C4ADS Ning doklati: “Uyghur mejburiy emgiki arqiliq qiziwélin'ghan altunlar dunya miqyasida ishlitilmekte”

Washin'gtondin muxbirimiz nur'iman teyyarlidi
2024.04.17
Toli nahiyeside altun kan achqan kanada shirkiti Uyghur mejburiy emgikige chétilish gumani qozghighan Xatu altun kanida altun qéziwatqan körünüsh
dynastygoldcorp.com

17-Aprél küni merkizi washin'gtondiki “Ilghar mudapi'e tetqiqat merkizi (C4ADS) “ “Uyghur aptonom rayonida ishlepchiqirilghan altunning yer sharidiki ishlitish da'irisi” serlewhilik yéngi doklatini élan qilghan. Mezkur doklatta déyilishiche, bu doklat aldinqi yili 11-öktebirde élan qilin'ghan “Yérilghan tomurlar: dunyaning Uyghur rayonidiki qézilma bayliqlargha tayinip qélishi” serlewhilik doklatining dawami iken.

Aldinqi yildiki doklatta amérikadiki yüzligen chong shirketning Uyghur rayonidiki mejburiy emgek küchliri teripidin qéziliwatqan altunlardin paydilinip, mehsulat ishlepchiqiriwatqan bolushi mumkinliki otturigha qoyulghanidi. Bu qétimliq yéngi doklatta körsitilishiche, Uyghur mejburiy emgek küchini qollinip ishlepchiqirilghan altunlarning dunya miqyasigha éksport qiliniwatqanliqi bayqalghan. Yighip éytqanda, 400 din artuq shirket Uyghur mejburiy emgiki arqiliq ishlepchiqirilghan altun menbesige tayinip, dunyaning herqaysi jaylirida soda qilidiken. Kem dégende 27 ming tarmaq shirket Uyghur mejburiy emgiki arqiliq qiziwélin'ghan altunlar bilen chétilidighan bolup, bu shirketler yawropa döletliri, xongkong we sin'gapor qatarliq döletlerni öz ichige alghan bir qanche yuqiri derijilik soda rayonlirida tijaret qilidiken.

Doklatta yene Uyghur mejburiy emgiki arqiliq qiziwélin'ghan altunlarni ishlitidighan kesipler we bu altunlarni ishlitidighan shirketler jaylashqan dölet we rayonlar heqqide tepsiliy melumat bérilgen. Melumatlargha qarighanda, Uyghur mejburiy emgiki arqiliq qiziwélin'ghan altunlarning mutleq köp qismi kompyutér we éléktiron mehsulatliri yasashta qollinilghan. Bu xildiki shirketler en'gliye, gérmaniye, gollandiye, méksika we firansiye qatarliq döletlerdiki dangliq soda rayonlirigha merkezleshken.

C4ADS Ning tetqiqatchisi méshil kondi (Mishel Kondi) mezkur doklat heqqide radiyomizning ziyaritini qobul qildi. U bu doklat arqiliq Uyghur mejburiy emgiki arqiliq ishlepchiqirilghan her türlük mehsulatlarni her qandaq bir shekilde ishlitish arqiliq xitayning Uyghurlarni téximu köp mejburiy emgekke silishigha yol échip bériwatqan dölet we shirketlerning ashkarilan'ghanliqini bildürdi. U mundaq dédi: “Doklatimizda Uyghur mejburiy emgiki arqiliq qéziwélin'ghan altunlargha chétishliq sahelerni tekshürduq. Ular tekshürgen sahelerning ichide 97 pirsenti Uyghur mejburiy emgiki arqiliq qéziwélin'ghan altun'gha chétilidu. Biz dunyaning her qaysi jayliridiki 27 ming shirket heqqide tekshürüsh élip barduq, buning ichide 423 shirketning Uyghur mejburiy emgikige chétilish nisbiti nahayiti yuqiri, chünki ularning bash shirkiti Uyghur rayonidin chiqqan altunlarni ishlitidu. ”

Kanada radiyo shirkiti (CBC) 26-mart küni wankowér shehiridiki “Seltenet altun shirkiti” (Dynasty Gold Corp) ning Uyghur rayonidiki altun kanliridiki ishlepchiqirish zenjirining Uyghur mejburiy emgiki bilen chétishliq ikenliki sewebidin eyiblen'genlikini xewer qilghanidi, halbuki, mezkur shirket buni inkar qilghan.

Kanadadiki “Uyghur heqlirini himaye qilish qurulushi” ning ijra'iye diréktori memet toxti ependi bu heqte radiyomizgha söz qilip, kanada hökümitining bu mesilige nahayiti estayidil mu'amile qilghanliqini tekitlidi.

Démek, Uyghur mejburiy emgiki arqiliq qiziwélin'ghan altunlar yer shari miqyasigha tarqalghan. Amérikada “Uyghur mejburiy emgikining aldini élish qanuni” yürgüzülüshke bashlighan, bashqa döletlerdimu oxshimighan qanunlar yolgha qoyulghan bolsimu, emma bu qanunlar Uyghur mejburiy emgek arqiliq ishlepchiqirilghan mehsulatlarning yer shari teminlesh zenjirige éqishini tosup qalalmighan.

Méshil kondi bu heqte toxtilip mundaq dédi: “Gerche ‛Uyghur mejburiy emgikining aldini élish qanuni‚ maqullinip, ijra qilinishqa bashlighan bolsimu, emma altun we bashqa muhim minéral maddilar amérikaning teminlesh zenjirige kirdi. Bu mesilige amérikadiki munasiwetlik ijra'iye organliri diqqet qilishi kérek. Biz bu mesile heqqide munasiwetlik organlar bilen körüshüwatimiz. ”

U yene “Uyghur mejburiy emgikining aldini élish qanuni” yolgha qoyulghandin kéyin, xitay hökümitining éksport siyasetliride bek chong özgirish bolmighanliqini eskertip mundaq dédi: “Epsuslinarliqi shuki, xitayning siyasetliride biz héchbir özgirishni körmiduq. Méningche, xitay kompartiyesi besh yilliq pilani boyiche toxtawsiz ilgirilep méngiwatidu. Xelq'araning bésimimu éshiwatidu, emma biz körüshni ümid qilghan özgirishlerni téxi körmiduq. ”

U axirida shirketler bilen hökümetning qanun chiqirish organliri we ijra qilish organliri birlikte heriket qilghandila, andin Uyghur mejburiy emgikining aldini élishqa bolidighanliqini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.