Lagérda ölgen aytursunning anisi: "Saqchilar manga mejburiy imza qoyghuzdi, jesetni toluq körsetmidi"

Muxbirimiz shöhret hoshur
2019-06-19
Élxet
Pikir
Share
Print
Lagérda ölgenliki delillengen xu'a en sayahet shirkitining mu'awin diréktori aytursun éli.
Lagérda ölgenliki delillengen xu'a en sayahet shirkitining mu'awin diréktori aytursun éli.
Photo: RFA

Uyghur aptonom rayonluq ayallar birleshmisige a'it ikenliki ilgiri sürülgen awaz xatirisidin melum bolushiche, lagérda ölgen aytursun élining anisi patigül yasin doxturxanigha élip kélin'gendin kéyin saqchilar uninggha qizining jesitining yüz qisminila körsetken, bedenning qalghan qismini körsetmigen. Buninggha narazi bolghan patigül yasin saqchilarning alaqidar resmiyet qeghezlirige qol qoyushni ret qilghan. Bu chaghda saqchilar patigül yasinni qolidin tutup resmiyetlerge mejburiy imza qoyghuzghan.

Mezkur awaz xatirisidin melum bolushiche, aytursunning anisi doxturxanigha élip kélin'gendin kéyin saqchilar uninggha yüz bergen ehwaldin héchqandaq melumat bermey turup, uning qizining qorsiqini yérishqa qoshulidighan yaki qoshulmaydighanliqini, yeni qanun doxturining jesetni tekshürüshini telep qilidighan yaki qilmaydighanliqini sorighan. Aytursunning anisi patigül yasin "Yaq" dégendin kéyin uninggha qizining ölgenlikini éytqan. Saqchilar uninggha eger ghowgha chiqarmisa, jesetni körsitidighanliqini, undaq bolmisa jesetni körsetmestinla kömüwétidighanliqini bildürgen. Charisiz ana qizining ölüm sirini bilish meqsitide jesetni körüp baqmaqchi bolghan we ghowgha chiqarmasliqqa wede bergen. Emma saqchilar uninggha qizining peqetla yüz qismi körsetken, jesetning bashqa qismini körüshige ruxset qilmighan.

Saqchilar aytursunning ölüm sewebi süpitide uning salametlikining ajizliqi we soraqqa berdashliq bérelmigenlikini éytqan. Patigül yasin qizining qéyin-qistaq bilen ölgenlikini perez qilip, saqchilarning bayanlirigha ishenmigen we saqchining alaqidar resmiyet qeghezlirige imza qoyushni ret qilghan. Bu chaghda saqchilar uning qolidin tartip we tügiwalghan barmaqlirini mejburiy échip qeghezlerge imza qoyghuzghan. Saqchilar yene xata kimlik melumatliri bilen toldurulghan bir waraq doxtur ispatnamisini bergen. Eslide aliy melumatliq bolghan, xitayche, yaponche we in'glizche bilidighan aytursun éli bu ispatnamide "Sawatsiz" dep yézilghan. Mezkur ispatnamide uning töt xil yürek késilining barliqi qeyt qilin'ghan.

Uyghur aptonom rayonluq ayallar birleshmisi mezkur awaz xatirisi we aytursunning ölüm heqqide melumat bérishni izchil halda ret qildi. Biz aytursunning lagérda ölgenlikini delilligen qeshqer xu'a'en sayahet shirkitidin aytursunning hayat mezgilidiki salametlik ehwali heqqide melumat soriduq. Alaqidar xadim aytursunning ilgiri birer késili barliqidin xewersizlikini éytti. Mezkur awaz xatiriside aytursunning anisi patigül yasinmu qizining saghlam bir ayal ikenlikini, xizmette janliq we aktipliqini, ilgiri doxturxanida yétip baqmighanliqini bayan qilghan. 

Hörmetlik radi'o anglighuchilar, yuqirida qeshqer xu'a'en sayahet shirkitining sabiq mu'awin diréktori aytursun élining lagérda ölgenliki heqqidiki chatma xewirimizning ikkinchi qismini diqqitinglargha sunduq.

Toluq bet