Бурһан сети улуғйол: улар атамни қоюп бәрди, әмма аилимиздин 20 адәм тутқунда

Мухбиримиз меһрибан
2019-06-18
Елхәт
Пикир
Share
Принт
Доктор бурһан сетиниң дадиси сети яқуп (солдин 3-киши) ниң лагерға елип кетилгән инилири йүсүп яқуп (солдин 1-киши), әмәт яқуп (солдин 2-киши) вә мәмәт яқуп (солдин 5-киши).
Доктор бурһан сетиниң дадиси сети яқуп (солдин 3-киши) ниң лагерға елип кетилгән инилири йүсүп яқуп (солдин 1-киши), әмәт яқуп (солдин 2-киши) вә мәмәт яқуп (солдин 5-киши).
Photo: RFA

Түркийә истанбул сабаһәттин зайим университетиниң дотсенти  доктор бурһан сети улуғйол әпәнди , зияритимизни қобул қилип, қумул қара дөвә йезисидики уруқ-туғқанлиридин тәхминән 20 кишиниң 2017- йили вә 2018-йил ичидә тутқун қилинип, лагер һәтта түрмиләргә қамалғанлиқидин учур алғанлиқини билдүрди.

Доктор бурһан сети улуғйол әпәндиниң билдүрүшичә, у уруқ-туғқанлири ичидин тутқунда икәнликини ениқлап чиққан 20 кишиниң исмини 6-айниң 17- күни , иҗтимаий таратқулардин фәйсбок, твитер қатарлиқиларға йоллап улар үстидин ашкарә испат бәргән.

Доктор бурһан сети тизимликтики исимлик тәртипи бойичә юрти қумул қара дөвә йезисидики туғқанлиридин  тутқун қилинғанлар һәққидә төвәндикидәк мәлумат бәрди.

Ризвангүл сети. Бурһан сетиниң сиңлиси 2018- йили 12-айда лагерға елип кетилгән .

Исмаил керәм .Ризвангүл сетиниң ери 2017-йили тутқун қилинип 7 йиллиқ кесиветилгән.

Бурһан әпәндиниң билдүрүшичә, униң сиңлиси ризвангүл сети 2018- йил 12- айда тутқун қилинған. Сиңлисиниң ери исмаил керәм болса, хитай сақчилири тәрипидин  сәзгүр шәхс дәп көзитилип, қумулдики бир диний өлимаға у дохтурханидики мәзглидә пул ярдәм қилғанлиқи үчүн тутқун қилинип 7 йиллиқ қамаққа һөкүм қилинған.

Бурһан сети йәнә дадисиниң инилиридин , йәни тағилиридин йүсүп яқуп, әмәт яқуп, мәмәт яқуп қатарлиқ 3 ака-ука , өгәй акиси вә анисиниң ини-сиңиллириниң тутқун қилиниш сәвәблири һәққидә тохталди.

Йүсүп яқуп дадисиниң чоң иниси болуп, бу йил 62 яш , у 2017- йили тутқун қилинип лагерға елип кетилгән.

Ибраһим йүсүп вә  исмаил йүсүп, йүсүп яқупниң оғуллири болуп, улар 2018-йили тутқун қилинип лагерға елип кетилгән.

Ақ айла касип ибраһим йүсүпниң аяли болуп, у 2018- йили тутқун қилинип лагерға елип кетилгән .

Әмәт яқуп, дадисиниң 2- иниси болуп, у қоғун содигири иди. У, 2017- йили 7-айдин кейин тутқун қилинған, шундин бери из- дерики йоқ. 2016- Йили у 3 қизини түркийәгә оқушқа чиқарған .

Һәмрахан абдуреһим, әмәт яқупниң аяли болуп, у 2018- йили тутқун қилған.

Мәмәт яқуп, тиҗарәтчи болуп, у 2018-йили 6- айда гуаңҗудин тутқун қилинған. Бир оғли бир қизи вә аяли һазир түркийәдә яшимақтикән.

Муһәммәт исмаил, бурһан сетиниң өгәй акиси болуп, у 2018- йили лагерға елип кетилгән.

Гүлсүмай, муһәммәт исмаилниң аяли, у 2018- йили лагерға елип кетилгән.

Бурһан сетиниң билдүрүшичә , у дадисиниң инилиридин әмәт яқуп вә мәмәт яқупларниң  түркийә қатарлиқ дөләтләрдә оқуватқан пәрзәнтлиридин уларниң тутқун қилинғанлиқ хәвирини аңлиғандин кейин, қумулдики сақчи даирилириға телефон қилиш арқилиқ бу 3 нәпәр тағисиниң  2017- йили 7- айдин 2018- йилиниң ахириғичә юрти қумулниң қара дөвә йезиси вә башқа җайлардин қумулға чақиртип елип келинип, тутқун қилинип қумулдики лагерларға соланғанлиқини билгән.

Доктор бурһан сети йәнә даириләр йәнә униң қумулдики ана җәмәт туғқанлиридин, аниси зәйнәп һәмдулниң иниси аблиз һәмдул вә униң оғуллиридин нурәли аблиз қатарлиқларниң әһвали һәққидиму тохталди.

Доктор бурһан сети йәнә өз уруқ -туғқанлириниң тутқун қилинғанлиқи һәққидики әһвалларни таратқуларда ашкарилишидики асасий сәвәбләр һәққидиму тохталди. У хитай һөкүмитидин өзиниң бу уруқ-туғқанлириниң сориқини қилиш вә муһаҗирәттики уйғурларни хитай лагерлириға қамалған уруқ-туғқанлири һәққидә испат беришкә илһамландуруш үчүн бу әһвалларни аңлитиш қарариға кәлгәнликини билдүрди.

Һөрмәтлик радийо аңлиғучилар түркийә истанбул сабаһәттин зайим университетиниң дотсенти бурһан сети улуғйол әпәнди бу йил 3-ай мәзгилидә радийомиз зияритини қобул қилип, өзи малайсияда оқуватқан чеғида униңға тәһдит салған хитай дөләт аманлиқ хадимини ашкарилиғанлиқи үчүн, хитай сақчилириниң юрти қумулдики дадиси сети яқуп, аниси зәйнәп һәмдулға мәҗбури телефон қилдуруш арқилиқ униңға тәһдит салғанлиқини билдүргәниди.  Бурһан әпәнди кейин йәнә  иҗтимаий таратқуларда учур йоллап, хитай сақчилириниң тәһдитини  ашкарилиғанлиқи үчүн юрти қумулдики сақчи даирилириниң униңдин өч елип, қумулдики ата-анисини тутқун қилип лагерға солиғанлиқи вә өзи бу әһвалларниму хәлқара таратқуларда ашкариланғандин кейин, қумулдики  сақчи даириләрниң униң лагердики ата-анисини қоюп берип өйигә қайтурғанлиқини билдүргәниди.

Пикирләр (0)
Share
Толуқ бәт