Әсқәр җан "асасий қанун медалини" баварийә парламенти рәисиниң қолидин тапшуривалди

Ихтиярий мухбиримиз әркин тарим
2021-06-29
Share
Әсқәр җан Әсқәр җан әпәнди германийә федератип җумһурийитиниң баварийә штати парламенти тәрипидин тәсис қилинған "асасий қанун медали" ни тапшуруп алди. (Оңдин солға) баварййә парламенти рәиси илсә илсә аигнәр, әсқәр җан, баварййә парламенти муавин рәиси муавин рәиси маркус риндәрспачер. 2021-Йили 26-июн, германийә.
RFA/Erkin Tarim

Уйғур мәсилиси хәлқаралашқан бүгүнки күндә дуня уйғур қурултийиниң явропадики сиясий ишлириға мәсул вәкили, явропа шәрқий түркистан бирлики рәиси әсқәр җан әпәнди германийә федератип җумһурийитиниң баварийә штати парламенти тәрипидин тәсис қилинған "асасий қанун медали" ни тапшуруп алди.

Мәзкур медал явропаниң ваз кәчкили болмайдиған қиммәт қарашлири болған демократийә, әркинлик, инсанпәрвәрлик, кишилик һоқуққа төһпә қошқан кишиләргә берилидиған болуп, уйғур паалийәтчи әсқәр җан әпәнди мәзкур "медал" ға мувапиқ көрүлгән. 26-Июн күни өткүзүлгән медал тарқитиш йиғинида һәр саһәдә хизмәт көрсәткән кишиләргә медал тарқитип берилгән. Чәтәлдин келип йәрләшкәнләр арисида пәқәтла әсқәр җанниң мәзкур мукапатқа еришиши кишиләрниң диққитини тартқан.

Мәзкур мурасимға корона вируси түпәйли чәклик санда киши иштирак қилған болуп, тор арқилиқ нәқ мәйдандин тарқитилған мурасимға баварййә парламенти рәиси илсә аигнәр ханим, муавин рәиси маркус риндәрспачер әпәнди қатнашти вә муһим сөз қилип, әсқәр җанниң демократийә һәм кишилик һоқуққа қошқан төһписи һәққидә тохталди.

Әсқәр җан әпәнди тапшуруп алған, германийә федератип җумһурийитиниң баварийә штати парламенти тәрипидин тәсис қилинған

Баварийә штати парламентиниң рәиси илсә аигнәр ханим әсқәр җан әпәндини медални елиш үчүн сәһнигә тәклип қилип мунуларни деди: "һөрмәтлик әсқәр җан, сиз германийә мюнхенға дәсләптә кәлгән уйғурлардин бири. Сиз кәлгән вақтида германийәдә пәқәтла 10-15 нәпәр уйғур бар икән. Сиз узун йиллардин буян германийәдә уйғур җамаитиниң бәрпа болуши үчүн тиришиветипсиз. Униң үстигә германийәниң қиммәт қариши болған кишилик һоқуқ, әркинлик вә демократийә үчүн көп хизмәтләрни қилдиңиз. Буни һармай-талмай узун йил давамлаштурдиңиз. Сизниң вәтиниңизниң вәзийитиниң қанчилик еғир икәнликини билимиз, сиз миллитиңизниң еғир вәзийитини аңлитиш үчүнму зор төһпиләрни қоштиңиз. Бу хизмәтләрни узун йил пидакарлиқ билән қилғанлиқиңиз үчүн баварийә парламентиниң әң алий мукапатини беришни қарар қилдуқ".

Баварийә парламентиниң йиғин залида өткүзүлгән мукапат тарқитиш йиғини ахирлашқандин кейин явропа шәрқий түркистан бирликиниң рәиси, д у қ ниң явропадики вәкили әсқәр җан әпәнди билән телефон сөһбити елип бардуқ. У, мукапатни алғандин кейинки туйғулирини баян қилип мундақ деди: "хитай бизгә ирқий қирғинчилиқ елип бериватқан бир пәйттә мәндәк бир уйғурға кишилик һоқуқ, демократийә вә әркинликкә қошқан төһписи үчүн бундақ бир мукапатниң берилиши хитайға берилгән бир сигнал дәп ойлаймән. Буни алғандин кейин һәм өзүм һәмдә уйғурлар намидин бәкла пәхирләндим".

Баварийә парламенти "асасий қанун медали" ни 1959-йилидин тартип тарқитип келиватқан болуп, намзатлар парламент әзалири тәрипидин көрситилгәндин кейин, парламент рәисиниң тәстиқлиши билән берилидикән. Әсқәр җан әпәнди бу һәқтә мәлумат бәрди.

Әсқәр җан әпәндиниң ейтишичә баварийә штатида көп санда милләт хәлқлири яшайдиған болуп, мәзкур медал 62 йилдин буян тунҗи қетим бир чәтәлликкә берилипту. Әсқәр җан әпәнди бу һәқтә мәлумат бәрди.

Әсқәр җан әпәнди узун йиллардин буян дуня уйғур қурултийида һәр хил вәзипиләрни өтәп кәлмәктә. Д у қ рәиси долқун әйса әпәнди әсқәр җанниң бундақ бир мукапатқа еришишидин наһайити хурсән болғанлиқини баян қилди.

Мәзкур медал берилгән кишиләрниң исимлири өткән йили 10-айда җакарланған болуп, "корона вируси" түпәйли мурасим кечиктүрүлгәниди.

Германийә федератсийәси дөлити 10 шитаттин тәркиб тапқан болуп, баварийә штати 15 милйон нопусқа игә, иқтисадий җәһәттин әң күчлүк штатларниң бири һесаблинидикән. Баварийә штатиниң парламенти, һөкүмити, баш министири, өз әдлийәси бар болуп, ички ишларда мустәқил, ташқи сиясәттә германийә федератсийә һөкүмитигә қарайдикән. Баварийәниң мюнхен шәһиридә 2004-йили қурулған дуня уйғур қурултийи билән бурун қурулған явропа шәрқий түркистан бирлики әнгә алдурулғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт