Bélgiye parlaménti "Uyghur irqiy qirghinchiliqi" heqqide resmiy qarar élan qilghan

Ixtiyariy muxbirimiz Uyghur'ay
2021-07-08
Share

Bélgiyede yashawatqan Uyghur jama'iti "5-Iyul ürümchi qirghinchiliqi" ning 12 yilliqini xatirilesh, bélgiye parlaméntida "Uyghur irqiy qirghinchiliqi" ni tonush toghrisida resmiy bilet tashlaydighan parlamént ezalirigha medet bérish üchün biryussélda zor kölemlik namayish ötküzgen.

Namayishni bélgiye Uyghur jem'iyiti orunlashturghan bolup, bu namayishqa bélgiyediki Uyghur pa'aliyetchilerdin bashqa bélgiye parlaméntida "Uyghur irqiy qirghinchiliqi" ni otturigha qoyghan bélgiye yéshillar partiyesining wekili samu'él kogolati ependim, bélgiye sotsiyal démokratlar partiyesining wekilliri, shundaqla bu partiyining lidiri exmet ependi qatnashqan. U bu namayishta Uyghurlar heqqide söz qilghan.

Namayishqa jem'iy 150 ke yéqin kishi qatnashqan bolup, bélgiyediki herqaysiy taratqularning muxbirlirimu neq meydandin xewer bergen.

Namayish nahayiti janliq we tertiplik shekilde ötküzülgen. Radyomiz ziyaritini qobul qilghan bélgiye Uyghur jem'iyitining re'isi abdumutellip imirof ependi bügünki namayishning meqsiti we jeryani heqqide melumat berdi.

Bélgiye parlaméntida xitayning Uyghurlargha yürgüzüwatqan zulumlirini "Irqiy qirghinchiliq" dep étirap qilish mesilisi birlikke kelgen bolsimu, emma bu heqtiki qarar resmiy awazgha qoyulup, resmiy axbaratqa élan qilinmighan idi. Xitay hökümiti yéqindin buyan bu heqte bélgiye terepke jiddiy inkas qayturghan bolsimu, emma bélgiye parlaméntidiki herqaysiy partiye wekillirining toluq awaz bérishi bilen bügün, yeni 7-ayning 8-küni bélgiye parlaménti "Uyghur irqiy qirghinchiliqi" heqqide resmiy qarar élan qilghan.

Bu heqte ziyaritimizni qobul qilghan bélgiye Uyghur jem'iyitining wekilliridin ekber tursun ependi melumat berdi.

Melumki, bélgiye parlaménti, amérika, en'gliye, kanada, gollandiye, litwa parlaméntidin kiyin, xitayning Uyghur we bashqa türkiy milletlerge qaratqan basturushlirini "Irqiy qirghinchiliq" dep tonughan 6-dölet bolup qaldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet