Aygül memet: "Men her bir sehnide Uyghurlarning erkinlik iradisini namayan qilishqa tirishiwatimen!"

Muxbirimiz gülchéhre
2021-11-10
Share
aygul-memet-2019-oyun-korsitish.jpg Sérk artisi aygül memet amérika döletlik waskétbol jem'iyitining torontoda ötküzülgen musabiqe jeryanida, teklip bilen bir meydan oyun körsetti. 2019-Yili 7-may, kanada.
RFA/Gülchéhre

Amérika döletlik waskétbol jem'iyitining derijidin tashqiri kespiy musabiqisi 29-öktebir torontoda ötküzülgen. Ashu bir meydan musabiqe ariliqida "Uyghur dégen mushundaq" dégen naxsha yangrishi bilen neq meydandiki chong ékranda Uyghur sérk artisi aygül memetning simasi körün'gen. Aygül memetning naxshigha jör bolup, Uyghur ussuli kirishtürülgen chembirek oynitish mahariti neq meydandiki kishilerni chongqur hayajan'gha salghan. Bu, yillardin öz talanti we mahariti arqiliq Uyghurlarni tonutup kéliwatqan aygül memetning toronto tenterbiye sariyida 14-qétim maharet körsitishi iken. Ziyaritimizni qobul qilghan aygül: "Men her bir sehnide Uyghurlarning sen'itinila emes, belki yene ularning erkinlik iradisini namayan qilishqa tirishiwatimen," dédi. Qéni undaqta, muxbirimiz gülchéhrening aygül memet bilen ötküzgen mexsus söhbitige ishtirak qiling.

Aygül memet ösmür waqitliridin bashlapla Uyghur élidiki sehnilerde körünüshke bashlighan. U ilgiri xitay boyiche ötküzülgen memliketlik we xelq'araliq sehnilerde özining yuqiri mahariti bilen nurghun sherepler quchqan. U kanadagha kélishtin ilgiri döletlik 1-derijilik sérk artisi, Uyghur sérk cholpini dégen namlargha érishken. Aygül memet 2004-yili xitay hökümiti teshkilligen sérk ömiki terkibide kanadagha oyun qoyushqa kelginide, kanada hökümitidin siyasiy panahliq tilep qep qalghan 7 neper Uyghur sérk artisining biridur. U hazirgha qeder, özining sérk kespini dawam qilip kelgendin bashqa yene torontoda mexsus sérk we gimnastika tenheriket türliride izbasarlarni terbiyilesh bilen shughullanmaqta.

-29 Öktebir küni kanadaning toronto sheher merkizidiki eng chong tenterbiye zalida ötküzülgen amérika döletlik waskétbol jem'iyitining bu nöwetlik derijidin tashqiri waskétbol kespiy musabiqisi, toronto reptérs komandisi bilen amérika "Orlando megik" komandisi arisida bolup ötken. Her qétimliq derijidin tashqiri waskétbol musabiqiliri her qaysi téléwiziye qanallirida birla waqitta dunyagha neq meydandin tarqitilidu. Mezkur musabiqini yene 20 mingdin artuq adem neq meydandin köreleydu. Aygül memet torontodiki bu musabiqe meydanida 2017 yili noyabirda tunji meydan oyun körsetken idi. Bu uning 14-qétim teklip bilen oyun körsishi bolup, u emdiki sehnilerde kök bayraqni lepilditish istikini emelge ashurush üchün izdenmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet