Xitayning bingtu'en'ge üzlüksiz ishchi-xizmetchi qobul qilish we uni dawamliq kéngeytish istratégiyesi

Muxbirimiz méhriban
2023.04.06
bingtuan-xelqara-yermenke-2.jpg Uyghur aptonom rayonida memuriy, iqtisadiy we herbiy xizmetlerni bir terep qilidighan dölet bashqurushidiki organ -- shinjang ishlepchiqirish qurulush bingtu'eni xitay xelq'ara soda yermenkiside. 2021-Yili 3-séntebir, béyjing.
AP

Uyghur diyarining jenub-shimalidiki eng munbet bostanliqlar bilen su menbeliri igiliwalghan bingtu'enning herqaysiy diwiziye we polk meydanliri yillardin buyan xitay köchmenliri eng köp yötkep kélin'gen yérim herbiy xaraktérliq organdur.

Yéqinqi birnechche yildin buyan, bingtu'en da'irilirining yuqiri mu'ash, yuqiri teminat bilen pütkül xitay miqyasidin bingtu'enning herqaysi déwiziye-polklirigha ishchi-xizmetchi qobul qilidighanliqi heqqidiki élan-teshwiqatlar barghanséri köpeymekte.

Bingtu'en'ge xizmetchi qobul qilish heqqide yéqinda ashkarilan'ghan xewerlerning biri, 1-april küni xitayning “Bingtu'en tori” da élan qilin'ghan.

Xewerde déyilishiche, bingtu'en 12-déwiziyesining ürümchi wujyachü “1-May déhqanchiliq meydani” 24-mart küni ürümchidiki bingtu'en méhmanxanisida xizmetchi qobul qilish seperwerlik yighini öküzgen. Xewerde yene pa'aliyetke bingtu'en 12-déwiziyesige qarashliq on nechche shirket-fabrika we déhqanchiliq meydanidiki 600 nuqtigha xizmetchi xadim qobul qilinidighanliqi bildürülgen.

Mezkur xewerde déyilgen xizmetchi xadim qobul qilish shertliri we xizmetchiler érishidighan teminat heqqidiki tepsilatlarni téximu éniq igilesh üchün, biz bingtüen torida qaldurulghan alaqe nomurigha télifon qilduq.

Téléfonni deslep alghan ayal xizmetchi özining téxnik xadim ikenlikini bildürüp, xizmetchi qobul qilish heqqidiki xewerning tepsilatini igilesh üchün “Bingtu'en géziti” ning tehrir bölümige téléfon qilishimizni bildürdi.

“Bingtu'en géziti” ning er xadimi, bizning “Bingtu'ende xizmetchi qobul qilish yene dawam qiliwatamdu? xizmetchilerning shertliri we érishidighan menpe'etliri qandaq?” dégen so'allirimizni anglighandin kéyin, awwal téléfon nomurini qaldurushni telep qildi. U téléfonning amérikadin urulghanliqini bilgendin kéyin, 1-may déhqanchiliq meydanigha xizmetchi qobul qilish heqqidiki téximu éniq tepsilatlarni 12-déwiziyediki bu ishqa mes'ul xadimliridin igileshni éytip, özining dölet halqighan bundaq prinsipliq mesililerge jawab bérelmeydighanliqini bildürdi.

Arqidin biz ürümchi-sanji etrapigha jaylashqan bingtu'en 12-déwiziyesining “Bingtu'en iqtisasliqlar mulazimet merkizi”, “1-May déhqanchiliq meydani kadirlar bölümi” we meydanning “Ishchi-xizmetchiler mulazimet orni” qatarliq birqanche orunlargha téléfon qilduq.

12-Déwiziye “Ishchi-xizmetchiler mulazimet orni” ning ayal xadimi so'alimizgha jawap bérip, 12-déwiziyening déhqanchiliq meydanlirigha ishchi-xizmetchi qobul qilishning yenila dawam qiliwatqanliqini bildürdi.

Umundaq dédi: “Xizmetchi qobul qilish yenila dawam qiliwatidu. Bizning 12-déwiziyening dölet igiligidiki we shexsiy karxanilarning hemmisi xizmetchi qobul qiliwatidu.”

U iltimas qilghuchilar özining shexsiy alahidiliki, xizmet telipi qatarliqlarni yézip ewetse, ularning alahidiliki boyiche xizmet tonushturulidighanliqi, nöwette 12-déwiziyening özidila nurghunlighan xizmet orunlirining barliqini bildürdi.

Bingtu'en'ge xizmetchi qobul qilish, bingtu'enning teminati we parawanliqi heqqidiki teshwiqat xewerliri yene xitayning “Shigu'a ékrani” namidiki tor taratqusidimu köp tarqalghan.

2-Ayning 6-küni “Shigu'a ékrani” da élan qilin'ghan bir teshwiqat filimide, aliy mektep melumati bolghan, 18 yashtin 35 yashqiche bolghan yashlarning aqsudiki bingtu'en 1-déwiziyesige oqutquchiliq xizmitige tizimlatsa, ayliq mu'ashining 7 ming yüen etrapida bolidighanliqi we bashqa teminatlardin behrimen bolidighanliqi déyilgen.

“Shigu'a ékrani” da 3-ayning 24-küni tarqitilghan “Bingtu'en xizmetchilirining teminati yaxshi” namliq yene bir filimde, bingtu'en'ge xizmetchi qobul qilishning 2018-yildin bashlap kéngeygenliki, bu yilmu dawam qiliniwatqanliqi xewer qilin'ghan. 35 Yashtin töwen bolghanlarning özini tizimlatsa, ulargha 30 modin 50 mogha qeder térilghu yer, méwilik bagh we köchetzarliq qatarliqlarning teqsim qilinidighanliqi tilgha élin'ghan.

Undaqta, xitayning bingtu'en da'iriliri néme üchün yéqindin buyan xizmetchi qobul qilishni yene tézletti? bu heqtiki teshwiqat filimliride yene néme üchün bingtu'enning déhqanchiliq meydanlirigha kélishni xalighanlargha bikarliq térilghu yer, méwilik bagh we turalghu öy qatarliqlar bérilidu? bingtu'enni dawamliq kéngeytish arqiliq xitay hökümiti néme meqsetke yetmekchi?

Dunya Uyghur qurultiyi ijra'iye komitétining mu'awin re'isi ilshat hesenning qarishiche, bu del shi jinping textke chiqqandin buyan otturigha qoyghan atalmish “Bingtu'enni jenubqa kéngeytish” istratigiyesining özi iken.

Ilshat hesen ependi yene shi jinpingning “Bingtu'enni jenubqa kéngeytish, bingtu'en bilen yerlikni birleshtürüsh” namidiki istratégiyelik pilanining otturigha chiqishigha “Uyghurlarning millet süpitidiki mewjutliqi xitay hökümiti üchün tehdit” dep qaralghanliqi seweb bolghanliqini bildürdi.

Uning bildürüshiche, xitay hökümiti yéqinqi birqanche yilda Uyghurlargha qaritilghan irqiy qirghinchiliq siyasitini yürgüzüshte yene Uyghur diyaridiki xitay köchmenlirini téximu köpeytish arqiliq, jenubiy Uyghur diyarini merkez qilghan Uyghurlar nopusini barghanche shalanglashturush, hetta Uyghurlarni xitaylashturup axiriqi hésabta Uyghurlarning millet süpitidiki mewjutluqini yoqitishni meqset qilghan déyishke bolidiken.

Amérikidiki Uyghur kishilik hoquq qurulushining tetqiqatchisi, dunya Uyghur qurultiyining mu'awin re'isliridin biri bolghan zubeyre shemsidin xanimmu ziyaritimizni qobul qilip, Uyghur kishilik hoquq qurulushining mexsus bingtu'en heqqide élan qilghan tetqiqat doklatlirining barlqini bildürdi.

U xitayning yérim herbileshken bu orginining Uyghur diyaridiki munbet zéminlarni igilesh we chégra boylirini boylap qurulush élip bérish arqiliq, atalmish Uyghur aptonum rayonini nazaret qilish, kontrol qilish wezipisini öteydighanliqini bildürdi. U yene bingtu'en qurulghan kündin bashlap, xitay köchmenlirini Uyghur diyarigha köplep yerleshtürüsh arqiliq, rayondiki Uyghurlar nopusini barghanche azaytish, axiriqi hésabta yoqitish wezipisini orundap kéliwatqanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.