2022-Yilliq béyjing olimpik tenheriket musabiqisi mezkur olimpikni qollighan shirketlerning siniqi bolmaqta
2021.07.27
Amérika dölet mejlisi xitay ishliri komitéti 27-iyul küni xelq'ara olimpik musabiqisining qollighuchi shirketliri bilen tor yighini achti. Yighin'gha Airbnb shirkiti, koka kola shirkiti, intil shirkiti, Procter & Gamble shirkiti we Visa shirkitining wekilliri qatnashti. Amérika dölet mejlisi xitay ishliri komitétining re'isi jéf mérkléy, amérika dölet mejlisi ezaliridin jéymis mekgowrén, kristofér simis we jénnifir wekiston qatarliqlar bu shirketlerdin 2022-yilliq béyjing olimpik tenheriket musabiqisidin chékinishni telep qildi.
2022-Yilliq béyjing qishliq olimpik tenheriket musabiqisining tor bétige qarighanda, 2022-yildiki musabiqining asasliq hemkarlashquchiliri kokakola shirkiti, intil shirkiti, proktor we gembil shirkiti we wiza shirkitini öz ichige alidiken.
Yighinda dölet mejlisi ezaliri ayrim-ayrim söz qilip, bu shirketlerning amérika hökümiti “Irqiy qirghinchiliq” yürgüzüwatidu, dep eyibligen xitayni qollighanliqini eyiblidi. Emma bu shirketler özlirining qollishining kéler yilliq béyjing olimpik tenheriket musabiqisige anche chong tesiri bolmaydighanliqini éytip, 2022-yilliq béyjing olimpik tenheriket musabiqisidin chékinish heqqide soralghan so'allargha udul jawab bérishtin özini qachurdi.
Jéf mérkléy amérika shirketlirining 2022-yilliq béyjing qishliq olimpik tenheriket musabiqisi bilen hemkarlishi'ishi xuddi gitlér rehberlikidiki 1936-yildiki bérlin olimpik tenheriket musabiqisini qollighanliq bolidighanliqini tekitlidi.
U mundaq dédi: “Xitay hakimiyiti öz puqralirigha qarshi dehshetlik siyasetlerni yürgüzüwatidu. Kelgüside weziyet téximu nacharlishishi mumkin. Nöwettiki ehwal 1936-yilidiki bérlindinmu nachar, chünki ‛irqiy qirghinchiliq‚ hazirning özide élip bérilmaqta”.
Yighin'gha qatnashqan shirketlerning wekilliri “Irqiy qirghinchiliq” yürgüzüwatqan bir dölette ötküzülmekchi boluwatqan olimpik musabiqisini qollimasliq heqqidiki pikirlerge nahayiti sus mu'amilide boldi. Ular bu mesilining tenheriket dunyasini we tenheriketchilerni qollash mesilisi ikenlikini tekrarlash arqiliq, 2022-yilliq béyjing olimpik tenheriket musabiqisi jeryanida élan bérip qollashtin waz kéchish toghrisidiki su'allardin izchil özlirini qachurdi.
“Wal sitrét zhurnili” bu yil féwralda élan qilghan maqaliside “2022-Yilliq béyjing olimpik tenheriket musabiqisi olimpik musabiqisini qollighan shirketlerning siniqi” dégenidi.
Komitétning mu'awin re'isi, démokratlar partiyesining wekili jim makgowérn shirketlerge koruna endishisi sewebidin bu oyun'gha qarshi turghan ammining pikirige hörmet qilip tokyo olimpik tenheriket musabiqisi bilen bolghan hemkarliqni emeldin qaldurghan yaponiyening dangliq mashina ishlepchiqarghuchi shirkiti toyotani misalgha aldi. U shirketler xalisa toyota shirkiti qilghandek 2022-yilliq béyjing olimpik tenheriket musabiqisi bilen bolghan hemkarliqni toxtitishning tamamen mumkinlikini tekitlep ötti. Béyjing tenheriket musabiqisining “Soda dégen soda” dep béyjingdiki hökümetning Uyghurlargha yürgüzüwatqan “Irqiy qirghinchiliq” qa köz yumushqa bolmaydighanliqini we olimpik musabiqisining choqum bashqa bir orun'gha yötkesh chaqiriqini tekrarlidi.
U mundaq dédi: “Eger biz tokyoda ötküzülüwatqan olimpikni koruna seweblik bir yil kéchiktüreligen bolsaq, elwette ‛irqiy qirghinchiliq‚ seweblikmu bir yil kéchiktüreleymiz”.
2022-Yilliq béyjing qishliq olimpik tenheriket musabiqisini kéchiktürüsh we yaki xitaydin yötkesh chaqiriqini amérika dölet mejlisidiki jumhuriyetchiler partiyesi we démokratlar partiyesining rehberliri birlikte otturigha qoyghan. Közetküchiler bu Uyghurlargha yürgüzülüwatqan “Irqiy qirghinchiliq” ni her xil yollar bilen toxtitish her qaysi partiyeler birlikte heriket qilidighan ortaq mesilige aylan'ghanliqining ipadisi, dep qarighan.
ABC Agéntliqining 27-iyuldiki xewiride éytilishiche, florida shtatidin saylan'ghan awam palata ezasi maykil waltiz tunji qétim béyjing qishliq olimpik musabiqisini toluq bayqut qilish teshebbusini otturigha qoyghan. Amérika awam palatasining re'isi nensi pélosi xanim bolsa bu yilning béshida bu musabiqini “Diplomatik bayqut qilish” teshebbusini otturigha qoyghanidi.
Mezkur yighin'gha qatnashqan shirketlerning bildürgen ipadiliri heqqide kéyinki programmimizda tepsiliy melumat bérimiz.