilar otturisida turghan ötüken medeniyet we ma'arip jem'iyiti re'isi ishil esgin xanim muxbirlargha bayanat bérip, mundaq dédi: "Qimmetlik muxbirlar, hörmetlik her qaysi ammiwi teshkilatlarning mes'ulliri, qimmetlik qollighuchilar, hemminglargha hörmet we éhtiramimni bildürimen. Biz bügün türk milletchi teshkilatliri we birqisim sherqiy türkistan ammiwi teshkilatliri, xitayning sherqiy türkistanliq qérindashlirimizgha élip bériwatqan irqiy qirghinchiliqini 'toxtat' déyish, shundaqla türkiye hökümitini, türkiye parlaméntini, siyasiy partiyelerni, türk xelqini sherqiy türkistan xelqige ige chiqishqa chaqirish üchün bir yerge jem bolduq. Bügün bu yerde biz aldi bilen xitayning Uyghurlargha élip bériwatqan bésim siyasitini eyiblesh bilen birlikte türkiye hökümitini derhal heriketke ötüshke chaqirimiz".

Ishil esgin xanim bayanatida 1949-yilidin buyan xitayning Uyghurlarni assimilyatsiye qilishqa tirishiwatqanliqini, kéyinki 4 yilda buning irqiy qirghinchiliqqa aylan'ghanliqini, shunga bezi döletlerge oxshash türkiye hökümitiningmu derhal heriketke ötüshi kéreklikini tekitligendin kéyin, türkiye hökümitining türkiyede téxi türk puqrasi bolalmighan barliq Uyghurlargha derhal puqraliq bérishi kéreklikini otturigha qoydi.

Enqerede ötküzülgen namayishqa qatnashqan kishiler qollirida "Ishghalchi xitay sherqiy türkistandin yoqal, sherqiy türkistan'gha musteqilliq, jaza lagérliri taqiwétilsun, türkiye uxlima qérindashliringgha ige chiq, qatil xitay sherqiy türkistandin yoqal" dégen sho'arlarni towlashti.

Namayish axirlashqandin kéyin mikroponimizni namayishni uyushturghan ishil esgin xanim we tulpar milletchiler teshkilati re'isi wolqan qaradawut ependi we bezi namayishchilargha uzattuq. Enqerediki Uyghur medeniyet merkizi mes'uli abdulxemit ependi bu namayish arqiliq 30 teshkilat 5 neshriyat organining mes'ullirining bir yerge jem bolup Uyghurlarni qollaydighanliqini ipadiligenlikini bayan qildi.

Ishil esgin xanim bügünki namayishni uyushturushtiki meqsitige yetkenlikini bayan qilip mundaq dédi: "Türkiyede her xil témilarda dawamliq bundaq axbarat élan qilish pa'aliyetliri bolidu, emma heqiqeten irqiy qirghinchiliqqa uchrawatqan sherqiy türkistanliqlar üchün dawamliq bundaq pa'aliyetler bolmaydu. Biz mezlum sherqiy türkistan xelqining awazi bolushqa tirishiwatimiz, buningdin kéyin dawamliq halda bundaq pa'aliyetlerni élip barmaqchimiz".

12-Aprél küni türkiye paytexti enqerede ötküzülgen axbarat élan qilish yighinigha bursa shehiride pa'aliyet élip bériwatqan iraqtiki türkmenler jem'iyiti bashliqi isam abdulqadir ependimu ishtirak qildi. U, pa'aliyettin kéyin öz tuyghulirini bayan qilip mundaq dédi: "Bügün bek yaxshi pa'aliyet boldi. Pa'aliyetke sherqiy türkistanliq, qazaqistanliq qérindashlirimizmu qatnashti. Biz iraqning kerkük we musul wilayetliridin kelgen türkmenlermu qatnashtuq. Hemmimiz sherqiy türkistanliq qérindashlirimizning heqqaniy dewasini qollaydighanliqimizni bayan qilishtuq. Biz Uyghur qérindashlirimizni axirghiche qollaymiz. Xitayni her yerde her da'im eyibleymiz. Uyghur qérindashlirimiz öz wetinide erkin yashash hoquqigha ige bolghuche ularni qollaymiz".

Tulpar milletchiler teshkilatining re'isi wolqan qaradawut ependi "Bügün meqsitinglargha yettinglarmu?" dégen so'alimizgha mundaq jawab berdi: "Meqsitimizge yettuq dep oylaymen. Chünki axbarat élan qilish pa'aliyitimiz yaxshi ötti. Xudayim buyrusa bu teshkilatlar dawamliq bir yerge jem bolup sherqiy türkistanliq qérindashlirimizning awazi bolushqa dawam qilimiz".

Bügün, yeni 12-aprél küni enqere ulus meydanida Uyghurlarni qollap pa'aliyet élip bériwatqan 5 neshriyat bilen 30 ammiwi teshkilat burun türkiyening herqaysi jaylirida Uyghurlarni qollap ayrim-ayrim pa'aliyet élip barghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet