Берлинда уйғурларға аит бир йүрүш паалийәтләр елип берилди

Берлинда “уйғур авази” рәсим көргәзмиси, “мениң һәдәм нәдә?” намлиқ филимниң қоюлуш мурасими вә “уйғур сиясий актиплирини тәрбийәләш” курси өткүзүлди.

14-Өктәбир германийә пайтәхти берлиндики америка баш әлчиханисида “уйғур авази” намлиқ рәсим көргәзмиси паалийити өткүзүлди. Бу паалийәтни америка баш әлчиханиси маддий җәһәттин қоллиған, д у қ орунлаштурғаниди. Көргәзмигә америка әлчихана хадимлири, бирқисим дөләтләрниң дипломатлири, америка вә явропа әллиридин кәлгән кишилик һоқуқ палийәтчилири, д у қ хадимлири вә башқа уйғур кишилик һоқуқ актиплири болуп 100 гә йеқин киши қатнашти.

14-Өктәбир чүштин кейин бу паалийәткә улапла, америка баш әлчиханисида йәнә “мениң һәдәм нәдә?” намлиқ һөҗҗәтлик филимниң қоюлуш мурасими өткүзүлди. Мурасим муқәддимисидә американиң берлиндики вақитлиқ баш әлчиси кларик пирс, д у қ рәиси долқун әйса вә уйғур һәрикити тәшкилатиниң рәиси рушән аббас ханимлар ечилиш нутуқлири сөзлиди. Уйғурларниң нөвәттики вәзийити әтраплиқ йорутуп берилгән 75 минутлуқ бу филим кишиләрни қаттиқ тәсирләндүрди.

15-Өктәбир берлиндики “парк ин” меһманханисида “уйғур сиясий актиплирини тәрбийәләш” курси башланди. 2 Күн давам қилидиған бу курсни уйғур һәрикити тәшкилати орунлаштурғаниди. Паалийәт д у қ рәиси долқун әйса әпәндиниң ечилиш нутқи билән башланди.

Бүгүн, 15-өктәбир йәнә берлиндики аликсандер мәйданида “уйғур авази” рәсим көргәзмиси паалийити давамлашмақта.

Биз нәқмәйданда йүрүп, 2 күндин буян бу паалийәтләргә иштирак қиливатқан бирқисим тәшкилат рәһбәрлири вә уйғур сиясий актиплирини зиярәт қилдуқ. Диққитиңлар программимизниң тәпсилий мәзмунлирида болғай.